毋使錢个快篩試劑淨到2月28為止个消息
【蘇佑昇／西湖海陸腔】中央流行疫情指揮中心表示，0歲到6歲个學齡前幼兒還有65歲以上个長輩做得領毋使錢个COVID-19家用快篩試劑政策，淨到2月28為止，指揮中心提醒符合資格个鄉親，愛遽遽拿健保卡去領快篩試劑。
另外，第11輪家用抗原快篩試劑實名制，會從3月初1起勢實施，指揮中心表示，這批快篩試劑个貨源當穩定，所以會維持分鄉親一隻月做得去買一擺个政策，鄉親拿健保卡去買快篩試劑，每一擺最多做得買6份，每一份有5門，假使鄉親這隻月無想愛一擺買到6份，也做得分批購買，另外，鄉親也做得請別儕代替購買，快篩試劑个價數，還係每一份新台票500箍，毋過提醒鄉親，因為快篩試劑係醫療器材，假使鄉親購買之後，就做毋得退貨，另外，假使鄉親有領過毋使錢个快篩試劑，也毋會算入去逐隻月做得買快篩試劑个名額，請鄉親做得放心。
最尾，指揮中心提醒家長，家用快篩試劑淨做得分2歲以上个細人仔使用，假使愛分2歲以下个嬰兒快篩，愛另外領快篩試劑正做得分2歲以下个嬰兒使用。
國立客家兒童合唱團連續2場賣票公開演出圓滿結束个消息
國立客家兒童合唱團從2019年成團到今，在世界合唱團冠軍指揮彭孟賢个帶領之下，去到國內各大舞臺，像係國家音樂廳、總統府音樂會這兜公開大型場合演出，得著外界當大个肯定，這兜細孲仔个自然美聲，也分大自家阿𧩣，講這兜細孲仔个聲音「就像分天使唚過个聲音」、「國內最強个客家童聲」，這兜細孲仔經過2月12在苗栗苗北藝術文化中心還有昨晡日在高雄衛武營个公開賣票演出之後，成功又精彩个演出了這兩場个表演，這兩場个表演舞台下背个觀眾位仔也坐到淰淰，這兩場个表演，全部係在經過長達2點鐘个演出之後，在愛結束該時，觀眾感動到拍手大聲喊Encore(安歌），掌聲還有Encore聲也持續了將近1分鐘，彭孟賢也順應觀眾，帶來Encore曲《行過》還有《花樹下》，這兜精彩个歌曲，也分觀眾感動到目汁緊跌。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
歡迎大家下載講客廣播電臺APP，共下講客Let’s fly
