台中東勢新丁粄節韶早拜六、拜日鬧熱登場！ 講客號也來了！
【苗栗西湖海陸腔／蘇佑昇】「2023臺中東勢新丁粄節」活動就愛在韶早朝晨9點起勢，連續兩日在東勢客家文化園區盛大舉辦，這兩日个活動正經當精彩，金鐘講客號也會著現場廣播直播，由講客廣播電臺主持人廖經華，在下晝4點在現場邀請著一系列大來賓，像係聯合大學客家學院院長林本炫、大埔客家協會理事長郭鶴琳、臺中市議員吳振嘉、東勢區長翁培真、立法委員江啟臣、台中市客委會主委江俊龍，在空中摎鄉親紹介拜六、拜日這兩日个精彩活動，還有新丁粄節个秘密！
加上今年這隻活動過得著中央客家委員會選做全國「客庄大節」之一个活動，其中「鬪粄文化」係全國最特別个客家文化之一，所以今年个東勢新丁粄節，有規劃愛心義賣、捐血這兜活動，希望透過新丁粄節一系列个活動，做得餳著過較多个人來臺中客庄旅遊，感受這隻最特別个客家節慶品牌新丁粄節。
這擺个新丁粄節主要精神係提倡性別平等、鼓勵多降細孲仔，所以，拜日在園區在背會舉行這擺新丁粄節个主要活動正月半「求子个儀式」，摎鄉親進行求子儀式，台中市政府團隊講，恁多个活動分鄉親體驗參加，就係愛鼓勵鄉親「敢結婚、願意降、歡喜飼細人仔」，同時也提倡性別平等个重要。
今年新丁粄節連續兩日个系列活動，像係「求文昌」、體驗做新丁粄還有搞這擺特別為新丁粄節製作个大型扭卵機，除了恁多好搞个體驗活動，現場也有多隻表演團隊，像係第一日个開幕式就有邀請著中信兄弟啦啦隊開場表演、續下來活動起勢之後，第一日朝晨就有「身聲劇場26組特色遶街團隊」帶來一系列个表演，續下來第二日有「哈客舞青春」、「Chill山城夜」、「新丁Night Show」表演，這兜表演大家做得看著金曲獎最佳客語歌手劉劭希、吉那罐仔、FEniX、高爾宣這兜歌手唱歌。
除了有好看好搞个活動，現場也有180隻个攤位，分大家做得買特色客家產品、食客家美食，同時，金鐘講客號也會準備一大堆限量禮物愛送分大家，大家千萬毋好錯過，歡迎全國鄉親拜六拜日遽遽來臺中東勢客家文化園區，體驗「正月半」新丁粄節！
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
歡迎討論或留言給我們: