文／羅烜淳，環境工程師，苗栗公館鄉人，這下戴台中（四縣腔）

講著客家美食你會想著麼个？略下人就會想著覆菜抑係炒肉。𠊎有朋友毋係客人，毋過佢兜頭擺食著客家美食个反應就係：阿姆哀！該種柑仔色个醬係麼个啊？仰會恁好食！𠊎聽著這句話就知佢兜在該講桔醬，因爭這係客家庄正有个醬，故所聽著佢兜毋係客人嗄恁好，試著當沙鼻。

在吾屋家，逐隻月初一摎十五會去拜伯公，拜忒轉來阿婆定著會剁雞盤，逐擺𠊎就會在脣項跍等，等等愛食煠好个雞肉，食起來燒燒又當嫩，想著就會流口涎水。阿婆看著𠊎跍到脣項，就會先喊𠊎去拿幾下隻一斤摎兩斤个油紙袋仔，然後飼𠊎食正剁好个雞肉，正經係盡幸福个事情。

這下逐隻禮拜轉去苗栗，阿婆朝晨去拜伯公轉來，定著會買伯公脣項个餐車賣个水粄仔轉來，有鹹个摎甜个。可能較多人好食甜个，逐擺去買，頭家娘就講：「甜个賣忒了，伸到鹹个了。」𠊎乜識食過甜个，係烏糖口味个，試著毋會昶甜當好食。毋過還係慣食鹹个，水粄仔頂項加頭家娘自家炒个豆腐干摎快菜，正過倒豆油，細細一碗就做到食當飽。

講著客家美食，當然還會想著粢粑仔，𠊎當少食著粢粑仔，單淨過年抑係跈阿婆坐遊覽車去進香个時節正會食著。吾老弟盡好食粢粑仔，有成時舅婆會自家做粢粑仔分阿婆帶轉來屋家，阿婆一問講麼人愛食粢粑仔，老弟定著走第一，既經拿好筷仔在該等等了，動作有影當遽，阿婆一摎粢粑仔放在桌項，吂過五分鐘，看該盒粢粑仔既經一半就分老弟食忒了，正經無看過恁好食粢粑仔个人。這下過年時節去屋家附近个廟項拜拜，老弟定著還係會食幾下碗粢粑仔，食忒粢粑仔還會去舀米篩目來食。食忒粢粑仔正過食米篩目，就當像食忒正餐愛食點心，少一樣就做毋得。

這下在台中做事，在街路項當少聽著客話乜較少賣客家菜个餐廳，台中个客庄（東勢、石岡）駛車仔最少愛一點鐘正做得到，對無車仔个人來講正經較少機會會去到該片。故所客家美食對𠊎來講就係一種屋家个味緒。「有客家美食个地方，正係吾屋家」。

華語

說到客家美食你會想到什麼呢？大部分的人第一時間都想到福菜或是客家小炒。身旁不是客家人的朋友在他們第一次吃客家美食之後，給我的反應都是：天哪！那個橘色的醬怎麼這麼好吃阿！那是什麼醬？我聽到這馬上就知道他們說的是橘桔醬，真的是身為客家人的一個驕傲。很有成就感！正因為這是客家庄才有的沾醬，聽到非客家朋友的喜愛覺得特別驕傲。

在我們家，每個月初一十五都會去拜拜，拜拜完奶奶一定會將拜好的雞肉剁成一盤，每次我都會在旁邊蹲著，等著吃燙好、剛剁好最新鮮的雞肉，不燙口又很嫩，一想到這口水都要流下來了。奶奶看到我蹲在旁邊，就會先要我去拿幾個一斤或是兩斤的塑膠袋，等將要留下的雞肉裝好後，再餵我吃剛剁好的雞肉，這真的是非常幸福的事情。

現在每個禮拜回苗栗，奶奶早上去伯公廟拜拜回來，一定會買廟旁餐車賣的碗粄，有鹹的也有甜的。可能是比較多人喜歡吃甜的口味，每次去買的時候老闆娘都說：「甜的賣完了，剩下鹹的。」我也有吃過甜的口味，是黑糖口味的碗粄，不會太甜很好吃。不過我還是習慣是鹹的口味，碗粄上面加上老闆娘自己炒的豆干跟韭菜，再淋上醬油，小小一碗就可以吃得很飽。

說到客家美食，當然還會說到麻糬囉，我很少吃到麻糬，只有在過年或是跟奶奶搭遊覽車去進香的時候才會吃到。我弟弟很喜歡吃麻糬，有時候舅婆會自己做粢粑仔讓奶奶帶回家，只要奶奶一問說有誰要吃麻糬，弟弟一定衝第一，而且是已經拿好筷子在旁邊等著了！動作果真超快，奶奶一把麻糬放在桌上，不到五分鐘，看那盒麻糬已經剩下一半了，真的沒看過這麼愛吃麻糬的人。現在只要過年去走春，弟弟一定會吃好多碗的麻糬，吃完麻糬還會接著吃米苔目。吃完麻糬再吃米苔目，就好像吃完正餐一定要吃點心才算完整的一餐，少一樣都不行。

現在在台中工作，在市區很少能聽到客家話也很少賣客家菜的餐廳，台中的客家庄（東勢、石岡）開車至少都要一個小時才能到，對一個沒有車的人來說真的很少機會能去那邊。所以客家美食對我來說就是一種家的味道。「有客家美食的地方，才是我的故鄉」。