文／張秀娥，桃園市中壢區人，這下本戴中壢，社區關懷據點、國中小客語支援教師（四縣腔）
時間一囁目就過去，老伴過身乜有年大零，一直都在寄巖項，看著掛紙就會到哩，心頭總係掛吊等，想看仰般來做正好？
想啊想，頭那不時想起做細人該下，因為戴莊下，輒輒看得著竹頭下、田脣角，一盎盎个大盎罐仔，面頂矺等禾稈、磚仔，無論發大風、做大水透年跍在該， 亻厓兜細人輒常都會湊等，在該邊脣走相逐、囥人尋、份家啦，阿婆看著都會大聲喊，全部轉屋下，手緊指緊罵，仰恁綻、恁番，麼个所在毋去尞，係摎金斗盎裝仰般，該就死無命！慢慢較大了，嗄學會應話：「做麼个搞母得，又無仰仔啊！」阿婆講：「跍在竹頭下个係若阿公太，跍在田脣角个係叔公太」續等講這金斗盎个神秘，乜係子孫對祖先个尊敬摎思念。
記得掛紙个時節，歸大群細人會去附近个塚埔搞尞，乜會在草埔項走上走下，成時有人會分紅卵、粄仔，還講帶轉去大家食，食福氣哦！ 亻厓歡喜靂天拿等轉，阿姆看著就毋得直，竹修仔大嫲支修啊過來講：「瀉人面子、還見笑哦！下二擺過搣這搣該，看 亻厓仰般修理你，恁摝人實在無結煞。」
做人餔娘、心臼、阿姆後，有一日渡等大細轉外家，像係掛紙前一日，阿姆當在灶下煠頭牲無閒洎杈，見妹仔轉來斡頭大聲問：「唉！仰恁閒？毋係愛拜祖先？」 亻厓回：「厥該頭就無人拜啊。」阿姆講：「祖先仰做得無拜，騙人毋識。」因為家官早過身，家娘乜八十零哩，故所祭祖个大事，嗄變做 亻厓人生个重要課題。
試著年正過忒，毋多知又到清明祭袓个時節，客家人掛紙，大體在正月半一直到清明節這段時間，掛紙前會先摎祖塔拚淨俐來，祭祖愛準備黄嘏紙，該係愛用細石牯矺在墳頭上背，表示有子孫來祭拜，乜有避邪个用意，另外還愛準備三牲、茶水、鮮花、果子、粄仔、金香、紙炮這兜供品，因為祖塔个位所在崎項，石梯又有幾下十碫，愛蹶上去非常食力， 亻厓輒輒蹶著氣呼呼仔。這兜子孫會在一定个時間裡肚，等人齊來共下拜，由輩份最高个世大人，來向堂上祖先拜請跌筊，跌著三聖筊，子孫會放勢拍手，表示祖先歡喜子孫有來祭祖。
一直在寄巖項个老公，還過幾下位房族，乜在這特別个日仔進塔安位，今後做得摎祖公祖婆歡喜團圓相聚，乜分家屬安心、放心。客家人世代相傳重視倫理文化个精神，到現時一直都無攉忒，深深體會著慎終追遠、祖德流芳个家風，乜望祖先多多保佑子孫，家運興旺、平安順序。
華語
時間轉眼就過去，老伴離開也有一年多了，一直都在祖塔側邊暫住，眼看清明掃墓就快到了，心裡總是牽掛著，想看應該如何做才好?
想啊想，總是想起小時候，因為住在鄉下，經常可以看到竹林下、田邊，一罐罐的大罐子，上面壓著稻草、磚塊，無論刮大風、下大雨一年到頭總是蹲在那，我們這些小孩都會相邀，在那裏跑上跑下、捉迷藏、辦家家酒，奶奶看到就會大聲喊，通通給我回來，手指邊指邊罵說，怎麼那麼皮、那麼不像話，什麼地方不去玩，如果把骨灰罈用得怎麼樣，你們就慘了！慢慢長大了，也學會頂嘴：「為什麼不能玩，又沒怎麼樣啊 !」 奶奶說：「蹲在竹林下的是你的曾祖父，蹲在田邊的是曾叔公」接著說出這骨灰罈的神祕，也是子孫對祖先的尊敬與思念。
記得掃墓時，我們一大群還會去附近的墓地玩，也會在草地上跑來跑去，有時有人會給紅蛋、粄食，還說帶回家大家吃，吃福氣哦，我興高采烈地拿回家，媽媽看到就大發雷霆，竹鞭子拿來痛打一頓說：「丟臉、實在丟臉，下次再這樣，看我如何修理，這麼不聽話實在很要不得。」
為人妻子、媳婦、母親後，有一天帶著孩子回娘家，記得是掃墓前一天，媽媽正在廚房忙著拜拜的東西，看見女兒回來轉頭大聲問：「唉！怎麼那麼空？不是要拜祖先？」我回：「他家那邊就沒人拜呀。」母親說：「祖先怎麼可以不拜，少騙人了」因為公公過世早，婆婆也已八十多，所以祭祖之大事，卻成為我人生的重要課題。
感覺才剛過完年，不知不覺又到清明祭祖的時候，客家人掃墓，大致在元宵節至清明節這段時間，掃墓前會先將祖塔整理乾淨，祭祖要準備黃碬紙，那是要用小石頭把它壓在墳頭上面，表示有子孫來祭拜，也有避邪的用意，另外還要準備三牲、茶水、鮮花、水果、發糕、金香、鞭炮這些供品，因為祖塔位置位在山坡上，石梯又有幾十階，要走上去相當吃力，我常常爬得氣呼呼。這些子孫會在一定時間內，大家到齊再一起拜，才由輩份最高的長者，來向堂上祖先拜請擲筊，擲了三聖杯，子孫高呼拍手，表示祖先高興子孫有前來祭拜。
一直在側房暫住的老公，還有幾位房族，也在這特別的日子晉塔安座，今後可以跟祖先快樂地團圓相聚，也給家屬安心、放心。客家人世代相傳重視倫理文化的精神，到此時一直都保留著，也深深體會到慎終追遠、祖德流芳的家風，也望祖先多多保佑子孫，家運興旺、平安順利。
