文／ 陳美蓉， 苗栗客人，這下歇在 新北市（北四縣腔）
老阿姆在屋面前種菜，見擺轉妹家坐有一下仔，就定著愛走去看啊今个種有恁多麼个菜？莫講麼个，看著該一截番薯葉、一截大肚菜、調羹白、甜菜，還有幾桱仔芹菜、蔥仔、蒜仔、兩頭仔七緣插，深深淺淺个浸青，當中又間吔幾桱仔紅菜，哦，還有豬肝紅豬肝紅个𧊅絲……，逐項都生到恁標恁靚，看到人心肝活活開。
嗯，坐一轉兩、三點鐘个車仔轉來，當值。
老哀仔乜跈等出來，看等還幾下頭莖仔菜，佢講：「妳轉去擎禾鐮仔來，這幾下頭𠊎來同佢割下來，畀晾一下仔，等下滷滷啊分妳帶轉去，炒得著幾下餐著」。
「啊？毋係摘下來跈等就滷得喔！」
「哎喲，妳實在還戇喔，正摘啊著還活生，愛仰仔滷呢吓！一揉啊去，兩下半乜斷了了，滷起來毋脆毋好食，乜毋好看相，哪會餳人呢！妳毋記得了喺？原在滷鹹菜，趕天時好上晝去同芥菜斫下來，就在田項放歸晝邊仔，這當中還愛去揙揙啊，好畀晾較燥水、較軟啊，到下晝時頭，妳恁多個細人仔正去同佢攎攎轉來禾埕項，𠊎同若婆拿隻大毛籣在籬笆下頭擂擂仔，一頭一頭仔挲兜鹽落去又揉又擦，擦有恁多吔，正疊疊落大楻仔肚項，一層芥菜還愛再過掖一層鹽落去，續等妳恁多姊妹正上去躪，這兜妳都毋記得了喺？」
著嗬，講著躪鹹菜，𠊎盡記得，𠊎這兜細不仔，頭下碼斯興嘟嘟仔，擦吂得時有恁多就好擳擳仔緊啁，還愛加幾久仔正會有好躪啦！該大菁楻乜正式有好大仔，還記得𠊎這兜細孲仔愛落去，細妹仔毋係愛大人扶扶mogˋ mogˋ，就係愛兜張矮凳仔來墊，正得落。毋比得細倈仔，一支腳出力躡一下腳尾，另外一支腳擎啊起來，圓身側側仔一環，就落去吔。這擺聽老阿姆講古正知，頭擺屋下用个大楻仔毋係自家个，係同人借个。仰仔呢？「頭擺旦旦乜愛大耕種个人家正會做有楻仔，該樹料好，做一隻愛百過兩百箍，略下仔个人家哪有該能力」。
躪鹹菜，本成就會像扭屎胐花樣仔，還過會有息息削削个聲，等菜係躪軟會略略仔出水，又換過漬漬灂灂个聲，細人仔試著生趣好搞，幾下儕人个屎胐這片揬來該片揬去，一下大力一下細力，頭下碼還試著罔趣啊罔趣仔，兩下半乜試著無搭無碓，係想著毋正經啊躪，還歸嶂仔愛躪，看愛躪仰得下山哪！
今个大家看電視項个人躪鹹菜，腳項定著會落塑膠套仔抑麼个，頭擺人哪有恁工夫，腳有洗淨就真好哩喲，乜怕無去想麼个衛生抑毋衛生个問題。講起來，這乜係時代緊進步，各項个要求自然就會較多 。
割莖仔菜愛滷，仰講講揫恁多老狗屎？無講滷莖仔菜呢？該就下二篇正來再過繼續講哦。
華語
老母親在門口種菜，每次回娘家坐一會兒後，一定會走去看看現在種了哪些菜？別說什麼，看那種有一小段地的地瓜葉、白花芥藍菜、青江菜、珍珠菜，還有幾行的芹菜、蔥、蒜、兩三棵九層塔，深淺各自不同的油綠，間雜幾行紅鳳菜，哦，還有紅褐色紅褐色的紫蘇……，每一樣都長得如此好如此肥美，看得人心花朵朵開。
嗯，回來單趟車程得花兩、三個小時，也真是值得啊。
老媽媽跟著也出來，看著還剩下的幾棵雪裡紅，她說：「妳回家去把割稻的鐮刀拿來，這幾棵我來將它割下，讓它曝曬風乾一下，等等我把它醃漬好給妳帶回去，可炒個幾餐呢 」。
「啊？不是摘下來馬上就可醃漬喔！」
「哎喲，妳實在有夠傻，剛採摘下來還這麼生氣勃勃的，要如何醃漬呢！一揉搓下去，馬上也就肉斷葉殘，醃漬起來不脆不爽口，賣相也不好，哪能吸引人呢！妳忘記了嗎？以前醃漬鹹菜，趁天氣好上午去把芥菜割下來，就放在田裡半天，期間還要將之翻面，讓它熟軟些，等到下午時你們幾個小孩子再去把它們抱抱回來庭院裡，我和妳祖母拿了大的淺邊平底竹容器，在圍籬下埋頭將一棵棵的芥菜撒鹽後又揉又搓，搓有一定的量了，再疊進大木桶裡，一層芥菜放滿還要再撒一層鹽上去，接著妳們幾個姊妹才又上去踩踏，這些妳都忘記了嗎？」
對耶，說到踩踏鹹菜，我最記得，我們這些小孩子，初始興致盎然，芥菜都還沒揉搓多少便興沖沖的頻頻發問，還要再等多久才可以踩踏啦！而那大木桶真是大啊，還記得我們這些小鬼要進去，女生若非藉由大人扶持著進去，就得要搬張矮凳子來墊，才得以進去。可不比男生，一支腳用力踮下腳跟，另外一支腳舉起來，側著身子一個翻身，就進去了。這次聽老媽媽說往事才知道，以前家裡用的大木桶非自家的，是借來的。怎麼說呢？「以前總要田地寬闊的人家才會自有大木桶，其木料好，做一只要一、兩百元，普通人家哪有那個能力」。
踩踏鹹菜，屁股很自然就會扭來扭去，而且會有自然的踩踏摩擦聲，等到菜被踏軟了會稍微出水，又灂灂有聲，小孩子覺得有趣好玩，好幾個人的屁股互相碰撞，力道忽大忽小，起初尚覺有趣，很快便覺乏味，想到若不正經好好踩踏，還有成堆得踩，得踩到何時呢！
如今大家看電視上人們踩踏鹹菜，腳上都會套上塑膠套子或什麼的，以前的人哪有這般周到，腳有洗乾淨就不錯了啊，大概也沒去多想衛生與否的問題。說起來，這也是時代進步了，各項要求自然就多 。
採摘雪裡紅要醃漬，怎盡說些陳年舊事？而未提醃漬雪裡紅呢？那麼下一篇再來繼續哦。
歡迎討論或留言給我們: