文/李秀琴,苗栗客家人,中小學客語先生,這下戴台南市(腔頭:四縣腔)
海底世界毋單淨有繽紛多彩个珊瑚樹林,還有長溜溜仔个海草隨等海流搖啊搖。日頭花對海面項箭下來,同靚靚个海底世界晟到金晶積亮。
一群熱帶魚在珊瑚樹林肚搞囥人尋,「一二三四五六七八九十,𠊎愛開始尋哩喲!」做鬼个細魚仔正講啊煞,其他个熱帶魚煞煞尋好位所囥核核,連尾都毋敢拂!單淨伸一尾白色間等柑仔色个細魚仔阿平還吂囥好勢,佢斡頭看著珊瑚樹脣大海龜阿秋在該睡目,緊拚拚仔「咻」一下泅過去,囥在大海龜个手脥下,尾嗄無囥好,分鬼抓著!兩尾魚仔就恁樣在大海龜阿秋个脣口唩唩喊喊!
阿秋分冤家聲吵醒,探頭看啊:「阿平啊!又係你這隻蠕屎蟲!」本旦在該打潑賴个阿平講:「𠊎無愛搞咧!龜仔阿公,您講故事分𠊎兜聽啦!」
「呵呵呵,好哩!」講煞,其他个熱帶魚全部聚揫,阿秋目瞇瞇仔講起了三十年前个該一日……。
「正對龜卵孵出來个𠊎,對濕潤个沙肚跋出來,烈烈个日頭花晟啊過來,𠊎目珠眨啊眨,這係𠊎第一擺看著晟眼个日頭。𠊎探頭望,頭前有當多同𠊎共樣个細海龜,用細細幼幼个腳煞猛牯仔對大海爬過去。
𠊎正想愛起腳行,𢫦𢫦風天頂一陣烏雲像星仔瀉屎樣仔「咻~」个飛過來,還緊飛緊低,竟然同爬在頭前个細龜仔觜去天頂!『該係麼个呀?』著驚个𠊎遽遽囥在石縫肚看真啊。原來該係歸大陣个海鳥!佢兜遠遠就鼻著細海龜个味緒,全部飛過來,一隻海鳥觜一隻細海龜!正對龜卵爬出來个細海龜淨知四隻腳緊撥,哪有力頭來反抗?𠊎分頭前得人驚个光景嚇到愊愊掣!
海水激來激去个聲音,鹹鹹个味緒,親像緊在該喊:阿秋遽遽來啊!
𠊎高不將齧等牙根起腳爬,拚命牯个對大海爬去。異無簡單閃過幾隻惡豺豺仔个海鳥,大海越來越近了……。忽然間「喀!」一聲,一隻大大个夾仔對𠊎夾過來,「哎唷!」𠊎嚇到倒退兩步。蛤?毛蟹乜來搶食細海龜!橫等行个大毛蟹,目抌抌仔擎等大夾仔對等𠊎逐過來!
「這下就死無命了!上有海鳥,下有毛蟹!仰去海肚个路恁難行?」𠊎个目汁強強就會跌下來了。高擎擎仔个大夾仔又來到面前,𠊎正喊一聲「阿姆哀呦!」圓身就飛起來了!
「毋使驚,𠊎救你!」一个後生人同𠊎放在厥手項揞等,閃過惡豺豺仔个海鳥摎毛蟹,行到海脣。佢緊行緊對𠊎講:「𠊎看著你盡命牯个爬,分𠊎當感動。淨有堅持毋放棄,生命正有出路啊!加油,愛好好仔長大哦!」後生人輕輕仔同𠊎放入海水裡肚。正泅入大海个𠊎,遠遠看著後生人又行轉沙壩了……。」
「該個後生人還有愛心啊!」熱帶魚阿平講:「係無𠊎哪有機會同龜仔阿公相識呢?有機會𠊎乜愛伸手同別儕相𢯭。」大海龜阿秋笑了。
海水激啊激仔,親像在該講永久毋會煞棚个古……。
華語
海底世界不僅有繽紛多彩的珊瑚礁,還有又長又滑的海草隨著海流搖啊搖。陽光從海面上照射下來,把美麗的海底世界映照的亮晶晶。
一群熱帶魚在珊瑚礁裡玩捉迷藏,「一二三四五六七八九十,我要開始找囉!」當鬼的小魚剛說完,其他的熱帶魚立刻找地方躲好,連尾巴都不敢搖!只剩一尾白色混著橘色的小魚阿平還沒躲好,他轉頭看到珊瑚礁旁大海龜阿秋在那兒睡覺,急匆匆「咻」地游過去,躲在大海龜的腋下,尾巴卻沒躲好,被鬼抓到!兩尾小魚就這樣在大海龜阿秋的旁邊你一句我一句的爭論不休!
阿秋被吵架聲吵醒,抬頭一看:「阿平啊!又是你這隻搗蛋鬼!」原本在那耍賴的阿平說:「我不玩了!海龜爺爺,您說故事給我們聽啦!」
「呵呵呵,好吧!」說完,其他的熱帶魚全部聚攏過來,阿秋瞇起眼睛說起了三十年前的那一天……。
「剛從龜卵孵出來的我,從濕潤的沙裡爬出來,猛烈的陽光照射過來,我眨眨眼睛,這是我第一次看到刺眼的太陽。我抬頭望,前面有很多和我一樣的小海龜,用細細嫩嫩的腳努力地向大海爬去。
我才想要抬腳走,突然天上一陣烏雲像流星似的「咻~」飛過來,還越飛越低,竟然把爬在前頭的小海龜叼到天上!『那是什麼呀?』嚇得我趕緊躲在石縫裡看清楚。原來那是一大群海鳥!牠們從很遠的地方就聞到小海龜的味道,全部飛過來,一隻海鳥叼一隻小海龜!剛從龜卵爬出來的小海龜只知道拍著四隻腳,哪有力氣來反抗?我被眼前可怕的光景嚇得直發抖!
海浪拍打的聲音,鹹鹹的味道,好像一直在喊著:阿秋快點來啊!
我不得已一咬牙起腳爬,拚命地向著大海爬去。很不簡單閃過幾隻兇惡的海鳥,大海越來越近了……。忽然間「喀!」一聲,一隻大大的夾仔對著我夾過來,「哎唷!」我嚇得倒退兩步。蛤?螃蟹也來搶食小海龜!橫著走的大螃蟹,瞪大眼睛不懷好意地舉起大螯對著我追過來!
「這下可就死定了!上有海鳥,下有螃蟹!怎麼去海裡的路那麼難走啊?」我眼淚差點掉下來。高聳的大螯又來到眼前,我才喊一聲「我的媽呀!」身體就飛了起來!
「別怕,我救你!」一個年輕人將我放在他的手裡摀著,閃過兇惡的海鳥和螃蟹,來到海邊。他邊走邊對我說:「我看到你拚命地爬,讓我好感動。只有堅持不放棄,生命才有出路啊!加油,要好好長大哦!」年輕人輕輕地將我放進海水裡。剛游進大海的我,遠遠地看到年輕人又走回沙灘了……。」
「那個年輕人好有愛心啊!」熱帶魚阿平說:「不然我哪有機會和海龜爺爺認識呢?有機會我也要伸手幫助別人。」大海龜阿秋笑了。
浪花依舊,似乎在訴說著永遠不會結束的故事……。