文／江茂丹，苗栗縣南庄鄉客家人，現居高雄市（海陸腔）

三十零年前，𠊎還吂知愛仰般寫正做得完成一篇像樣个文章，因爭一個毋熟事又毋知厥名姓个細妹人；一句「若作品……。」觸著𠊎毋認輸、硬頸客家人个老腰仔，哪有恁好空放佢煞个道理。自該擺過後，𠊎鼻空一摸，無分人欺翕个性體，一息仔都無遮囥哪盼得添放忒，故所全全呈現出來。打幫一隻毋分人看輕、看衰漦个信念；心肝窟个根釘到核核挷就挷毋出。心心念念毋識毋記得，就係一定愛完成𠊎个作家夢，打爛該個細妹人看𠊎無个想法。除了黏時開始尋看啊，到底哪位做得分半路「出家」个𠊎，學習著正統創作个路徑？

好得天公有目珠！恁堵好在高雄市文化中心，有開辦多年个「文藝創作班」；該年六月，𠊎無第二句話緊觸觸斯報名，變做一個等乖个學生仔。啟蒙先生係小說、散文、新詩都當慶，文壇出名多年个眷村老作家──李冰先生。

逐禮拜三暗晡時七點到九點係上課時間，逐擺就係𠊎交最多天馬行空个作品，又乜係最亂槌打鼓个怪學生仔。李冰先生無嫌𠊎个文章內容；逐篇放在粉牌頂高細心細意解說。成時還會分李先生評論到無半垤好，ㄤ咕毋敢打一下个𠊎，面紅濟炸，頭那犁到肚臍下，敗勢到地泥面若有空，強強都愛鑽落去。

李先生諄諄教誨，𠊎這隻番綻牛漸漸也變到有較老當；年半个學習期間，篇篇作品對最濫線到分先生安腦，沙鼻到強強會飛上天。

最記得李先生摎𠊎講過一句鼓勵个話：「繼續煞猛打拚，毋使幾久若該堆爐火轉青咧！你定著會變做一個作家。」

打幫李冰先生个好金言，有幾下年吾華文小說佔大部分；再過來係散文。最分𠊎看輕个新詩，包尾嗄變做𠊎表現各種新文體客語詩个主角。

好文藝个朋友，堵正開始想學習創作，萬事起頭難，愛勇敢踏出艱辛个第一步。寫文章毋使等有閒，無論幾時？在哪位擎著筆？試試仔對脣頭最熟絡个人事物寫起。三五行無相干、文詞毋靚無相干、毋餳人無人欣賞莫揈佢。要緊个係自家愛有興趣，寫麼个順心意就好，「有心打石石成磚，無心打井井無泉」，慢慢仔總有一日，做得蹶上文藝个殿堂發光發熱。

華語

三十幾年前，我還不知要怎樣寫才能完成一篇像樣的文章，因為一個不熟又不知其姓名的女子；一句「你的作品……。」觸怒到我不認輸、硬頸客家人的底線，哪有輕易放過她的道理。自那次過後，鼻孔一摸不給人侮辱的個性，一丁點都沒遮藏更捨不得忘記，所以全部表露無遺。憑藉一個不讓人看輕的信念；內心根藤攀錯怎麼拔都難拔起來。心心念念不曾遺忘，就是一定要成就我的作家夢，打破那個女子對我嗤之以鼻的想法。除了馬上開始尋找到底何處，能讓半路「出家」的我；可以學習正統的創作途徑。

老天有眼！剛好在高雄市文化中心，有開辦多年的「文藝創作班」；當年六月二話不說我匆匆忙忙報名，成了一名最乖巧的學生。啟蒙老師是小說、散文、新詩集大成；已在文壇成名多年的眷村老作家──李冰先生。

每個禮拜三晚間七點到九點是上課時間，每次只有我上交最多天馬行空的作品，也是最不按牌理出牌的怪胎學生。李冰老師沒嫌棄我文章內容貧乏；一一放在黑板上相當仔細解說。有時還會漏氣給李老師評論到沒半點好，一句話都不敢吭的我，滿臉脹得紅通通，頭低到肚臍下，不好意思到地面若有孔洞，隨時都要鑽進去躲。

李老師諄諄教誨，我這個調皮的牛漸漸也變成比較老練；一年半的學習期間，篇篇作品由最糟糕到讓老師誇獎，神氣得差點就要飛上天。

最記得李老師跟我講過一句鼓勵的話：「繼續再努力打拚，不用多久你那堆爐火變純青時；你一定會成為一個作家。」

感謝恩師的金玉良言，幾個寒暑我以華文小說為主；其次是散文。最讓我看輕的新詩，最後變成我表現各種新文體客語詩的要角。

愛好文藝的朋友，若想開始學習創作，凡事起頭難要勇敢踏出艱辛的第一步。寫文章不必等有空，不論何時何地拿起筆，試著從身邊最熟悉的人事物寫起。三五行沒關係、文藻不漂亮、沒引人欣賞莫理他。要緊的是自己有興趣，寫什麼順心意就好，「鍥而不捨，金石可鏤」，慢慢的總有一天，能坐上文藝殿堂發光發熱。