文／鍾孝昇，國小教師、中壢客家人，這下戴中壢（四縣腔）
罕得出國个阿爸，經過足足一年，行過五大洲、三大洋个旅程後，今晡日總算轉台灣了。這係佢第四擺出國旅行，乜係佢第一擺一儕人个旅行。
打早，屋下人遵照師父个吩咐，準備三牲、五果，還有佢好个各種菜色，摎神桌擺到淰淰。跈等師父个誦經聲，𫣆俚迎接阿爸轉屋。
還較準个講法，面前个神桌，像係阿爸轉屋前个「機場貴賓室」，佢坐在桌頂，先享用子女準備个飯菜，再過聽法師念佛誦經做功德，下後師父就會渡佢前往人生正式个終點站–阿公婆牌，同歷代祖先團圓。
係講人生就係一擺長時間个旅行，「旅行」乜係體驗人生最好个享受。
𠊎三儕遊覽清水寺，享受古都个風土人情。作者提供
毋過，講起來「旅行」，嗄毋係阿爸輒常做个休閒活動。佢一生人煞猛打拚，為著屋下人个三餐無閒直掣，想尞就毋得著！該載退休後，放下肩頭个千斤擔，子女帶等佢滿哪仔行行尞尞，行過人生最尾个幾截路。
還記得十過年前，爺哀頭下碼出國，由阿姊帶等佢兜去香港，𠊎同老弟就到機場送行，為著紀念第一擺坐飛行機，歸家人還在出境廳下，翕了一張全家福个相片。雖然講正短短兩日个旅行，嗄打開爺娘出國旅行个願頭。
為著紀念第一擺坐飛行機，歸家人還在出境廳下，翕了一張相片。作者提供
難得出國，自然愛食好歇好。阿姊出手盡慨，分佢兜歇在香港个海景大飯店，毋單淨做得看著歸隻維多利亞港个夜景，還做得食著英國正正（ziin）个貴族點心，感受著頭下碼出國暢樂个心情。
對這開始，佢兜就像想開了樣仔，對出國毋會再有恁多个顧慮。續等，佢兜跈等𠊎去日本旅行。𠊎兜三儕遊覽京都嵐山、遶尞清水寺，享受古都个風土人情；在大阪品嘗毛蟹料理、參觀大阪城，體驗日本个精緻文化。雖然講自由行个方式，分阿姆行到雙腳痠軟，強強就會佇毋著！毋過這擺經驗，對當好日本文化个爺娘來講，係一擺難忘个旅行。
第三到出國旅行，歸屋下人總算齊了。𠊎兜又來到日本，毋過係一隻細城市——岡山。恁堵好，這擺來堵著當地个做鬧熱，毋單淨食著甜滋滋仔个水蜜桃，乜欣賞著滿哪仔「並並磅磅」个天花炮，異國滿天个花火，變做這擺旅行盡好个回憶。
旅行當中發生个小事情，乜做得看著阿爸對自家人生个要求。
阿爸係剃頭師父，該擺在日本旅行時，經過一間剃頭店，佢企在店門脣，詳細觀察師傅个技術、剃頭傢伙，還有應對人客个方式，這一企就係足足半點鐘。看等兩老偷看店肚个樣仔，實在當好笑，毋過這乜展現出佢兜對自家頭路个熱情。愐著自家見擺出國，乜會特別注意當地个學校，恁樣个習慣，驚怕就係對爺娘該位傳來个。
詳細觀察師傅个技術、剃頭傢伙，還有應對人客个方式，這一企就係足足半點鐘。作者提供
在手機仔還吂普遍个時代，見擺出國，𠊎總會在台灣，先買好電話儲值卡，到外國後，再過打公用電話轉屋下。雖然講兩子爺个對話，總係講「天時仰般？」「這下幾多點？」這兜無搭無碓个話題，毋過會恁樣做，實在講係兩个男仔人，表達關心个一種方式。
雖然講通訊科技緊來緊進步，毋過乜有無法度突破个限制。該載「信仰」變成連接心靈个橋。阿爸出國這一年，子女逐日早晨暗晡點一枝香，用香火傳達對厥思念，這效果比任何5G，抑係Wi-Fi都較遽、較穩定。
就像見擺𠊎愛出國前，阿爸總會偷偷揤兜外國紙票分𠊎，驚𠊎在國外無錢好使。舊年，佢好恬恬決定離開，展開人生第一擺一儕人个旅行。𫣆俚為佢準備了歸箱个金銀財寶，還訂了頭等艙，安排空中小姐、空中少爺，分佢享受盡高規格个服務，開始這擺个旅程。雖然還係毋盼得佢愛一儕人出國，𫣆俚還係忍等目汁，祝福佢旅途順序，早日平安歸來。
在師父个唸經聲中，合爐儀式好勢了，阿爸總算放下世間煩惱，戴入阿公婆牌位裡肚。𠊎想，既經變成家神个阿爸，若係想過一擺出國旅行，無論係欣賞清水寺个日頭落西，還係過一擺享受維多利亞港脣个點心，佢淨需要心念一動，就做得黏時飛到該位，儘採歸世界尞。恁樣个自由，正經係𠊎這隻好旅行个倈仔，欽羨个啊！
學會一儕人个旅行，阿爸淨需要心念一動，就做得黏時飛到該位，儘採歸世界尞。作者提供
毋過，既經變做孤兒个𠊎，見擺思念阿爸，多年毋會好个乾眼症，黏時就分目汁醫好，這藥仔比麼个靈藥還較有效，係阿爸留分我最寶貴个禮物。
P.S. 當好新事物个阿爸，今晡日該當係用「快速通關」个方式過海關，𠊎兩擺跌筊，跌一擺阿爸就分𠊎聖筊，頭等艙个旅客順序平安轉到燒暖个屋下。
華語
難得出國的爸爸，經過足足一年，走過五大洲、三大洋的旅程後，今天總算「回國」了。這是他第四次出國旅行，也是他第一次一個人的旅行。
一早，家人遵照師父的吩咐，準備三牲、五果，還有他喜歡的各種菜色，將供桌擺到滿滿。跟著師父的誦經聲，我們迎接爸爸回家。
更精準的講法，面前的神桌，像是爸爸回家前的「機場貴賓室」，他坐在桌上，先享用子女準備的飯菜，再聽法師念佛誦經做功德，接著師父就會帶著他，前往人生真正的終點站—祖先牌位，與歷代祖先團圓。
如果人生是一次長時間的旅行，那麼「旅行」也就是體驗人生最好的方式。
不過，說起「旅行」，卻不是爸爸常做的休閒活動。他一生人努力打拼，為著家人的三餐忙忙碌碌，想要休息都沒辦法！還好退休後，放下肩頭的千斤重擔，子女帶著他到處行行走走，走過人生最後的幾段路。
還記得十過年前，父母親第一次出國，由姐姐帶等他們去香港，我和弟弟就到機場送行，為了紀念第一次坐飛機，全家人還在出境大廳，拍了一張全家福的相片。雖然說只是短短兩日的旅行，卻打開父母出國旅行的意願。
難得出國，當然愛吃好住好。姐姐出手大方，讓他們住在香港的海景大飯店，不但可以看到整個維多利亞港的夜景，還可以吃到英國正統的貴族點心，感受到第一次出國愉悅的心情。
從此，他們就像想開了樣子，對出國不會再有太多的顧慮。接著，他們跟著我去日本旅行。我們三人遊覽京都嵐山、漫步清水寺，享受古都的風土人情；在大阪品嘗毛蟹料理、參觀大阪城，體驗日本的精緻文化。雖然說自由行的方式，讓媽媽走到雙腳痠軟，就快要受不了！不過這次經驗，對非常喜歡日本文化的父母來說，是一次難忘的旅行。
第三次出國旅行，全家人總算到齊了。我們又來到日本，不過是一個小城市——岡山。很湊巧，這次來時遇到當地節慶活動，不但吃到了甜滋滋的水蜜桃，也欣賞到隨處「並並磅磅」的天花炮，異國滿天的花火，變成這次旅行最好的回憶。
旅行當中發生的小事情，也可以看到爸爸對自已人生的要求。
爸爸是理髮師，那次在日本旅行時，經過一間理髮廳，他站在店門口，詳細觀察師傅的技術、理髮工具，還有應對客人的方式，這一站就是足足半個鐘頭。看著兩老偷看店裡的樣子，實在很好笑，不過這也展現出他們對自己工作的熱情。想著自己每次出國，也會特別注意當地的學校，這樣的習慣，恐怕就是從父母那裡遺傳來的。
在手機還未普及的時代，每次出國，我總會在台灣，先買好電話儲值卡，到外國後，再打公用電話回家。雖然說兩父子的對話，總是圍著（當地） 「天氣如何？」、「現在幾點？」這些無關緊要的話題，不過會這樣做，說實在是兩個男人，表達關心的一種方式。
雖然說通訊科技日新月異，不過也有無法度突破的界限。還好「信仰」變成連接心靈的橋梁。爸爸出國這一年，子女每天早晚點一枝香，用香火傳達對他的思念，這效果比任何5G，還是Wi-Fi都要快、要穩定。
就像每次我要出國前，爸爸總會偷偷塞些外幣分我，怕我在國外沒錢可用。去年，他突然決定離開，展開人生第一次一個人的旅行。我們為他準備了整箱的金銀財寶，還訂了頭等艙，安排空中小姐、空中少爺，讓他享受最高規格的服務，開始這次的旅程。雖然還是不忍心他要一個人出國，我們還是忍住淚水，祝福他旅途順遂，早日平安歸來。
在師父的唸經聲中，合爐儀式完成了，爸爸總算放下世間煩惱，住入祖先牌位位中。我想，已經變成家神的爸爸，若是想再一次出國旅行，不論是欣賞清水寺的夕陽，還是享受維多利亞港邊的點心，他只需要心念一動，就做得隨時飛到那裡，隨意全世界行。這樣的自由，真的是我這個喜愛旅行的兒子，羨慕的啊！
不過，已成孤兒的我，每次思念爸爸，多年不會好的乾眼症，馬上就分眼淚醫好，這藥比什麼靈藥還要有效，是爸爸留給我最寶貴的禮物。
P.S. 喜歡新事物的爸爸，今天應該是用「快速通關」的方式過海關，我兩次跌筊，擲一次爸爸就給我聖筊，頭等艙旅客順利平安，回到溫暖的家中。
