3/20起勢，輕症確診毋使隔離，頭家也做毋得要求員工快篩
【蘇佑昇／西湖海陸腔】中央流行疫情指揮中心宣布從3月20下禮拜一起勢，防疫政策改成0+N自主健康管理个方式，就係COVID-19輕症確診个人毋使隔離也毋使通報了，做得自家選愛在屋肚歇睏，還係去公司正常上班，勞動部也講，假使勞工在自主健康管理期間，希望自家愛維持去上班，頭家就愛尊重員工，頭家做毋得要求員工毋好上班，也做毋得要求員工拿出快篩陰性个證明試劑，假使員工去到公司上班，公司也愛發薪水分員工。勞動部也教勞工，假使快篩陽性个勞工，身體無舒爽，無法度上班，想愛在屋肚放尞，勞工做得拿「快篩陽性證明」相片，摎頭家申請無戴院个普通傷病假，這隻病假日仔，1年之內做毋得超過30日，頭家也應該愛發一半个薪水分勞工，另外，快篩陽性个勞工請確診病假，從快篩陽性該日起勢到第5日之內，這6日，頭家也做毋得扣發全勤獎金，以上最新个防疫政策提供分鄉親參考。
3月20起勢，苗栗高鐵站到台灣客家文化館，來回做得共下坐計程車分攤坐車費用
苗栗縣第一條做得共下坐計程車，分攤車費个路線「臺灣客家文化館到台鐵豐富站(高鐵苗栗站)」个路線，會從3月20（拜一）正式啟動。客委會客發中心主任何金樑講，感謝新竹區監理所所長吳季娟摎苗栗監理站站長蘇淑賢大力支持這隻「共下坐計程車」个方案，另外，客家文化發展中心，進前就已經有特別摎「商巨翔」奧多拜公司合作租車優惠，還有摎銅鑼鄉公所申請毋使錢个接送社區巴士，這滿過增加台灣客家文化館个共下坐計程車服務，分坐高鐵還係火車个鄉親，做得順利、輕鬆个來台灣客家文化館參觀，鄉親坐高鐵還係台鐵到苗栗高鐵站，一行出來就會看著共下坐計程車个牌仔，從苗栗高鐵站到台灣客家文化館，全程差毋多係23公里，坐車个時間差毋多係半點鐘，坐一擺計程車个錢差毋係新台票650箍，假使有4儕共下坐計程車，分攤錢之後，一儕人變成160箍，假使越多人共下坐計程車，最越便宜。何金樑也提醒，續下來就係一年一擺个桐花季，大家也做得提前注文共下坐計程車个服務，好好享受台灣客家文化館靚膩膩个桐花。
遊客週一至週五可撥打台灣大車隊共乘預約專線「03-6672468」並提前1日預約，週六日及國定假日暫停預約服務，要搭乘的遊客請提早預約，歡迎大家利用搭乘。詳細交通資訊可上臺灣客家文化館官方網站https://thcdc.hakka.gov.tw/1240/搜尋。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
歡迎大家下載講客廣播電臺APP，共下講客Let’s fly
