台灣高鐵新竹苗栗站之間連續幾下日發生列車異常个消息
【蘇佑昇／西湖海陸腔】交通部鐵道局表示，因為台灣高鐵這2隻月之內，發生了7擺列車集電弓異常，造成列車時間延誤無準時到站个狀況，也因為到今還吂尋出來確定个發生原因，也無尋出來設備異常个所在，所以決定在新竹站、苗栗站之間个路段，先降低速度，從原本个每點鐘300公里，降到每點鐘230公里个速度來通行，也進行測試，敢係速度忒遽正造成列車異常。
根據資料來看，台灣高鐵列車在2隻月就出現7擺集電弓異常降弓，這兜事故大部分集中在新竹苗栗路段，包含1月25、2月初9、2月11、2月20、2月23、2月26、3月初5，這幾下隻月都發生集電弓異常，造成高鐵列車無準時到站。
台灣高鐵也表示，鄉親可能會愁新竹苗栗路段降低速度敢會影響旅客坐車仔个時間，台灣高鐵講，因為高鐵最高每點鐘係300公里，降低速度个路段也無恁長，所以整體來講坐高鐵做盡時間目前還毌會影響著。
另外，目前這隻事件政府部門鐵道局，也已經針對高鐵集電弓異常降弓个事件，成立專案調查小組了，台灣高鐵自家也已經請日本原本个廠商遽遽𢯭手當中。
2023世界野球經典賽（WBC）今晡日在台中開打个消息
今晡日2023世界野球經典賽（WBC）第一輪A組預賽在台中洲際野球場鬧熱開打，今晡日台灣隊會摎巴拿馬隊比賽，這隻第一輪个A組預賽，會從3月初8日持續打到3月12，這擺台灣隊會摎共樣係A組个荷蘭、古巴、義大利、巴拿馬相爭進入複賽个資格，這擺預賽做盡分做4隻組，台灣隊个A組有巴拿馬、義大利、荷蘭、古巴，這5隻隊伍全部愛摎其他各隊互相比賽1場，之後打隻組會有前2名晉級前八強複賽，假使台灣做得晉級，台灣隊就做得飛到日本東京，進行複賽。
假使複賽台灣隊過順利晉級，變成前四強个隊伍，就做得過飛到美國邁阿密進行冠軍決賽，目前經典賽亞洲球隊淨有日本、韓國打入去前四強，包含日本2006年、2009年拿著冠軍，台灣个話最好个經典賽成績係2013年，在台中舉辦个預賽該時，以2比1打贏韓國晉級，毌過複賽嗄輸分日本還有古巴，最尾係得著第8名，所以這滿大家當希望台灣隊做得拿著比頭擺過較好个成績！
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
歡迎大家下載講客廣播電臺APP，共下講客Let’s fly
