【寫客文】堅強勇敢个女性，專訪二二八鳳林事件遺族張玉蟬

文／曾櫳震　大學生、竹東客人、這下因為讀書戴花蓮壽豐

花蓮鳳林个張屋，二二八事件過後，歸隻家族過等烏暗个日仔有四十零年。鳳林事件受害者張七郎先生个三心臼、張果仁醫師个餔娘張玉蟬完整个見證了這段歷史，包尾在1990年，勇敢个企出來，摎天下人講，花蓮鳳林曾經有過二二八。這量時，大自家正知講，原來還有花蓮个二二八事件。該下開始，鳳林事件正分人記錄在歷史頂背，乜正知講，原來經歷二二八事件个女性，有幾勇敢合堅強。

毋會過存在个過去：舒適个美好光景

鳳林張屋，在二二八以前係地方望族，歸屋下就有四個醫生。張玉蟬係張屋个花囤女，係張七郎个三心臼。張七郎、厥先生張果仁通棚係醫生，生活過到當好。

該下百姓个生活條件摎這下比毋得，鳳林街項个人家做盡都係三餐食番薯，下把做得食著米，該斯愛承蒙天地。張玉蟬講，在二二八事件發生以前，屋下從來毋愁無飯好食。張玉蟬受訪个時節表示：「該量時屋下个米非常多，鳳林个大自家做盡無飯好食，就亻恩俚張屋毋驚無米好食。」

張玉蟬過想起，張屋个婦人家愛洗米煮飯个時節，都會看著該兜米裡肚有當多个米蟲，米个頂背還有一層灰，斯知張屋屋下个米有幾多，毋係三兩日斯吃得忒。

張七郎還過張屋个男仔人，毋係醫生，就係有受過高等教育个高級知識份子，張玉蟬認為，這係一家人做得無愁無慮个關鍵。張玉蟬講：「有恁好過个日子，都係因為爸爸（張七郎）還有屋下个男仔人。」

無法度接受个現實：風雲變色該日

張玉蟬想起，1947年4月4號，張屋子爺三人遇害个該日天光，張七郎、張宗仁、張果仁、張依仁還係像以前共樣，打早就出門到仁壽醫院，為鳳林个鄉親服務。張玉蟬摎家娘詹金枝，食朝食好過後，共下到灶下為張屋子爺準備當晝个便當，張玉蟬講：「𠊎看到家娘（詹金枝）準備便當个時節，面頂充滿笑容，你兜斯知講，屋下人个感情當好」。

朝晨九點零，便當都做好了，喊人送去仁壽醫院。毋過十點零，送便當去仁壽醫院个走腳板，嗄帶等好好个三隻便當轉到屋下。張玉蟬摎詹金枝還當當疑狐，無幾久，斯聽到有人傳來消息講，張七郎、張宗仁還過張果仁三子爺，朝晨斯分政府个兵仔銃殺了，還過埋忒了，單單張依仁，有軍醫个證明，正做得瀉走。

張玉蟬摎詹金枝，還過庄肚个大自家聽著，開始尋張屋三子爺埋到哪位，希望做得尋著張屋三子爺个遺體，大半日過後，最尾在鳳林公墓脣頭尋著。摎泥挖開來，看著張屋三子爺个屍首，疊在最頂背个係張宗仁，下背係張果仁，張七郎矺在最下背。張玉蟬講：「看著家娘（詹金枝）个面色艱苦，暗暗流目汁，自家个目汁乜跈等跌下來。」

張玉蟬摎一兜村民用牛車，摎張屋三子爺个遺體載轉屋。張玉蟬想著：「該量時毋敢行大路，斯敢行小路，就驚分阿山仔（外省人）發現。」想到這，張玉蟬个目汁又一擺跌下來。

風雲變色過後：無人好倚恃个張屋女性

從來毋識想過，會一下仔無忒所有偎靠个張屋人，在一日之間送走張七郎、張宗仁、張果仁三個男仔人之後，在屋下脣頭重新安葬張屋三子爺。張玉蟬受訪个時節講：「家娘（詹金枝）該時含等目汁送走了先生，送走了兩個倈仔，馬上轉過頭，摎所有張屋个人講，希望還在个細倈仔，做得出國斯出國，毋好留在臺灣。」故所，墳頭頂个土還吂燥，還在个細倈仔，全部離開了這傷心个地方。

對該時過後，詹金枝變做無想再過摎任何人來往，張玉蟬斯愛㧡起責任，照顧家娘詹金枝，還過照顧留下來、走不忒个人，包括張至滿、張安滿等細人仔个使命。

張玉蟬為了屋下人做得有飯好食，開始學耕田、種菜，本來想賣A ki bin賺錢，毋過鳳林个人看著張屋人，都閃到當遠，斯驚分人㓾忒。張玉蟬講自家本來係先生娘，一下斯變做耕田人，仰可能習慣，毋過上有家娘，下有細人仔，男仔人都不在身邊，再多个苦乜愛忍耐，想辦法變一個堅強个婦人家。

張玉蟬受訪个時節想著，該量時長透坐在爸爸（張七郎）、先生（張果仁）个塚埔前，感覺當委屈，毋明白自家仰般會堵著恁樣个事情。張玉蟬講，毋知這兜苦愛對麼人講，斯輒常罵上帝，坐在塚埔面前講：「哪有麼个上帝？係有上帝，做麼个上帝愛分𠊎恁樣个苦難。」

罵忒以後，目汁捽燥，又行轉去照顧一屋大細个生活，繼續耕田種菜，就恁樣一日過一日，一下仔四十年過去了。張屋个細人大了，毋過張屋人个生活還係毋敢摎外背个人有昶多个接觸，就驚屋下人過一擺分人㓾、分人關。到詹金枝過身，因為該下還係戒嚴，所有在國外个男仔人做盡毋敢轉來見阿姆最尾一面。

詹金枝个後事，自然係張玉蟬負責處理，張玉蟬一直試著怨恨、毋公平，佢毋知張屋哪位做毋著了，毋知係毋係有哪日，公平做得降臨，毋知係毋係有哪日，張屋三子爺个冤枉做得分人看著。

喚醒以前講毋得个歷史

張玉蟬知講，詹金枝毋係毋想摎全國个人講張屋經歷个歷史，因為張玉蟬整理詹金枝留下來个東西該下，發現一封詹金枝个狀紙，頂背寫等張屋子爺受著个冤枉。毋過詹金枝佢實在毋敢講了，詹金枝無忒了先生，無忒了兩隻倈仔，做盡係一日之間个事情，仰做得接受任何个災難再過降臨在張屋。

這封狀紙，張玉蟬一直留等，雖然看了會心痛，毋過張玉蟬希望有一日，做得向全國个人民講這段歷史，做得分大家知和平个可貴，洗淨爸爸張七郎，還有張宗仁、先生張果仁个冤屈。

在1990年，臺灣基督長老教會在臺北辦了一場二二八追思平安禮拜，張玉蟬分人邀請去參加，在禮拜該下，佢摎花蓮个二二八鳳林事件經過，還過張屋人四十零年來歷經个風霜、委屈全部講出來，該量時所有參加个人，包括政商名流，全部著下驚，因為大自家從來毋知，東部後山个鳳林，還曾經有一段恁樣悽慘个歷史事件。

又過了幾下年，張玉蟬摎其他地方个二二八受難者遺族，共下到總統府面前遊行，希望政府做得重視這垤土地識發生个悲劇，重視受難者過身个亡靈，還過受難者遺族幾下十年來个委屈。

到李登輝當選總統過後，接見張玉蟬，張玉蟬親身將家娘詹金枝過身前寫个狀紙交分總統李登輝。李登輝代表政府向受難者摎遺族會失禮，定每年个2月28號為「和平紀念日」，還過起了紀念園區、紀念碑等，來告慰曾經受難个亡靈，這量時開始，花蓮个二二八鳳林事件，正正經分全國人民知。

盼望和平个未來：希望下二擺毋會有人像張屋恁樣悽慘

張玉蟬受訪時表示，毋知自家當初係麼儕分佢勇氣去做這件事，毋過佢認為恁樣做係有價值个。張玉蟬對完成詹金枝遺願，為張屋子爺洗淨冤屈過後，乜放下自家心中多年來个痛苦。

張玉蟬講，對該量時過後，做得在爸爸（張七郎）、張宗仁、先生張果仁个塚埔面前，摎佢兜講，你兜个冤屈大家知了，大家看著鳳林事件了。佢乜講：「係講有一日𠊎到天頂，看著爸爸（張七郎）佢兜，𠊎做得笑等講，所有个痛苦做盡過去了，全國个人民會記得這段歷史。」

張玉蟬希望全國个人民做得莫添放忒張屋子爺个犧牲，乜希望下二擺毋會有任何人，過一擺堵著張屋經過个痛苦。

華語：

在地故事：堅毅勇敢的女性，專訪二二八鳳林事件遺族張玉蟬

花蓮鳳林的張家，經歷二二八事件後，整個家族陷入黑暗長達四十年。鳳林事件受害者張七郎醫師的三媳婦、張果仁醫師的遺孀張玉蟬完整的見證了這一段歷史，並且在1990年，勇敢地站出來，告訴天下人，花蓮鳳林曾經有過二二八。這時，大家才知道，原來還有花蓮的二二八事件。那時開始，鳳林事件才被記錄在歷史上，也才知道，原來歷經二二八事件的女性，是多麼的勇敢。

不復存在的過往：安逸的美好光景

鳳林張家，在二二八以前是地方望族，一家就有四個是醫師。張玉蟬是張家的童養媳，是張七郎的三媳婦。張七郎、丈夫張果仁皆為醫師，生活條件極其優渥。

那時百姓的生活條件不比如今，在鳳林街上的人家幾乎都是三餐吃地瓜充飢，偶爾能吃上米飯就要謝天謝地。張玉蟬提到，在二二八事件發生以前，家裡從來不愁吃穿。張玉蟬受訪時表示：「那時家中的米非常多，鳳林的大家都沒飯吃，就張家不怕沒米可吃。」

張玉蟬更憶起，張家的婦人們洗米煮飯時，都會看到那些米裡面有好多米蟲，米的上面都有一些灰，可見家中的米多不勝數，不是三兩天就能吃完的量。

張七郎以及張家的男人們，不是醫師，就是受過高等教育的高級知識份子，張玉蟬認為，這是一家可以衣食無憂的關鍵。張玉蟬說：「有這麼好過的日子，都是因為爸爸（張七郎）還有男人們。」

難以接受的現實：風雲變色的那日

張玉蟬想起，1947年4月4日，張家父子遇害的那天早上，張七郎、張宗仁、張果仁、張依仁還是一如往常，清早就出門到仁壽醫院，要為鳳林的鄉親服務。張玉蟬與婆婆詹金枝則在吃完早飯後，一起到廚房為張家父子準備午餐的便當，張玉蟬說：「看到婆婆（詹金枝）準備便當時，臉上充滿笑容，你們就知道家人間的感情很好」。

早上九點多，便當都做好了，差人送去仁壽醫院。但十點多，送便當去仁壽醫院的幫傭，卻帶著完好的三個便當回到家中。張玉蟬與詹金枝還在疑惑，不久，便聽到有人傳來消息說，張七郎、張宗仁以及張果仁，早上就已經被政府的軍兵槍殺，並且已經草草埋葬了，只有張依仁，有軍醫證明，才得以脫身。

張玉蟬與詹金枝，還有眾多的鄉民們聞訊，開始找尋張家父子的埋葬地，希望能夠找到張家父子三人的屍身，花了大半天，最終在鳳林公墓一處亂葬崗旁找到。撥開黃土，看到張家父子三人的屍身，疊在最上面是張宗仁，下面是張果仁，張七郎則壓在最下面。張玉蟬說：「看到婆婆（詹金枝）的神色哀戚，暗暗拭淚，自己的淚水再也止不住。」

張玉蟬與一些村民用牛車，將張家父子三人的屍首載回家中。張玉蟬回憶道：「那時不敢走大路，只敢走小路，就怕被阿山仔（外省人）發現。」往事湧上心頭，張玉蟬又一次老淚縱橫。

遭逢鉅變的陰霾：失去依靠的張家女性

從沒想過會頓失所有的依靠的張家人，在一刻間失去張七郎、張宗仁、張果仁三個男人之後，在自家旁重新埋葬了張家父子三人。張玉蟬受訪時談到：「婆婆（詹金枝）當時含淚送走了丈夫，送走了兩個兒子，馬上回過頭告訴所有張家人，希望剩下的男人們，能出國就出國，不要留在臺灣。」於是，墳上一培黃土未乾，剩下的男人們，都離開了這傷心的地方。

自此以後，詹金枝變得不想再與任何人來往，而張果仁遺孀張玉蟬則肩負著照顧婆婆詹金枝，以及照顧剩下來的、走不了，包含張至滿、張安滿等小孩的沉重使命。

張玉蟬為了生計，為了全家人的溫飽，開始學著耕田、種菜，本來想賣廢品賺錢，但鳳林的人看到張家人都躲得遠遠的，深怕遭殃。張玉蟬說自己從富裕的醫生娘，一夕之間變成農婦，怎麼可能習慣，但是上有老，下有小，男人都不在身邊，再多的苦難也只好忍下，搖身變為堅毅的女性。

張玉蟬受訪時回憶起，當時常常坐在爸爸（張七郎）、先生（張果仁）的墓前，覺得很是委屈，不明白自己為什麼會遭遇這樣的事。張玉蟬說，當時不知道這些苦要如何發洩，常常罵上帝，就坐在墳前說：「哪有什麼上帝？要有上帝，為什麼上帝要降下這樣的苦難。」

發洩完情緒後，擦乾眼淚，就又回去照顧一家大小的起居，繼續農作，就這樣日復一日，轉眼過去了四十個年頭。張家的小孩日漸長大成人，但張家人的生活依然低調，再也不敢跟外界有太多的接觸，深怕家中再次遭到橫禍。甚至到了詹金枝離世，因為還在戒嚴，所有在國外的男人們都不敢回來見母親最後一面。

而詹金枝的後事，自然是張玉蟬負責處理，張玉蟬一直覺得忿恨不平，不知道張家做錯了什麼，不知道正義有沒有伸張的一天，不知道張家父子的冤屈能不能夠昭雪。

喚醒以往被噤聲的歷史

張玉蟬知道，詹金枝不是不想告訴全國的人張家的往事，因為，張玉蟬在整理詹金枝遺物時，發現一封詹金枝的訴願書，上面寫明了張家父子蒙受的冤屈。但是詹金枝實在沒有籌碼了，詹金枝失去了丈夫，失去了兩個兒子，都是一夕之間的事，詹金枝不能再接受有任何災禍再臨張家。

這封訴願書，張玉蟬一直留著，雖然看了會心痛，但是張玉蟬殷切盼望有朝一日，能向全國人民訴說這段往事，能夠讓大家懂得和平的可貴，洗清爸爸張七郎，還有張宗仁、張果仁的冤屈。

在1990年，臺灣基督長老教會在臺北辦了一場二二八追思平安禮拜，張玉蟬應邀前往參加，並在禮拜時，將花蓮的二二八鳳林事件經過以及張家人四十多年來歷經的風霜、委屈全部說出，在座的所有與會人士，包含應邀出席的政商名流，全都為之震驚，因為大家從不知道，遠在東部後山的鳳林，還有這麼一段悲慘的歷史事件。

再後來數年，張玉蟬甚至與其他地區的二二八受難者遺族，一同到總統府面前遊行，呼籲政府重視這塊土地上曾經發生的悲劇，重視受難者過往的亡靈，以及受難者遺族數十年以來的委屈。

直到李登輝當選民選總統後，接見張玉蟬，張玉蟬親自將媽媽詹金枝生前寫的訴願書交給時任總統李登輝。李登輝代表政府向受難者及遺族道歉，定每年2月28日為「和平紀念日」，並且興建紀念園區、紀念碑等，以祭奠、告慰曾經受難的亡靈，自此，花蓮的二二八鳳林事件，才真正的被全國人民看到。

期許和平的未來：希望再也沒有像張家人一樣的悲劇

張玉蟬受訪時表示，不知道當初是哪裡來的勇氣去做這件事，但並不後悔，認為這麼做是值得的。從完成詹金枝遺願，為張家父子洗清冤屈以後，也卸下了自己心中多年以來的沉痛。

張玉蟬說，從那以後，終於可以在父親（張七郎）、張宗仁、張果仁的墓前，告訴祂們，你們的冤屈大家知道了，大家看見了鳳林事件。也說：「若有一天我到天上去了，見到爸爸（張七郎）祂們，可以笑著對祂們說，一切的苦痛都過去了，而全國的人民將會記住這段歷史。」

張玉蟬希望全國的人民可以記住張家父子的犧牲，也盼望未來再也不會有任何人，再一次遭遇張家人所遭遇過的苦痛。

延伸閱讀：
【二二八．客家】憶殉道仁醫張七郎　三媳張玉蟬嘆：屈死的
【二二八．客家】建牌樓喜迎回歸祖國　仁醫張七郎卻冤喪槍下
【二二八．客家】秉持馬偕精神　張七郎手寫匾額鳳林教會展出
【二二八．客家】後山原客融合先驅　張七郎曾受贈榮譽頭目