周六補班補課別傷心　周末夜晚客庄活動讓你嗨翻天！

2023年02月02日

1
2023.02.02-13.25.05-S
2023.02.02-13.25.05-S

00:00

這禮拜六愛補班補課个消息

【苗栗西湖海陸腔／蘇佑昇】提醒鄉親這禮拜六2月初4，還愛補班補課，大家愛記得去上班上課，因為拜六係補正月27个春節連假初六个假期。另外，這隻月2月18也愛補班補課，因為2月28个和平紀念日係在平常日个拜二，所以徙2月27這日來調整放尞，恁樣鄉親正做得從2月25一路放尞，放到2月28這4日。

毋過，當多鄉親想到拜六還愛上班上課心情有兜無舒爽，毋過無關係，因為這禮拜六還有拜日个暗晡夜有一系列个活動，做得分鄉親去參加，像係2月初4拜六從下晝4點起勢个「臺中新丁粄節」、2月初4拜六從下晝5點起勢个「苗栗火旁龍之夜」還有2月初5拜日從下晝6點20分起勢个「台灣燈會在台北」這乜係相隔23年之後，台灣燈會做得轉來台北舉辦个大型燈會，歡迎鄉親朋友拜六下班下課之後，做得來參加這兜鬧熱个活動！

【苗栗火旁龍】火旁龍25週年炸翻苗栗　週末超震撼炮仗威力等你來體驗

【圖輯】快來搶先看兔兔、台北101光雕秀！　台灣燈會睽違23年重返台北

臺灣股票个消息

米國股票4大指數收漲，所以台灣股票今晡日起價超過1百點，指數早盤高點有到1萬5571.14點，毋過盤中金融類个股票指數有幾下擺跌價，造成大盤回到15500點个關卡，毋過之後在台積電這兜電子股票个加持之下，指數有守起來在15500點頂高。到咧當晝12點零，台灣股票加權指數來到15590.26點，起價167.63點，成交價值超過新台票1473億3仟5百萬個銀。

目前電子類个股票台積電盤中最高起價12箍，來到542箍，也帶動半導體類个股票，加上聯發科韶早就愛召開法人个說明會，所以聯發科个盤中最高點有挷高到753箍，漲幅超過百分之4。

另外，面書（Fecabook）个公司Meta按算花400億美圓買轉來庫藏个股票，所以鼓勵著meta大起價將近百分之20，台灣有做元宇宙概念个宏達電股票早盤也大起價到漲停盤66.9箍，以上股票个訊息做得提供分有投資股票个鄉親參考。