文／蜻蜓 全職媽媽、桃園客家人、這下戴新北市
腔調：四縣腔
「鈴〜鈴〜鈴〜」接起電話，吾倈仔个先生講防疫茶放在樓下个門口，佢愛先走了，因爭佢還愛遽遽去送正煮好个防疫茶分遰著COVID19个學生仔同家長。
𠊎用手摸看啊杯仔，還溫燒溫燒，這種溫暖个感覺透過手指，傳到𠊎个心肝肚，分𠊎个心乜跈等燒暖起來。這幾日，𠊎个心肝頭總係有淰淰个愁慮摎無奈何，就恁樣分這杯茶漸漸仔抹忒。𠊎這隻七上八落个心，乜總算定疊了。佢等這份心意，正經分人試著當感心。
這駁仔疫情當得人畏，屋下个世大人同細人仔陸陸續續出現症頭，人開始毋鬆爽，𠊎遽遽渡佢兜去醫院做PCR檢測，該下，𠊎看等列仔排到長長，看毋著列仔个尾，𠊎毋知還愛幾久正會輪著𠊎兜，毋過𠊎知，做忒這擺PCR檢測，毋係這擺確診之旅个結束，顛倒係開始 ，這條抗疫个路還當長啊。
細人仔因爭發燒、頭那痛、歸身仔骨頭痠痛到噭該下，除忒分佢食退燒藥仔、詳細觀察病程个變化以外，𠊎單淨做得恬恬仔祈求天公，分細人仔做得平安度過這擺个難關。跈等細人仔个額頭溫度上上下下个變化，𠊎乜跈等心神毋定，歸隻心牽腸掛肚。第二日，細人仔嗄在退燒過後出現人懶懶、緊敨大氣个症頭，𠊎兜黏時駛車仔渡細人仔去醫院分先生看。摎𠊎胚想个共樣，急診室个門口，排到恁長个列仔，全係有發燒个病人。大人排一列仔，細人仔排一列仔，逐儕人都排列仔幾下點鐘了。
開始落雨毛仔了，𠊎擎頭看啊看頭那頂高抵雨个棚仔，該載有佢，細人仔毋使涿雨排列仔，過看啊去，滿哪仔都係著病个細人仔，有大有細，有兜爺哀揇等，有兜自家坐等度目睡，𠊎敨下大氣，看等吾倈仔細細个面容，𠊎試著盡毋盼得。𠊎摎佢揇起來，用手同佢背囊拍拍啊，𠊎笑笑仔對佢講，佢當勇敢、係最緣投个細細戰士，這擺定著做得打贏病毒怪獸、平安度過。𠊎這兜話毋單淨講分細人仔聽，乜係講分𠊎自家聽。𠊎个心肝肚除忒愁慮，乜有深深个無奈何，毋過，𠊎兜單淨做得勇敢面對，共下盡命仔度過 。
半夜兩點了，𠊎兜坐在急診間个凳仔項，𠊎揇等吾倈仔，同佢講：「過等一下仔就好了，當遽就會輪著俚哩。」𠊎還想對佢講：「毋使驚，這條路有𠊎摎你做伴，定著毋會孤栖。」護士喊吾倈仔个名仔了，𠊎牽等佢个手，共下行入診間，乜同佢共下迎向吂知个挑戰同未來。
華語：
有我陪你，你不會孤單
「鈴〜鈴〜玲〜」接起電話，兒子的老師說防疫茶放在樓下門口，她先走了，因為她還要趕去送剛煮好的防疫茶給染疫的學生及家長。
我用手摸摸杯子，茶還是溫熱的，這股溫熱透過指尖，傳到了我的心中，讓我的心也跟著溫暖起來。這幾天，心中總是充斥著憂愁及無奈，就這樣被這杯溫熱的茶漸漸的撫平了。我這顆吊上吊下的心，也總算回歸本位。她們的這一份心真的讓人分外感動。
這波疫情來勢洶洶，家中長輩及小孩陸續出現症狀及不適，帶著他們去醫院做PCR檢測時，看著長長的隊伍，一眼望不到盡頭，我不知道還要多久才會輪到我們…..但我知道，做完了PCR檢測，卻並不是這趟確診之旅的結束，而是開始……這條抗疫之路還很漫長。
當孩子因為發高燒、頭痛、全身骨頭酸痛而哭泣時，除了給他退燒藥、密切觀察病程變化之外，我只能默默祈求上天，讓孩子平安度過這次難關。隨著孩子額頭溫度上上下下，我也跟著心神不定，整顆心牽腸掛肚。到了第二天，孩子開始在退燒後出現精神不濟、呼吸喘的現象，我們馬上開車帶孩子去醫院急診。不出所料，急診室門口排滿了長長的隊伍，全是有發燒症狀的人。成人排一列，小孩排一列，大家一排就是幾個小時。
開始飄雨了，我抬頭看看頭頂的遮雨棚，很慶幸有它，至少孩子不用在雨中排隊……再看看週圍，一眼望去都是生病的孩子，有大有小、有一些被爸媽抱著，有一些自己坐著打瞌睡……我嘆了口氣，看著兒子小小的臉龐，心裡覺得很捨不得。我抱起他用手拍拍他的背，對他笑笑的說，他很勇敢、是一個最帥的小小戰士，這次一定可以打敗病毒怪獸、平安度過。我知道這些話不但是說給孩子聽，其實也是說給我自己聽的，我心中除了擔憂也有深深的恐懼，但如今只能勇敢面對，一起努力撐過去。
凌晨兩點了，坐在急診的候診椅上，我抱著兒子跟他說：「再等一下就好，快輪到我們了哦。」我其實還想對他說：「不要怕，這條路有我陪著你，一定不會讓你孤單。」診間喚起兒子的名字，我牽起他的手一起走向診間，也和他一起迎向未知的挑戰及未來。
