苗栗（火旁）龍25週年

2023年01月31日

00:00

苗栗（火旁）龍25週年

【胡祺梓／苗栗銅鑼四縣腔】苗栗（火旁）龍活動25週年，苗栗市公所表示，2月初3（拜五）暗晡頭6點半，在南苗三角公園會舉辦「民俗踩街活動」，會邀請25支專業藝文踩街團隊還有定點社區團隊來參與；2月初4（拜六）暗晡頭7點在河濱公園，會舉辦「（火旁）龍之夜」，現場會有（火旁）龍表演，還會有台中有名个夜光龍表演，盡尾還會有「（火旁）龍25 龍飛鳳舞」秀，這一系列个（火旁）龍活動，結合聲音光線、特效這兜藝術，就係愛分鄉親有難忘回憶。昨晡日苗栗市長邱鎮軍在講客號个時候講，苗栗（火旁）龍這恁多年來受著疫情還有少子化个影響，當難推動，毋過還係有新个龍隊願意加入支持、持續傳承苗栗个迎龍文化，歡迎全國旅客在2月初3、初4共下到苗栗客家庄，感受（火旁）龍鬧熱个氣氛。

《講客三分鐘新聞》天光日起勢增加8節个相關消息

講客廣播電臺个《講客三分鐘新聞》，鄉親在2月初1（乜係天光日）起勢，由本旦逐日个5節，新增逐日8節，歡迎鄉親臨晝11點到臨暗6點，逐點鐘準時收聽，新聞內容會同步去刊登到講客廣播電臺官方網站摎《客新聞》个網站肚，收聽个同時乜做得同步去對照文字，掌扼最新、最正確个客語用法！客家公共傳播基金會董事長陳邦畛表示，客傳會摎客家公共傳播个任務㧡起來，這擺增加新聞時段，一方面展現客語傳承个成果、為客家傳播培養新血，另外一方面乜希望做得鼓勵還較多優秀个客家子弟做得加入客家傳播个行列，共下為客語復興煞猛打拚。