文／黃脩閔，碩士生，埔心客家人，這下戴台北市
你知得客家人分布在世界項哪兜位所無？其實，除忒中國、台灣有當多客家人，世界各地像印尼、馬來西亞、泰國、新加坡、越南、加拿大、祕魯、英國、法國等等都有客家个社群。
對2023年1月30開始，中央大學客家學院到印尼雅加達、泗水、瑪琅，參觀當地个客家社團、會館組織、客家博物館，了解印尼客家社群。印尼个客家人，大體分布在山口洋、雅加達、泗水、亞齊、邦加摎坤甸，對中國來印尼个人，從第二代到第五代都有。印尼裡肚有當多个族群（印尼話：sukubangsa）摎語言，華人差毋多占1.2%定定，華人裡肚又分做對福建、廣東、海南來个河洛社群、客家社群、潮州話摎廣府話社群。
講著印尼个族群關係，就有當多个歷史故事。對客家人來講，蘇哈托政權統治个時節，從1965到1998年个排華事件，政府強制摎華人學校同華人報紙關忒，要求華人換做印尼話个名仔，造成當多後生人毋曉講華語，乜毋會講客家話。一直到這下，雖然做得辦華人學校同華人報紙，還係有當多人失去語言能力了，就像台灣頭擺推行國語運動樣。無共樣个係，後來全世界單淨台灣成立國家个客家委員會來保存本土語言，其他國家就愛靠民間个力量。
亻厓兜在雅加達、泗水、瑪琅，都有同當地个客家人打嘴鼓，發現印尼客家社群講个客家話，大體摎台灣四縣腔還過海陸腔差毋多，故所做得溝通。在雅加達拜訪對2008年成立个印尼客屬聯誼總會，佢係全印尼31隻客屬社團共下組成，強調客家族群个身分，乜參觀印尼客屬聯誼總會起个「印尼客家博物館」，佢个位所在印尼雅加達縮影公園，這公園裡肚有印尼各族群無共樣个建築、文化，其中，客家博物館紹介華人來到印尼个過程、客家人个族群文化，還過在印尼受著个挑戰摎在地化个發展。
在泗水个時節，亻厓兜參訪當地客家會館組織摎宗親會同同鄉會，像惠潮嘉會館、古氏宗親會摎興寧同鄉會，裡肚十股九係客家人，亻厓觀察著客家認同來自血緣摎祖籍，惠潮嘉會館係全印尼唯一有開客家話班个會館，其他組織單淨開中文補習班；在參觀北極廟該下堵著齋姑，佢講佢都係用客家話來誦經，無論來到廟項个係印尼本地人還係印尼華人，都愛練習用客家話來誦經。
假使大家來到印尼，乜做得去有客家社群个城市，你會發現，客家係世界个客家！在台灣街路堵著印尼人个時節，無定著佢乜會講客喔！
華語
你知道客家人分布在世界的哪些地方嗎？其實，除了中國、台灣有很多客家人，世界各地像印尼、馬來西亞、泰國、新加坡、越南、加拿大、祕魯、英國、法國等都有客家社群。
從2023年1月30日開始，中央大學客家學院到印尼雅加達、泗水、瑪琅，參觀當地的客家社團、會館組織、客家博物館，了解印尼客家社群。印尼的客家人，大多分布在山口洋、雅加達、泗水、亞齊、邦加和坤甸，從中國來印尼的人，從第二代到第五代都有。印尼裡面有很多族群（印尼話：sukubangsa）和語言，華人差不多占1.2%而已，華人裡面又分為從福建、廣東、海南來个河洛社群、客家社群、潮州話和粵語社群。
講起印尼的族群關係，就有很多的歷史故事。對客家人而言，蘇哈托政權統治時，從1965到1998年的排華事件，政府強制關閉華人學校和華人報紙、要求華人換作印尼話姓名，造成許多年輕人不會講華語、也不會講客家話。一直到現在，雖然可以興辦華人學校和華人報紙，還是有許多人已經失去語言能力，就像台灣以前推行國語運動。不同的是，後來全世界上僅台灣成立國家的客家委員會來保存本土語言，其他的國家就必須依靠民間力量。
我們在雅加達、泗水、瑪琅，都有和當地居民互動，發現印尼客家社群講的客家話，大致上和台灣四縣腔及海陸腔相似，因此可以溝通。在雅加達拜訪從2008年成立的印尼客屬聯誼總會，它由全印尼31個客屬社團共同組成，強調客家族群身分。也參觀由印尼客屬聯誼總會籌建的「印尼客家博物館」，他的所在地位於印尼雅加達縮影公園，這公園裡面有印尼各族群的不同建築、文化，其中，客家博物館介紹了華人來到印尼的過程、客家人的族群文化，還有在印尼受到的挑戰與在地化的發展。
在泗水時，我們參訪了當地客家會館組織摎宗親會和同鄉會，像惠潮嘉會館、古氏宗親會和興寧同鄉會，裡面百分之九十是客家人，我觀察到客家認同來自血緣和祖籍，惠潮嘉會館是全印尼唯一有開客家話班的會館，其他組織僅開設中文補習班；在參觀北極廟時遇到尼姑，他提到他都用客家話來誦經，無論來到廟裡的是印尼本地人還是印尼華人，都要練習用客家話來唸經。
如果大家來到印尼，也可以去有客家社群的城市，你會發現，客家是世界的客家！在台灣街道上遇到印尼人的時候，說不定他也會講客語喔！
