文／鍾孝昇，中壢客家人，這下戴中壢（腔頭：四縣腔）
講著刺泡仔，大家定著會想著个，應該就係苗栗大湖。毋過，係講著仙草，你又會想著哪位呢？無毋著，𠊎想你个答案定著是𠊎个故鄉——新竹關西。
今晡日係十月最尾一隻禮拜六，利用放尞日轉老屋个時節，𠊎順續來到牛欄河南山大橋，欣賞橋脣田項，開到靚膩膩个仙草花。𠊎企在遠遠看，一下仔還尋毋到仙草花在哪。毋過，行近兜仔，黏時歸片吊菜色个花，就在面前暴出來。在秋日分溫柔个日頭花晟等，仙草花特別餳人。故所𠊎在這位，一企就歸點鐘，慢慢仔欣賞這片毋摎人相爭个仙草花。
關西係全台灣仙草產量打頭名个所在，逐年仙草乾个產量大約有一百二十萬台斤，佔全台總產量个五股四。故所，無論係大賣場，抑係傳統市場，係講著愛賣仙草，頭家个招牌項，一定會寫等「關西」這兩隻字，正做得餳人來交關。「仙草」做得講係最有資格代表關西，代表客家个農作物。
逐年三月中到清明前，耕種人就陸陸續續開始種仙草，經過半年个成長，對白露到中秋之間就會來採收仙草。等到秋冬相交該央時，耕種人就會摎仙草拚拚忒，等到明年二、三月，正過插仙草莖，故所頭擺異少看到田項有仙草開花个情形。
仙草仰愛在八月半前就來採收呢？這係因為仙草等到開花後正來摘，厥營養都無忒哩，煮出來个仙草茶無味無緒，又毋會醹，故所耕種人會在八月半，花還吂開以前就來採收。又過因爭秋天天時較燥，新竹地區九降風吹到咻咻滾，毋使兩三日就摎仙草曬著燥燥，毋單淨當省工，吹過風个仙草乾還有一種特別个味緒呢。
這幾年，因為休閒農業越來越時行，故所當多地方就會舉辦欣賞仙草花个活動。像桃園市政府在楊梅上湖、伯公岡地區舉辦了幾年鬧熱煎煎个「桃園仙草花節」。苗栗縣獅潭鄉公所今年乜愛在11月19、20日舉辦「2022獅潭仙草花節」，可見這摎法國普羅旺斯，抑係日本北海道當相像个吊菜色夢幻莊園，實在當受著大家歡迎。
關西既然係仙草个故鄉，在這位定著有當多摎仙草有關个位所做得遶尞。像關西鎮農會在交流道附近有一隻仙草加工廠，研發各種个仙草加工產品，過在邊脣成立「新農民市場」，餳著當多人來這買東西。在水母娘廟附近，乜有一間關西仙草博物館，毋單淨提供當多種仙草个產品分人試食，還有仙草DIY个活動分人體驗，感受做仙草个趣味。
企在南山大橋項，𠊎面向眼前這坵開了淰淰仙草花个田地，聽著牛欄河潑拉潑拉个水聲，心肝肚試著當鬆爽。聽講這坵田有一隻異神氣个名仔——「仙草一分田」，係關西鄉土文化協會个成員，用自然農法共下來種个，要分大家了解自然農法个課程。
𠊎想，這又分人喊著「仙人草」个植物，本旦就有當多个功效，今這下，又還過用天然个方式來種，定著對人體健康有過較好个幫助。大家有機會，一定愛來關西，試看啊這仙人特別恩賜分凡人个寶，乜來感受這客莊優美个自然環境。
華語翻譯
講到草莓，大家一定會想到的，應該就是苗栗大湖吧。不過，若是說到仙草，你又會想到哪裡呢？沒有錯，我想你的答案，一定是我的故鄉——新竹關西。
今天是十月的最後一個禮拜六，利用假日回老家之際，我順便來到了牛欄河上的南山大橋，欣賞橋邊田中央，開得美麗又漂亮的仙草花。站在遠遠的地方看，頓時還找不到花在哪？不過走近點瞧，一下子，一大片紫色的花蕊，就在你面前爆發開來。在秋天柔軟的日光照映下，仙草花特別吸引人，因此我在這裡，一站就是一個鐘頭，慢慢地欣賞這片與世無爭的仙草花。
關西是全台灣仙草產量第一名的地方，每年仙草乾的產量大約有一百二十萬台斤，佔全台灣總產量的五分之四。因此不論是大賣場或是傳統市場，若是說到要賣仙草，老闆的招牌上，一定會寫著「關西」這兩個字，才能夠吸引人來此惠顧，仙草可以說是最有資格代表關西，代表客家的農作物。
每年三月中到清明前，農夫們就陸陸續續開始種仙草，經過半年的成長，從節氣白露到中秋之間，就會來採收。等到秋冬相交之際，就會將它們整個清理掉，等到來年二、三月再來進行定植的農事，因此以前幾乎很少看到田裡有仙草開花的情形。
仙草為什麼要在中秋節前就要採收呢？這是因為若等到仙草開花之後才來採收的話，它的營養幾乎全都沒了，不但煮起來的仙草汁沒有味道，也不夠濃稠，因此農夫會在中秋節前，花還沒開之時，就來採收仙草葉。也因為秋天天氣比較乾燥，新竹地區的九降風颼颼地吹拂著，不用兩三天，就能夠將仙草曬到十分乾燥，不只能夠省掉勞力，風吹過的仙草乾，還有一種特別的味道呢。
這幾年，因為休閒農業越來越流行，因此有許多地方都會舉辦欣賞仙草花的活動。像桃園市政府在楊梅上湖、富岡地區，已經連續舉辦了好幾年，非常熱鬧的「桃園仙草花節」。苗栗縣獅頭鄉公所，今年也要在11月19 、20兩日，舉辦「2022獅潭仙草花節」，可見這與法國普羅旺斯和日本北海道相似的紫色夢幻莊園，實在是非常受到大家的歡迎。
關西既然是仙草的故鄉，在這裡一定有許多和仙草有關的地方可以參觀。像關西鎮農會在交流道附近，就有一個仙草加工廠，專門研發各種的仙草加工產品，還在旁邊成立了「新農民市場」，吸引了許多人來這裡買東西。在水母娘廟附近，也有一間「關西仙草博物館」，提供許多仙草的產品讓人試吃，還有仙草DIY的活動讓人體驗，感受做仙草產品的樂趣。
站在南山大橋上，我朝著眼前這開了滿滿仙草花的田地，聽著牛欄河嘩啦嘩啦的水聲，心裡感到非常的輕鬆愜意。聽說這一畦田地有一個很神奇的名字叫做「仙草一分田」，這是關西鄉土文化協會的成員，利用自然農法一起來耕種的，要讓大家了解自然農法的課程。
我想這又被人稱作「仙人草」的植物，本來就有相當多的功效，這下子還用了天然的方式來種植，一定會對人體健康十分有幫助。大家有機會一定要來關西，試試看這仙人特別恩賜給凡人的寶藏，也來感受這客莊優美的自然環境。
