客傳會年會／相揇新媒體共下客聲影像化 盡命牯推動客家族群主流化
【羅盛滿／新竹竹東海陸腔】客家公共傳播基金會昨晡日（6/22）以「大聲講客．新世代新傳播」為主題舉辦年度諮詢座談會議，摎各界報告客傳會過去歸隻年頭个工作成果，現場超過150儕貴賓、專家學者還過媒體人共下參加這擺會議。邀請國立陽明交通大學榮譽教授張維安、摎國立客家兒童合唱團團長彭孟賢共下參詳，探討還過推廣新世代客家語言文化傳播。
另外邀請屏東內埔仔出世个中國信託銀行董事長利明献，用預錄影片个形式，從企業社會責任个角度來看，摎大自家分享做為一個客人、又係成功个商業領導人，愛仰般在客家文化永續發展个前提之下，加速提升客家聲望。
續等由客傳會總經理、同時乜係講客廣播電臺个臺長徐智俊，摎各大廣播電臺共下參詳未來十年个廣播新想像。客傳會董事長陳邦畛指出，過去一年以來，基金會在各隻領域都有明顯个成長摎改變，未來客傳會會繼續煞猛推廣客家族群主流化，提升客家聲望，分客家在無共樣个位所分大自家看着，期待分台灣人了解早斯囥在生活當中个客家文化內涵。
法國能源供應多元 俄羅斯切斷天然氣暫時無影響
俄羅斯摎能源準做武器，藉等切斷法國、德國、義大利這兜國家个天然氣來施壓。核能大國个法國對俄羅斯依賴程度比其他國家還較低，同時煞猛開拓多元化能源供應。
根據生態轉型部2021年个報告，法國能源消費占最多个還係核能，占咧總量个40%，石油係28.1%，再生能源將近13%。天然氣單淨占咧15.8%，德國天然氣係占咧佢兜總量个26.8%。俄羅斯天然氣單淨占咧法國總進口量个17%，相對德國摎義大利个將近50%。摎俄羅斯天然氣个歐洲最大人客德國相比，法國對俄羅斯个依賴確實較低。
天時資訊
中央氣象局表示，今晡日天時當好又當熱，當晝左右、台北市、新北市、彰化縣、雲林縣、嘉義市、南投縣、台南市、高雄市、屏東縣偎山區抑係窩壢、花蓮縣、還過台東縣縱谷，這兜位所个高溫可能達到36度以上。
氣象局也表示，今晡日各地天時係好天到多雲、高溫穩定，臨晝仔左右，紫外線偏高，做得達到過量、甚至係危險等級；落水方面，東南部所在摎恆春半島有一兜零星短暫陣雨个機會，另外過晝以後在大台北、中南部所在還過其他山區有局部短暫打風時。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
歡迎討論或留言給我們: