文／黃志傑，大學生，桃園人，這下戴台中（四縣腔）
「屋愛朝朝掃，田愛日日到，書愛時時讀」，恁樣个諺語流傳了恁多年，到底做麼个頭擺人都恁重視讀書？讀書到底有麼个用呢？還有做人摎讀書有麼个相關咧？
最簡單來講，讀書就係為著分自家得著多一息知識，正毋會分人騙去。這下个科技發展緊來緊遽，逐日都有無共樣方式个詐騙發生，若係讀書、看新聞做得分大家人還較了解這隻世界發生个事情，𫣆（enˊ）俚就做得得著較多資訊，正毋會受害。
再過來，讀書讀書，讀書个內容，做得係西方科學牛頓這兜人个理論，乜做得係中國古老聖賢流傳千年个智慧。這兜都係智慧个傳承，分𫣆（enˊ）人在學習知識後，再過經過當多合作，發展全世界个文明。故所讀書，係為著自家，乜做得係為著歸隻人類社會。尤其，頭擺客家人有恁樣豐富个智慧，像係二十四節氣、師父話、價值觀這兜，都看得著老祖先經過了一生人个體會、觀察後，得著个結論。讀書分𫣆（enˊ）俚做得順著一條大路進前，帶等前人个養分共下向前行。
毋過就算讀了恁多書，𫣆（enˊ）俚還係愛記得「先做人，正讀書」這隻道理。俗話說：「前人種樹，後人乘涼」，生活在現下个時代，𫣆（enˊ）俚做得享受著个生活都係前一代人打拚下來个，一定愛知得感恩，乜愛知讀了再過多書，「人做正來」正係最重要、最基本、乜係最尾个目標。𠊎（ngaiˇ）个先生識同𠊎（ngaiˇ）講過：「做醫生毋使做一個名醫，毋過定著愛做好一個良醫。」絕對有厥个道理。在這時代，想愛做醫生愛通過當多个考試，盡難想像愛讀个書有幾多，還過愛摎這兜專業運用在救人，若係無摎自家做正，讀了再過多个書乜無意義了，諺語講：「一字值千金，千金難買聖賢心」就係講讀書當重要，毋過比讀書還較重要个係，愛識人情義理。
老古人言講：「一等人忠臣孝子，兩件事耕田讀書」，現在个時代較少有耕田人了，毋過讀書嗄係每一個人都做得著个，乜係為自家增加價值，這也係頭擺人傳下來个觀念，𠊎（ngaiˇ）試著有一句話堵好展現了歸篇文章个重點：「做人摎讀書係一生人个習慣」，毋單淨說明了客家人晴耕雨讀、重視教育个精神，乜講出𫣆（enˊ）理解做人个道理，正做得在社會上有自家个位所，再過延續到客家精神，正係百年个歷史當中，客家人共樣煞猛打拼，尋著在世界恁多文化肚个位仔。無論世界仰般仔來變化，客家精神个價值永久毋會變。
華語
「屋子要每天掃，田要每天到，書要時時讀」，這樣的諺語流傳了這麼多年，直到現在還是在強調讀書這件事，到底為什麼古時候的人都這麼重視讀書？讀書到底能有什麼用呢？而做人與讀書有什麼關係呢？
最簡單而言，讀書就是為了讓自己得到多一些知識，以至於不會受人拐騙。現今的科技發展日新月異，每一天都有不同方式的詐騙發生，如果讀書、看新聞能讓大家更加了解這個世界發生的事，我們就能得到更多的資訊，進而防止受害。
再者，讀書讀書，讀書的內容，可以是西方科學牛頓這些人的理論，也可以是中國古老聖賢流傳千年的智慧。這些都是智慧的傳承，讓人類能在學習知識後，再透過合作，發展全世界的文明。所以讀書，是為了自己，也可以是為了整個人類社會。尤其，以前客家人有著這麼豐富的智慧，舉凡二十四節氣、俗諺語、價值觀等，都看得到老祖先經過了一輩子的體悟、觀察後，所得出的結論。讀書讓我們能夠循著一條道路前進，帶著前人的養分一同前行。
不過儘管讀了這麼多書，我們還是要記得「先做人，才讀書」，俗話說：「前人種樹，後人乘涼」，生活在現在的時代，我們能享受到的生活都是前一代人為我們打拼下來的，一定要知道感恩，也要知道讀了再多的書，「端正自己的品格」才是最重要、最基本、也是最終的目標。我的老師曾經和我說過：「做醫生不必成為一個名醫，但是一定要做好一位良醫。」絕對有他的道理。在如今的時代，當醫生都要通過滿滿的考試，讀書量難以想像，還有要將這些專業應用在救人，如果沒有端正自己的品格，那讀了再多的書也沒有意義，諺語說：「一字值千金，千金難買聖賢心」正是說明了讀書固然重要，但比讀書更加重要的是，要懂得人情義理。
古諺說：「一等人忠臣孝子，兩件事耕田讀書」，現在的時代已經比較少有耕田人家了，但讀書卻是每一個人都能做到，也是為自己增加價值，這也正是古人傳承下來的觀念，我覺得有一句話能非常貼切的體現這整篇的文章：「做人和讀書是一輩子的習慣」，不僅說明了客家人晴耕雨讀、重視教育的觀念，也更是點明了我們理解做人的道理，才更能在社會上立足，再延續到客家精神，正是在百年的歷史當中，客家人依舊勤奮打拼，尋求在世界諸多文化中的一席之地。不論世界怎麼樣變遷，客家精神的價值始終不變。
