文／張美煜，生長於屏東福佬庄个關西裔客人，這下戴新北市，前寶島客家廣播電台主持人、中正紀念堂文史導覽志工（海陸腔）
這一兩十年，桃園客庄新屋、楊梅个鵝肉好料理名聲傳四海，食過儕人人食到尋尾，吂食過儕乜「輸人毋輸陣」，相賽想愛嘗看啊；尤其係毋驚貴斯驚無食著無面子个天龍國台北人，盎遠（再遠）駛車乜愛去食，所以，有鵝料理个餐廳見堵著放尞日，間間都生理好到耐毋得，人客係無先定位，毋使想臨時做得分你落去食！
講着食鵝肉，𠊎就來講兩隻摎鵝相關个古好了；毋過，毋係頭擺文人雅士个古，比論講中國晉朝「書聖（書法家）」王羲之愛鵝个〈換鵝帖〉个故事（註1），或者唐朝「初唐四傑」之一个駱賓王七歲（虛歲）就寫出〈詠鵝〉詩个故事（註2），係現代平民百姓个日常生活事。
一隻係𠊎讀書時節个指導「先生」（註3）講佢細細時節在中國南京个經驗。
佢講鵝仔个天性當惡，當會吮人，係分鵝嘴吮着，當難脫身。佢細細時長透分鵝仔逐（分鵝仔追），因為身胚矮細腳又短，有幾下擺走毋掣，嗄分鵝仔追着，分鵝嘴吮到腳囊烏青紫漚，痛到收命，所以佢當惱鵝仔。有一擺，佢看着該隻輒輒欺負佢个鵝仔堵好在頭前个路項搖啊搖緊行，捉着報冤仇个機會了，哪做得儘採放過，佢恬恬對鵝仔个後背撲過去，撳等鵝膴身捉等鵝頸根，拿一隻大石牯摎鵝頸根矺核核，佢自家就走轉屋下去了。無想着該隻鵝仔嗄分石牯矺到絕氣死忒去，主人尋到厥屋下來大罵大詈，罵佢仰恁孤盲，摎佢辛苦畜大愛賣錢个鵝仔舞死忒去，罵了歸晝邊，就係愛監佢兜賠錢，好得厥屋下已鬆頭，無見顧該息錢，臨尾斯賠錢了事。
另外一隻係𠊎老妹中學時節親身堵着个，嗯，應該講係親目看着个事情：𠊎爸係鐵路局屏東支線一隻車頭个副站長，屋下戴車頭脣項鐵路局日本時代起个木造宿舍町，隔壁戴等站長一家人。站長人生到當高大，看起來有一息惡面惡面个形投（面相嚴肅，罕得有笑面），就近个細人仔無一個毋驚佢。
二戰後个民國四、五十年个時代，大家个經濟都無幾好，鄰舍屋下大體都有畜頭牲，有兜人畜雞鴨，有兜人畜鵝仔。鵝仔較猴，又會撿仇恨，長透會嘎嘎滾緊追人，老嫩大細都無放過，成下毋堵好係分佢吮着，該斯知衰了哪～
有一擺，該車頭个站長毋知仰般惹着抑係得失着鄰舍畜个一隻大鵝仔，佢對屋下出門行路去上班時節，嗄分該隻鵝仔大力吮核腳囊毋得㪐，痛到佢唉唉滾，車頭肚兩三個「驛夫」（站務員）聽着唉聲走出來救駕𢯭手，正摎鵝嘴擘開來，該站長已經急到汗流脈絡面紅濟炸了。
𠊎老妹遠遠看著偷笑，一個大男人竟然奈一隻鵝仔毋何……
𠊎老妹七十零歲个人了，毋過見擺講起這件「頭擺个事情」，比手畫腳，歡頭喜面，人斯像轉到中學時節該樂暢毋知愁个後生樣相。
註釋
（註1）書聖王羲之愛鵝成痴，為了得著老道士畜个白鵝，甘願花一晝邊時間代道士寫全本〈黃庭經〉，後來有人斯將《黃庭經》喊做《換鵝帖》了。
（註2）駱賓王7歲作〈詠鵝〉：鵝，鵝，鵝，曲項向天歌。白毛浮綠水，紅掌撥清波。
（註3）先生，客語係講教書先生个「老師」，毋係華語个丈夫-「老公」。
華語
最近一、二十年，桃園客庄新屋、楊梅的鵝肉料理聲名遠播，吃過的人個個食髓知味，未吃過的人也「輸人不輸陣」，爭相想要嘗嘗看，尤其是不怕貴只怕沒吃過而覺丟臉的天龍國台北人，不遠千里（再遠）開車也要去嘗鮮。所以，有鵝料理的餐廳每到假日，家家客滿，生意好到沒空數錢，客人要是沒事先訂位，別想有座位讓你可以臨時進餐廳大快朵頤！
講起吃鵝肉，我就來講兩個跟鵝相關的故事吧；不過，不是古時文人雅士的風流韻事，比如說中國晉朝「書聖」王羲之愛鵝成痴，又或者唐代「初唐四傑」之一的駱賓王七歲就能寫出〈詠鵝〉詩篇的故事，純係現代平民百姓的日常生活經驗。
一個是筆者學生時代的指導老師講講他小時候在中國南京發生的事。
他說：鵝很兇惡，很會吮咬人，若被鵝嘴咬到，很難脫身。他小時候經常被鵝追著跑，因為身材矮小腳又短，有幾次跑不及（躲不過），被鵝追上，被鵝嘴狠吮到小腿瘀青，痛得半死，所以他超討厭鵝。有一回，他看到那隻經常欺負他的鵝正好在前面路上大大擺地走著，大好的報仇機會怎能錯過?他一聲不響地從鵝背撲過去，他身體壓著鵝身手捉著鵝脖子，拿一個大石頭將那隻鵝的脖子緊緊壓著，就自顧自地轉身回家去了。沒想到那隻鵝竟然被石頭壓到斷氣死了，鵝主人循線找到他家來大聲痛罵，罵他太差勁，竟將他（鵝主人）辛苦養大準備賣掉賺一筆錢的鵝給搞死了，罵了半天，不過就是要索賠罷了，幸好他家經濟還不錯，不在乎那點錢，最終賠錢了事。
另外一個故事是舍妹中學時親身經歷的，嗯，應該說是親眼看到的事情：家父是鐵路局屏東支線一個車站的副站長，當時家住車站旁鐵路局日治時代建的木造宿舍裡，隔壁住著站長一家人。站長長得人高馬大，看起來有點兇樣（面相嚴肅，罕見笑容），附近的小孩沒有一個不怕他的（人人都怕他）。
二戰後的民國四、五十年代，大家的經濟都不太好，左鄰右舍家家都會養些家禽什麼的，有人養雞鴨，有人養鵝。鵝，比雞鴨滑頭，又會記仇，看到人常會嘎嘎叫緊追不捨，老幼大小都不放過，有時候一個沒提防被牠的扁嘴咬著，那就只能自認倒楣了～
有一回，那個車站站長不知怎麼去招惹或者得罪了鄰居養的一隻大鵝，當他正從家裡出門走路去上班途中，竟被那隻鵝猛咬小腿不得脫身，痛到唉唉叫不停，車站裡兩三個站務員聽到哀叫聲，趕緊出來幫忙解救，才合力將鵝嘴掰開來讓他脫身，那個站長已經急得汗流浹背滿臉通紅了。
舍妹遠遠看到偷笑，一個大男人竟鬥不過一隻家鵝……
舍妹都七十多歲了，可是每次講起這件半世紀前的往事，比手畫腳，眉飛色舞，就像回到中學時代那般「不識愁滋味」的青春樣貌。
