文／劉菊英，桃園龍潭客家人，客語文薪傳師、社大講師、國小客語先生（四縣腔）
𠊎還略略仔記得，還細細時跈阿婆去尖石个石娘姑婆屋下。該央時，𠊎跈吾公、吾婆歇在赤柯山，該位無金針花，淨有一條老吊橋摎高高个山，遠遠看去，還有青油油个茶園。
該朝晨，雞吂啼，狗吂吠，滿哪還暗摸摸仔，吾婆就牽等𠊎出門。講愛渡𠊎去石娘姑婆屋下尞，歸路無看著半個人，只看著大大頭个樹仔企等恬恬，實在盡得人驚，故所路項愛有人來做伴。𠊎兜對關西鎮赤柯山出發，兩子阿婆一路「叨叨叨叨」，講兜麼个𠊎早就毋記得了，淨記得有聲好做伴，心就較安定較毋會驚。
打早行在露水溼溼个山路，一路行行歇歇，𠊎又驚又好奇，目珠金金滿哪看。在路項有看著一大群鳥仔，在樹頂嘰嘰嘎嘎唱歌仔，乜看著澎尾鼠在樹仔中央躍過來躍過去，還有狗嫲蛇一頷一琢，緊摎𠊎頷頭，盡像係摎𠊎打招呼。行到山路尾，日頭已經行到大山背了。
記得吾婆用大手帕，包等幾隻番薯飯撚个飯糰，該係𠊎兩子阿婆一日个伙食。行悿了，就坐在樹下歇睏；肚枵了，就食一個飯糰；嘴燥時，就啉路脣好心人奉个茶。大大隻茶桶擺在路唇，面頂覆等一個碗，分過路人止渴。𠊎渟了一碗茶，咕嚕咕嚕啉落去，茶又涼又甘甜，直直透入心肝肚。
𠊎問阿婆：「路到底還有幾遠，愛行加幾久？」吾婆笑笑講：「肯行就會到。」
𠊎兜行了盡久盡久，行到日頭落山正到姑婆屋下。姑婆看著吾婆，歡喜到耐毋得，牽等手講盡多話，續等㓾雞捋鴨，煮一桌豐沛个菜。
行歸日个路，𠊎肚屎早就枵到變背囊了，鼻著雞湯个香味還較枵，正想愛食飯、啉湯該下，嗄看著湯兜肚盡多菜蟲浮浮冇冇，一下仔嗄毋記得肚飢。
該擺「得人驚」个畫面，到今想著，還會起雞嫲皮。這係𠊎這生人第一擺體會著：原來，大山肚分个「好味緒」，有時正經會分人一生人都毋會添放忒。
如今𠊎已經七十大零歲了，行山路个日仔乜盡少盡少了，毋過，逐擺若看著高高山，還有青油油个茶園，就像又轉到山肚該條老吊橋、食番薯飯糰，還有聽著吾阿婆「叨叨叨叨」摎𠊎講話个聲。
該種味緒，恬恬囥在吾心肝肚，久久乜毋會散。
華語
我依稀記得，小時候曾跟著奶奶到尖石石娘姑婆家作客。那時我和爺爺、奶奶住在關西赤柯山。那裡沒有金針花，只有一座老吊橋和層層山巒，遠遠望去，還有綠油油的茶園。
那天清晨，雞還沒啼，狗也沒吠，四周一片昏暗。奶奶牽著我的手出門，說要帶我去石娘姑婆家玩。一路上看不見半個人影，只見高大的樹木靜靜站立在山路旁，讓年幼的我有些害怕。幸好奶奶一路說話作伴，雖然內容早已忘記，但那熟悉的聲音，讓我安心不少。
清晨的山路滿是露水，我們一路走走停停。我既害怕又好奇，睜大眼睛四處張望。沿途看見成群鳥兒在樹梢歌唱，也看見松鼠在樹間跳躍；還有蜥蜴頻頻點頭，彷彿向我打招呼。等走到山路盡頭時，太陽早已移到山的另一邊。
奶奶用大手帕包著幾個番薯飯糰，那是祖孫倆一整天的乾糧。走累了就在樹下休息，餓了就吃飯糰；口渴時，便喝路旁好心人準備的茶水。大茶桶放在路邊，上面蓋著一只碗，供過路人解渴。我盛了一碗茶，大口喝下，茶水清涼甘甜，令人通體舒暢。
我問奶奶：「路到底還有多遠？」奶奶笑著回答：「肯走，就會到。」
我們走了很久很久，直到太陽下山才抵達姑婆家。姑婆見到奶奶，高興得不得了，拉著她說個不停，接著忙著殺雞宰鴨，準備一桌豐盛菜餚。
走了一整天山路的我，早已餓得前胸貼後背。聞到雞湯香味，更是飢腸轆轆。正當我迫不及待想喝湯時，卻看見湯面上漂浮著許多菜蟲。那一瞬間，我竟然忘了肚子餓，只覺得頭皮發麻。
直到今天，想起那幅畫面，仍會起雞皮疙瘩。那也是我第一次體會到：原來，大山給人的「好味道」，未必只是入口的滋味。有些味道，會化成記憶，讓人一輩子難以忘懷。
如今我已七十多歲，走山路的機會少了。但每當看見高山與茶園，彷彿又回到那條老吊橋旁，吃著番薯飯糰，聽著奶奶一路不停和我說話。
那種屬於童年的味道，始終靜靜收藏在心底，久久不散。
