文／黃志傑，大學生，桃園人，這下戴台中（四縣腔）
臺灣係一個文化寶島，有原住民、外省人、學老人，還有𫣆（enˊ）客家人，毋過在這下个時代，看著个客家文化，聽著个客家聲音，像變少了，較毋輒看著了。對𠊎（ngaiˇ）來講，恁好个文化，𫣆（enˊ）有恁豐富个內容，若係無辦法好好傳承下去，該正經忒打爽了啦！
講著傳承，就一定愛知仰仔摎大家紹介，像「唐山過台灣，沒半點錢」恁仔个歷史人人都知，還係客家人有感恩惜福个心，三十暗晡食團圓飯乜係希望感謝天公摎土地分大家過一隻好年。講著節慶，乜做得聽𠊎（ngaiˇ）兜客家文化故事「女媧補天」還有客家天穿日，乜代表了𫣆（enˊ）客家老古人个智慧，像係性別平等、環境保護、「有做無做，尞到天穿過」个休養歇睏个價值觀。故所恁多个文化，到底愛對哪位來講起呢？
𠊎（ngaiˇ）有一只經驗想愛同大家來分享，在上擺避暑，𠊎（ngaiˇ）分人甄選著客家青少年國際事務訪問團，代表客委會去到了紐西蘭、澳洲，同大家宣揚客家个文化，在行前訓練个時節，大家都在該想，到底愛仰仔摎大家來紹介呢？最尾就想著用「表演」个方式𫣆（enˊ）俚辦一齣20分鐘个客家戲劇，摎大家紹介𠊎（ngaiˇ）兜个文化。
𠊎（ngaiˇ）先用客家棚頭來紹介𫣆（enˊ）俚个團員。續下來有團員會布袋戲，看著佢用手巴掌大个人公仔表演仰仔划龍船，這乜係𫣆（enˊ）俚个文化，還有人會唱客家山歌，該聲音一出去，歸隻間房个人心情都變到鬆爽了起來，這乜係𫣆（enˊ）俚个文化，𠊎（ngaiˇ）兜摎佢串起來，最重要个，就係用客語，再過摻一息仔英文來表演，台下个人緊在該拍手，客家鄉親看著自家个文化分𠊎（ngaiˇ）這兜後生人表演到恁好，心肝肚乜試著當歡喜，還有當大个幸福感。
故所𫣆（enˊ）俚个文化到底愛對哪位開始紹介呢？𠊎（ngaiˇ）想毋使像上課恁樣，一隻字一隻字講分人聽，像𠊎兜共樣，後生人乜做得表演分大家聽，講分別人聽，恁樣係𫣆（enˊ）俚个文化大家乜還較做得來認識佢，像恁樣个表演，有歷史、有節慶、有文化、有特色……麼个都有，還特別生趣，仰會有人毋好呢？
故所後生人還較愛好好講客，做一擺好好摎𫣆（enˊ）俚个內涵表現出來，乜係一種當好个紹介客家个方式。
華語
臺灣是一個文化寶島，有原住民、外省人、閩南人、還有我們客家人，不過在現在時代的發展來，看到的客家文化，聽到的客家聲音，好像變少了，比較不常看到了。對我來說，這麼好的文化，我們有這麼豐富的內容，如果沒辦法好好傳承下去，那真是太可惜了。
講到傳承，就一定要知道怎麼向大家介紹，像「唐山過台灣，沒半點錢」這樣的歷史人人皆知，還是客家人有感恩惜福的心，除夕吃團圓飯也是希望感謝天公跟土地讓大家過一個好年。講到節慶，也可以聽我們客家文化故事「女媧補天」，還有客家天穿日，也代表了我們客家老古人的智慧，提及了像是性別平等、環境保護、「有做沒做，放到天穿過」的休養生息……的價值觀。所以這麼多的文化，到底要從哪裡來講起呢？
我有一個經驗想跟大家分享，在上次暑假，我被甄選上客家青少年國際事務訪問團，代表客委會去到了紐西蘭、澳洲，跟大家宣揚客家的文化，在行前訓練的時候，大家都在想，到底要怎麼向大家來介紹呢？最後就想到用「表演」的方式，我們辦一個20分鐘的客家戲劇，跟大家介紹我們的文化。
我先用客家打竹板跟大家介紹我們的成員。接下來有團員會客家布袋戲，看到她用手中的布偶表演如何划龍舟，這也是我們的文化。還有人會唱客家山歌，那個聲音一出去，整個房間的的人心情也變得放鬆了起來，這也是我們的文化。我們把它串起來，最重要的，就是用客語再摻一些英文把他表演出來，台下的人不停鼓掌，客家鄉親看到自己的文化被我們這些年輕人表演的這麼好，心裡也覺得很開心，還有很大的幸福感。
所以我們的文化到底要從哪裡介紹起來呢？我想不用像上課一樣，一個字一個字講給別人聽，像我們一樣，年輕人也可以表演給大家看，講給別人聽，這樣是我們的文化，大家也更能來認識它，像這樣的表演，有歷史、有節慶、有文化、有特色……什麼都有！還特別有趣，怎麼會有人不喜歡呢？
因此年輕人更要好好講出客語，一次把我們的內涵表演出來，也是一種很好介紹我們客家文化的方式。
