文／廖佳仁（海陸豐野客），中壢客人，楊梅富岡（伯公岡）出生，任教桃園市中壢區新街國民小學已35年，這下戴中壢（腔頭：海陸腔）
桃園市平鎮區東勢「柑園」个「作述堂」王屋，無跈等用佢兜原旦分出个南勢「植槐堂」堂號，特別改用「作述堂」來做佢兜个新堂號，係取佢源自於《論語．述而篇》：「子曰：『述而不作，信而好古，竊比於我老彭。』」意思係單淨傳述前人个知識，毋會創作新个學問。
「堂號」係𫣆俚兜臺灣客人盡有特色个一種分辨方式，比論講𠊎兜姓廖人，長透看著个「堂號」會安做「武威堂」，在桃園市觀音區个「塘背」，還有歸隻村莊分人喊做「武威村」，因為該隻莊頭肚个人大體姓廖；假使係福建泉州府偎海脣該片移民徙過來臺灣，戴在臺南、鹿港、竹塹、萬華、大禾埕、滬尾（淡水）這兜港口街路附近个廖姓河洛人，佢兜斯慣用「武威衍派」；係講來自福建漳州府，無斯汀州府，除非佢兜係來自漳州府詔安縣「二都」个客人，係無，這兜較偎山項、海脣个河洛人，就大體都會用「武威居」、「某某居」這種「居」个方式來表示。
來自桃園市平鎮區南勢个「植槐堂」王屋，分枝杈椏遷徙到東勢「大壟坻（註1）」个「南陽堂」葉屋旁脣到今，聽講已經有三百零年了，王屋人講个係饒平腔个客話，摎講海陸客个「南陽堂」葉屋有小可爭差。饒平縣，原旦係歸屬清朝時期个廣東省潮州府管轄，毋過毋係歸隻饒平縣个人都會講客，講客个人大體係戴都饒平縣个北片析，因為佢兜原鄉个西北片係大埔縣：講客，西片析係豐順縣：乜講客，連東片个福建省漳州府个詔安縣裡肚个「二都」：乜共樣係講客个。
桃園市平鎮區東勢「柑園」个「作述堂」王屋，旁脣明明就係「大壟坻」，做麼个又愛改喊做「柑園」呢？敢係挑挑愛摎旁脣个「南陽堂」葉屋無共樣？挑故意愛搣漦搣濞係無？
毋係啦！東勢國民學校畢業，現下已經80大零歲个王阿伯定定仔講，頭擺對中壢經過金陵路行到龍潭个巴士係新竹客運負責經營，逐日會有4枋車來回中壢到龍潭，佢兜王屋想愛申請都佢兜屋面前个路口設一隻招呼站牌該量時，新竹客運公司就問佢兜講，該隻站名愛安做麼个正好呢？
因為該隻柑園路口个菜園肚，好死毋死、恁堵好種有幾叢柑仔，王屋斯應新竹客運公司講，該就安做「柑園」！斯恁樣形，「柑園」這隻新地名就出現了，毋係因為該位有種當多柑仔个園哦！
平鎮南勢个王屋係對桃園南崁該片，因爭清朝時期分類械鬥个緣故，走閃徙過來个王克師家族後代子孫，目前還有「植槐堂」公廳留在南勢該片，保存相當完整个饒平客建築形式，有門樓、軒亭，維持客人祖宗：家神在正廳，神明在外背、在旁廳、在廟項个祭祀空間，嶄蠻有客人个傳統，大自家有閒時節乜做得䟓工（註2）去看下哦！
（註1）大壟坻：即大壟底，大畦底。
（註2）䟓工：dangˋ gungˋ，專程、特地。
華語
桃園市平鎮區東勢「柑園」的「作述堂」王家，未續用他原來分出的南勢「植槐堂」堂號，特別改用「作述堂」來做他們的新堂號，是取他源自於《論語．述而篇》：「子曰：『述而不作，信而好古，竊比於我老彭。』」只傳述前人的知識的，不創作新的學問。
「堂號」是我們臺灣客家人相當有特色的一種分辨方式，譬如我們姓廖的人，常見的「堂號」是「武威堂」，在桃園市觀音區的「塘背」地方，還有整個村莊被人叫做「武威村」的，因為那個村莊裡，差不多全部都是姓廖的人；倘若是從福建泉州府靠海邊那裏移民遷徙移民來臺灣，住在臺南、鹿港、新竹、萬華、大稻埕、滬尾（淡水）這些港口街市附近的廖姓閩南人，他們就習慣用「武威衍派」；要是來自福建漳州府，或是汀州府，除非他們是來自漳州府詔安縣「二都」的客人，否則，這些較靠山區、海邊的閩南人，就大都都會用「武威居」、「某某居」這種「居」的方式來表示。
來自桃園市平鎮區南勢的「植槐堂」王家，開枝散葉遷徙到東勢「大壟坻[3]」的「南陽堂」葉家旁邊到現在，聽說已經有三百多年了，王家人講的是饒平腔的客語，跟講海陸腔的「南陽堂」葉家有稍微差異。饒平縣，原來是歸屬於清朝時期的廣東省潮州府管轄，不過並不是整個饒平縣的人都會講客家話，講客家話的人大都是住在饒平縣的北邊，因為他們原鄉的西北方是大埔縣：講客家話，西方是豐順縣：也是講客家話，連東方的福建省漳州府的詔安縣裡的「二都」：也同樣是講客家話的。
桃園市平鎮區東勢「柑園」的「作述堂」王家，旁邊明明就是「大壟坻」，為何又要改叫做「柑園」呢？是否特別要跟旁邊的「南陽堂」葉家不一樣？故意要搞東搞西是嗎？
非也！東勢國民學校畢業，現在已經80多歲的王阿伯娓娓道出，以前從中壢經過金陵路前往龍潭的巴士是由新竹客運負責經營的，每天會有4班車來回，他們王家想要申請在他們家前面的路口設一個招呼站牌時，新竹客運公司就問他們說，那個站名要叫做什麼才好呢？
因為那個柑園路口的菜園裡，十分湊巧、剛好種有幾棵柑樹，王家就回新竹客運公司說，那就叫做「柑園」！就這樣子，「柑園」這個新地名就出現了，並不是因為他們在哪裡種有很多柑樹的園圃哦！
平鎮南勢的王家是從桃園南崁那邊，因為受清朝時期的分類械鬥緣故，而閃避遷徙過來的王克師家族後代子孫，目前還有「植槐堂」祠堂留在南勢那裡，保存相當完整的饒平客建築形式，有門樓、軒亭，維持客人祖宗：家神在正廳，神明在外面、在旁廳、在廟裡的祭祀空間，相當具有客家人的傳統，大家有空時也可以專程去看看哦！
