文／鍾孝昇，國小教師、中壢客家人，這下戴中壢（四縣腔）
大家都知客家人三、四百年前，對大陸原鄉渡烏水溝到台灣，就在南北各地絡食，發展出「四海大平安」五腔六調，特有个台灣客家文化。
其實在生物界，乜有一種動物，佢兜三億年前就在地球項生活，還對亞洲大陸遷徙到台灣。毋過，佢兜毋使渡海，顛倒利用冰河時期个陸橋來到台灣，還過在高山頂發展出五大族群，佢兜就係分人安到「台灣高山頂个微笑精靈」–「山椒魚」。
二月初，亻厓當好彩受著邀請，參加電影《山椒魚來了》个首映會，欣賞這齣由麥覺明導演，用17年个時間，跈等呂光洋教授、賴俊祥先生摎朱有田先生个研究團隊，在兩三千公尺个高山水源頭，記錄台灣山椒魚个過程。
山椒魚，雖然有隻「魚」个名仔，毋過，佢毋係魚類，顛倒摎𧊅仔、蟾蜍共樣係兩棲類个動物，因爭身項有山椒个味緒，故所就安到山椒魚。山椒魚三億年前就在地球項生活，比恐龍還較早一億年，係今這下罕得看著个生化石。
台灣个山椒魚係在冰河退忒後，遺留在台灣个特有種。為著愛適應亞熱帶个天時，佢兜跍身在溫度較低个高山水源頭，這位係全世界山椒魚生存个盡南片，乜係唯一生長在亞熱帶个山椒魚。
《山椒魚來了》這齣電影，毋單淨紹介台灣五種珍貴个山椒魚，還摎孵卵个過程詳細記錄下來。山椒魚逐年在二到三月，雪水融忒个時節就會打卵，下後這兜卵，就在爺哀个照顧下開始發育，最尾在第六隻月，山椒魚正做得離開河壩，開始在陸地生活。麥覺明導演摎研究團隊，不管天時好壞，逐禮拜去到深山肚，正做得翕著這兜珍貴个畫面。
這齣電影還有一隻重點，就係記錄這兜研究山椒魚个人。像台灣山椒魚研究个第一儕人–呂光洋先生、還過賴俊祥先生、朱有田教授、勝文摎柚仔佢兜儕。其中，為著愛研究山椒魚嗄跌到山坑，摎命留在中央山脈个賴俊祥先生，厥故事分人試著盡感動。
賴俊祥先生，還在該下在臺灣師範大學教書，係研究山椒魚當有成就个學者，佢還識摎呂光洋先生共下發表橙腹樹𧊅仔、諸羅樹𧊅仔這兜物種。2016年，佢為著愛研究山椒魚跍身个所在係毋係做得𨃰過中央山脈，在台灣東片个水源頭建立族群，無想著在奇萊北峰附近無細義跌落崩崗下。就恁仔，佢摎佢惜入心个山椒魚，永久長眠在山林肚。賴先生个離開，對學術界來講，係當重大个損失。
接手賴先生研究个朱有田教授，乜出席這擺个首映會。講著賴先生，佢硬喉講：「盡感謝麥覺明導演，完成賴先生个願望，分大家看著山椒魚。雖然研究个過程有當多困難，毋過大家相幫相𢯭，在平凡个事物當中，看著毋平凡个價值，過摎臺灣特有種个價值、精神相續下去。」
人喊做麥哥个麥覺明導演，佢製作、主持个《MIT台灣誌》超過二十年哩，做得講係台灣山林紀錄片个推動人。先前就拍出記錄臺灣烏熊生態个《烏熊來了》這齣電影，這擺个《山椒魚來了》電影，係摎這強強會末忒个「史前神獸」，通棚記錄下來。
亻厓想恁艱難个生態研究摎辛苦个紀錄工作，還較愛大家來支持正做得。係講做得，請大家到電影院買票，欣賞這齣有淰淰理性摎感性个紀錄片，支持麥導摎這兜生態研究者，繼續為台灣个生態保育，出一分心力。
就像這齣電影當中个一句話：「亻恩兜都係台灣特有種！」，億萬年前，這兜做客他鄉个山椒魚，經過歲月个代換，早就係台灣特有个物種。其實，毋單淨係山椒魚，在台灣生長个各種生物、各種文化，都係這隻島項，獨一無二个台灣特有種，值得亻恩兜用心來珍惜。
華語
大家都知道客家人三、四百年前，從大陸原鄉渡過黑水溝來到台灣，並在各地發展，繁衍生成「四海大平安」五腔六調，獨特的台灣客家文化。
其實在生物界裡，也有一種動物，它們早在三億年前就存在於地球上，並從亞洲大陸遷徙到台灣。不過它們並毋須走過海路，而是利用多次冰河時期所形成的陸橋來到台灣，並在台灣各個山頭上，發展成五大族群，它們就是被稱為台灣高山微笑精靈的「山椒魚」。
二月初有幸受到的邀請，參加電影《山椒魚來了》的首映會，欣賞這部由麥覺明導演，耗費17年，跟著呂光洋教授、賴俊祥老師及朱有田老師的研究團隊，在台灣兩三千公尺的高山溪流源頭，記錄台灣五種山椒魚的過程。
山椒魚，雖然有個「魚」的名字，但他並非魚類，而跟青蛙、蟾蜍同屬於兩棲類，因為身上有山椒的味道而得其名。山椒魚早在三億年在地球上存活了，比恐龍還要早一億年就出現了，是現存世上少有的活化石。
而台灣的山椒魚則是冰河退去後，遺留在台灣的特有種。為了適應亞熱帶的氣候，它們的棲息地，局限在氣溫較低的高海拔溪流源頭，這裡是山椒魚生存的最南界，也是唯一分布在亞熱帶的山椒魚。
《山椒魚來了》這部電影，不但介紹了台灣五種珍貴的山椒魚，還將其孵化過程完成記錄下來。原來山椒魚在2到3月間雪水融化期間的產卵，之後這些卵，就在父母親的照顧下開始發育，時期可達3到4個月，最終在6個月後山椒魚離開水域，開始在陸地生活。麥導與研究團隊每週上山紀錄生長過程，終於取得這些非常珍貴的畫面。
這部電影還有一個重點，就是記錄這些研究山椒魚的人們，包括台灣山椒魚研究的第一人呂光洋老師、以及賴俊祥老師、朱有田教授、勝文和柚子等人。其中為了研究山椒魚而墜落山谷，將生命留在中央山脈的賴俊祥老師，他的故事更是讓人感動。
賴俊祥老師，生前任教於臺灣師範大學，為山椒魚研究的翹楚人物，並曾和呂光洋老師發表橙腹樹蛙、諸羅樹蛙等物種。2016年，他為了研究山椒魚的棲息地是否能跨越中央山脈，在台灣東邊的水源地建立族群，沒想到在奇萊北峰附近失足墜崖，就這樣，他與心愛的山椒魚永遠長眠於山林。賴老師的離開，對學術圈而言，無疑是重大的打擊。
接替賴俊祥老師研究工作的朱有田教授，也出席這次的首映會。在提到賴俊祥老師時，他哽咽說到：「很謝謝麥覺明導演，完成賴老師的願望，讓山椒魚被大家看見，雖然有許多艱難，但大家一路相挺，在平凡中看見不平凡，看到臺灣特有種的價值，把這個精神傳承下去。」
人稱麥哥的麥覺明導演，他製作、主持的《MIT台灣誌》超過二十年，可説是台灣山林紀錄片的重要推手。過去他就已經拍出了以記錄臺灣黑熊生態的《黑熊來了》這部電影，這次《山椒魚來了》電影，則將這瀕臨絕種的「史前神獸」，完整記錄下來。
我想困難的生態研究及辛苦生態紀錄，更需要大家的支持。如果能夠，請大家買票進電影片院欣賞這部充滿理性與感性的紀錄片，支持麥導以及這些生態研究者，繼續為台灣的生態保育盡一分心力。
正如同這部電影當中的一句旁白：「我們都是台灣特有種！」，億萬年前，曾經作客他鄉的山椒魚，經過歲月的更迭，早已成為台灣特有種。其實又何止是山椒魚，存在於台灣的各種生物、各種文化，都是這個島嶼上，最獨一無二的台灣特有種，都值得我們用心珍惜它。
