文／鍾孝昇，國小教師、中壢客家人，這下戴中壢（四縣腔）
今年避暑，𠊎去到馬來西亞遶尞，參觀當地个客家博物館，過摎館長孔菊華大姊見面。孔館長盡詳細摎𠊎紹介南洋特色个客家文化，分𠊎認識並感受著馬來西亞客家鄉親个熱情。在知得佢兜愛組團，參加今年九月在臺灣舉辦个客家博覽會後，𠊎邀請佢兜來𠊎个家鄉–桃園，渡佢兜去尞，招待佢兜。故所，這由𠊎這個民間朋友帶路个活動，變做佢兜來到臺灣个第一隻行程。
九月廿三，孔館長來到臺灣个頭暗晡，𠊎帶等佢兜去參觀中壢盡大个客家花布行。大家都知，花布係盡有客家特色个工藝品，馬來西亞鄉親在這位，毋單淨看著各式各樣个傳統花布，還過發現當多新色个花布樣式。頭家表示客委會摎藍染、紙遮仔還有油桐花這兜元素，設計做九種个布料花紋，提供社會大眾免費使用，推廣客家文化。佢兜在布店項揀揀擇擇，買了當多花布，對這間布店當阿腦。
做麼个孔館長會特別指定愛參觀客家花布行呢？原來馬來西亞客家博物館係孔館長私人經營个，為著愛分博物館加添較多个客家元素，佢決定愛在有限个經費中，摎館肚廳下个凳仔全部換做客家花布个落仔，故所喊𠊎定著愛帶佢兜去客家花布店。孔館長為著愛推廣客家文化，實在當用心。
花布買好咧，𠊎兜行到中壢盡有名个菜包店，試食菜包、發粄、艾粄這兜客家米食。孔館長表示馬來西亞乜有當相像个粄，安到「菜粄」，佢个外表摎臺灣菜包共樣，都有軟韌个粄皮，毋過，裡背有包韭菜、豆腐乾、蒜仔、菜脯絲這兜料仔，馬來西亞个客家人慣摎菜粄準朝食。孔館長講：「不管係臺灣菜包，抑係馬來西亞个菜粄，都有一種傳統个味緒，都係客家先民流傳下來个珍貴資產。」
續等幾日，佢兜參加客家委員會舉辦个「全球客家文化會議」，乜參訪世界客家博覽會个展區。這擺用「Travel to Tomorrow 天光日个客家」做主題个博覽會，展現客家人遷徙到世界各地，發展出个多元面貌，乜分馬來西亞客家鄉親，看著身為客家族群个光榮。
在台灣个最尾一日，孔館長邀請𠊎兜，共下參加苗栗頭屋社區發展協會辦个聯誼餐會。協會準備當多餳人个客家料理分來賓食罅胲，有剁雞盤、鹹菜湯、四炆四炒這兜菜色。還過社區个阿姨、小朋友表演客家歌謠、舞蹈，展現臺灣人个好客。佢兜在這鬧熱煎煎个餐會，暢靂靂仔度過這隻盡有意義个暗晡。
在餐會當中，摎𠊎共下來个邱新春先生，隨手寫了一段四句聯，過用優雅个客語誦讀，得著大家个掌聲。這四句係恁樣寫个：「歡迎芙蓉孔會長，客家鄉親共一堂，頭屋宮前來相聚，文化傳承愛發揚。」這當有深意个四句聯，毋單淨表達出客家鄉親个友誼，乜摎這擺个台馬客家文化交流，留下圓滿个成果。
這擺馬來西亞鄉親來到臺灣，除忒有官方个行程，還因為有了𠊎這个民間朋友个加入，嗄變到過較特別。客家文化乜在恁樣个過程當中，得著交流摎傳承。人講「千年榕樹共條根，世界各地有客人，雖然一時無見面，一語能通萬里情。」這句話斷真毋會差。
華語
今年暑假，我去到馬來西亞旅遊，參觀了當地的客家博物館，並與館長孔菊華大姐見面。館長很詳盡的向我介紹南洋特色的客家文化，讓我認識並感受到馬來西亞客家鄉親的熱情。在得知他們將組團，參加在今年九月在台灣舉行的客家博覽會後，我邀請他們來我的家鄉—桃園，帶他們四處走走，招待他們。於是，這由我這個台灣民間友人所帶領的活動，成為他們來到台灣的第一個行程。
九月廿三日，孔館長來到臺灣的第一晚，我帶著他們參觀中壢最大的客家花布行。眾所周知，花布是最有客家特色的工藝品，馬來西亞鄉親在這裡，不僅看到了各式各樣的傳統花布，更發現了許多新式的花布樣式。老闆表示客委會將藍染、紙傘以及油桐花這些元素，設計成九種布料花紋，提供給社會大眾免費使用，藉以推廣客家文化。他們在布行中精挑細選，買了許多花布，對於這間布店讚不絕口。
為什麼孔館長特別指名要參觀客家花布行呢？原來馬來西亞客家博物館是由孔館長私人經營的，為了讓博物館增添更多客家元素，他決定要在有限的經費中，將館內大廳的椅子，全部更換為客家花布的椅套，因此要我一定要帶他們去客家花布行。孔館長為了推廣客家文化，實在很用心。
採買完花布後，我們移步到中壢最有名的客家菜包店，品嘗菜包、發糕、艾粄等客家米食。孔館長表示馬來西亞也有很像的米食，稱之為「客家菜粄」，它的外表跟台灣菜包一樣，都有軟Q的粄皮，不過裡面包韭菜、豆腐塊、蒜苗、蘿蔔絲等配料，馬來西亞的客家人習慣把客家菜粄當早餐吃。孔館長說：「不管是台灣的客家菜包，還是馬來西亞的客家菜粄，都有一種傳統的味道，都是客家先民流傳下來的珍貴資產。」
在隨後的幾天，馬來西亞客家鄉親參加了客家委員會舉辦的「全球客家文化會議」，也參訪了世界客家博覽會的各個展區。這個以「Travel to Tomorrow 天光日个客家」為主題的博覽會，展現客家人遷徙至世界各地，發展出的多元面貌，也讓馬來西亞客家鄉親，看見了身為客家族群的自信。
來台的最後一日，孔館長邀請我們，一同參加由苗栗頭屋社區發展協會，舉辦的聯誼餐會。協會準備了許多吸引人的客家佳餚，給來賓吃個盡興，包括了剁雞盤、鹹菜湯、四炆四炒這些菜色。更由社區媽媽、小朋友表演了客家歌謠、舞蹈，展現了台灣客家人的好客。他們在這熱鬧的餐會中，快樂地度過了一個很有意義的的夜晚。
在餐會當中，與我一同隨行的邱新春老師，即興寫了一段四句聯，並用優雅的客語朗讀，獲得全場的掌聲。這四句聯這樣寫到：「歡迎芙蓉孔會長，客家鄉親共一堂，頭屋宮前來相聚，文化傳承愛發揚。」這充滿深意的四句聯，不但表現出客家鄉親的友誼，也為這次的台馬客家文化交流，留下了圓滿的成果。
這次馬來西亞鄉親來台灣，除了有官方的行程，還因為有了我這個民間友人的參與，而更顯特別。客家文化也在這樣的過程中，得到了交流與傳承。人說「千年榕樹共條根，世界各地有客人，雖然一時無見面，一語能通萬里情。」這句話確實有道理。
