客傳會陳邦畛董事長於講客廣播電臺臺長徐智俊（阿俊哥）告別式上致詞的相關消息
【羅盛滿／新竹竹東海陸腔】昨晡日係資深金鐘媒體人、同時乜係客家公共傳播基金會前總經理，乜係講客廣播電臺个臺長徐智俊（阿俊哥）个告別式，客家公共傳播基金會个董事長陳邦畛，乜率領全體員工前往哀悼致意，還過安排阿俊哥生前最沙鼻个「金鐘講客號」到現場，送阿俊哥最尾一程。續下來，來聽陳邦畛董事長个現場致詞：
「阿俊啊，係一個當有才華个後生人啊，佢過去在客家有關个該恁仔个電台个廣播裡肚斯發揮當多厥創意，該佢該當時因為恁仔个原因，𠊎斯拜託佢來到基金會來做總經理，所以來到基金會个時節，佢乜做得發揮講佢恁仔个創意啦，當多想法佢斯盡肯去想，因為其實亻恩俚基金會係新个啊，佢該當時講愛做麼个事情，大家自家發揮自家个想法，該央時想著講，講亻恩有一隻安到「講客進鄉團」恁仔个想法異生趣，摎民間个講「進香」个音斯共樣，毋過呢，毋係講去拜麼个神个進香，斯講摎客家人帶入客家庄，摎客家鄉親帶入客家庄，就恁仔个想法，毋過仰般形做？其實大家就係慢慢去想。
最尾斯係講，亻恩用一台「講客號」个車來做，佢該當時乜當熱心，想愛仰般形摎這東西去到客家庄，使得看得著有客家該恁仔个形象，因為客家當難看得著形象啦，所以該當時就講，該阿俊斯摎亻恩俚个同事，大家在該想，愛用恁仔个方式？想著講，選舉个時節當多會租一輛宣傳个車，亻恩共樣啊，亻恩俚講客話做得摎恁樣个講客，恁樣个當特殊个一隻文化，透過車去到亻恩俚个各隻鄉鎮，所以有恁樣个想法，定定仔這兜想法斯發展出斯講，因為亻恩俚个基金會愛做安到摎社區个連結，去到社區个時節，愛仰般形來表現客家，講客係一回事，講客斯無形象，所以講，該當時想講，用一輛恁仔个「講客號」恁仔个車仔摎佢形象打出來，所以最尾乜得著一隻金鐘獎啦，斯係用人講拖拉庫得金鐘獎斯係這件事情。
佢這三年來，在基金會做總經理，佢乜摎亻恩俚个同事大家相處當好，𠊎想講非常毋盼得啦，佢過去這兜東西恁認真做，佢乜講走就走，毋過𠊎愛講，還係愛非常承蒙阿俊，佢對客家貢獻，人都做得看著各方面，厥朋友也好，大家都當安腦佢，阿俊分人一隻當大个勇氣，做得來講客，做得去摎客家這件事情變到自家个事情，𠊎想這係當好个人啦，佢个人生做得行到今，對大家來講，尤其對客家人來講係當大个鼓勵，𠊎想乜愛承蒙阿俊。」
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
（Android連結：https://reurl.cc/8GWlXd）
（IOS連結：https://reurl.cc/O1pb59）
