文／謝宜庭，桃園客家人（四縣腔）
「卡滋、卡滋」嘴空肚該脆脆个餅仔，緊噍緊香，𠊎任想乜想毋著仰會有恁有味緒个美夢；「這餅仔仰恁好食啊！」目珠眨等，𠊎睡到迷迷痴痴，分毋清係在該發夢抑係正經有餅仔好食，半睡半醒个𠊎嘴擘到大嫲隻，還過在心肚愐：「啊～，過分𠊎食一口，𠊎還愛食餅仔啦！」𠊎耳公脣響起一陣一陣笑聲，𠊎目睡摸些還看毋真係麼人在該笑，嘴空黏時又分人窿一垤餅仔落來，啊哦，正經有餅仔食，𠊎毋係發夢哪！
遽遽對眠床跋䟘起來，頭那毛還鬞交交仔，面頰卵還有印著草蓆个跡，嘴角還有口涎水吂捽，吾目珠煞煞擘開來看，原來係阿哥同老妹兩儕，佢兜跈阿姆去街項買𠊎盡好食个「金牛角餅仔」轉來分𠊎食，佢兩儕看著𠊎還在該睡當晝，就「好心」來飼𠊎食餅仔，𠊎緊擘嘴擘鼻緊噍餅仔，想著頭下睡等還會食餅仔，自家乜試著好笑，忍毋得同佢兜共下笑到揇肚屎。
還記得老妹細細時節，三不二時睡目睡到半夜好恬恬仔會蹶䟘起來，佢毛披披仔、目珠眨等，自家定定仔對間房行到廳下，𠊎兜係還吂睡目，乜會共下看老妹到底在該搣麼个，𠊎看到目珠擘到大大隻、心肝哱哱跳，阿姆講佢在該發目睡狂，係無麼个危險就莫喊佢，由在佢愛行到哪。
有一日暗晡，老妹又開始發目睡狂了，𠊎兜乜係恬恬仔企在邊脣看，老妹先對矮凳仔頂項慢慢仔行，續下來尋著高高个長凳仔，對頭行到尾還想愛過行往上，看等強強會行上去桌頂哩，仰結煞正好呢？阿爸看勢頭毋著，緊拚拚仔過拉一張長凳仔過來分佢行，老妹三步做兩步就行透哩；佢行到驚驚險險，𠊎乜看到心寒膽顫，驚佢會跌下來；𠊎仰仔就愐毋出，佢目珠又無擘開，行在該高又過狹个長凳板頂背仰毋會跌到四腳惹天呢？人講：「老戲跌落棚－難免」，老妹嗄毋識跌落凳下，𠊎試著佢實在比該老戲骨還較慶哪。老妹逐擺就恁樣在廳下行過一輪又一輪，有過願哩，就會自家乖乖仔行倒轉去眠床搵等，過一下仔就睡到毋知人哩。三更半夜搣到歸屋下人比看電影還較緊張刺激，第二日睡醒佢自家嗄毋記得淨淨，又有麼人奈得何。
人生有時節就像一場夢樣仔，真真假假、虛虛實實，有時節愛清醒，有時節愛詐毋知仔；時間像長流水樣定定仔、慢慢仔流過，從來毋識為麼人停跎，乜無可能倒轉去；毋多知仔，一𥍉目幾十年就過忒了，𠊎兜四姊妹有人早早就過身了，有人打逆面過後就無來往了，有人逐日無閒洎杈、罕得聯絡；𠊎盡懷念个，還係大家細細該下，該種和和挼挼、單純又快樂个感情，毋過這下嗄淨伸一隻夢哩！
華語
卡滋、卡滋」嘴裡那脆脆的餅乾，越嚼越香，我怎麼也想不出怎麼會有這麼有味道的美夢；「這餅乾怎麼這麼好吃啊！」眼睛閉著，我睡得迷迷糊糊，分不清自己是在做夢還是真的有餅乾吃；半睡半醒的我嘴巴張的大大的，還在心裡想； 「啊～再讓我吃一口，我還要吃餅乾啦！」耳邊響起一陣一陣的笑聲，我睡眼惺忪還看不清是誰在笑，嘴裡馬上又讓人放進一塊餅乾，唉唷，真的有餅乾吃，我不是在做夢耶！
趕緊從床上爬起來，頭髮亂七八糟的，臉頰上睡到有草蓆的痕跡，嘴角還有口水還沒擦，趕忙將眼睛張開一看，原來是哥哥和妹妹兩個人，他們跟媽媽去街上買了我最愛吃的「金牛角餅乾」回來給我，他們倆看到我還在睡午覺，就「好心」來餵我吃餅乾，我邊打呵欠邊吃餅乾，想到自己剛才睡著還會吃餅乾，自己也覺得好笑，忍不住跟他們一起捧腹大笑。
還記得妹妹小時候，常常會在床上睡覺睡到半夜，卻自己爬起來，披頭散髮、眼睛閉著，自己慢慢地從房間走到客廳，我們如果還沒睡覺，也會一起看妹妹到底在搞什麼，我看到眼睛睜的大大的、心肝也蹦蹦跳，媽媽說她在夢遊，如果沒什麼危險就不要喊醒她，隨她要走到哪就走到哪。
有天晚上，妹妹又開始夢遊了，我們也是靜靜的站在旁邊看，妹妹先從矮凳子上慢慢的走過，接下來又從高高的長板凳走上去，從頭走完還想要再往上走，眼看幾乎快要走上桌子了，要怎麼辦才好啊？爸爸看狀況不對，趕緊又拉來一張長板凳讓她走，妹妹又三步做兩步走過了；她走的驚險，我也看得膽心受怕的，很怕她會跌下來；我怎麼想都想不出，她眼睛又沒張開，走在那又高又窄的長板凳上，怎麼就不會摔的四腳朝天呢？古人說：「經驗再老到的演員跌下舞台都在所難免」，妹妹卻從來不曾跌下來過，我覺得她真的比那些老演員還厲害耶。妹妹每次就這樣在客廳走過一輪又一輪，過癮了，就會自己乖乖走回去床上窩著，過一下子就睡的安安穩穩，不醒人事。晚上弄得全家比看電影還緊張、刺激，第二天睡醒她自己卻一點也不記得，誰又拿她有辦法呢。
人生有時候就像一場夢，真真假假、虛虛實實，有時候要清醒一些，有時候要睜一隻眼閉一隻眼；時間似長流水慢慢的流過，從來不會為誰停下，更不可能倒轉；不知不覺一眨眼幾十年就過去了，我們四個兄弟姐妹中，有人早早就過世了，有人吵架翻臉後就不再往來了，有人每天都非常忙碌也難得聯絡；我最懷念的，還是大家小時候，那種和和氣氣、單純又快樂的情感，不過現在卻只剩一個夢了！
