文／黃麗芬

苗栗客人，現下戴臺北市，現職係客語薪傳師、客語教學支援先生（四縣腔）

語言个地位，從來毋單淨係文化問題，顛倒係權力問題。社會上普遍認為英文係行向機會个鎖匙，本土語淨係文化个綴點，恁樣个價值排序，乜在教育體系肚留下難拗轉个觀念。近年來，政府大聲喊講「重視母語教育」，毋過在現實方面，教本土語个先生還係分人看做臨時人力、短期支援，教學現場需要佢兜，其他方面又放任佢兜、無愛去關心佢兜个處境。語言个邊緣化，落尾透過制度反射到人个身項，自然就形塑出一種鏡像關係——語言分人看做毋重要个情況下，連教學先生乜分大家冷落了。

本土語先生个待遇同制度問題，既經毋係新个議題。多數人認為佢兜係「兼任」，嗄當少人知，佢兜乜需要進修、考證照，愛有專業个語言同教學能力。就算恁樣，佢兜大部分淨做得用鐘點同學期聘任个方式聘請，寒暑假無工錢、無法度累積年資，甚至勞健保中斷。教育單位在口頭項講尊重多語，實際上嗄用盡低个標準去保障盡需要穩定同專業支持个教學者。恁樣个結構毋單止拗斷了先生个尊嚴，乜削弱了語言復振个基礎。

這幾隻月來，為著爭取合理个待遇、推動制度改革，煞猛投書、討論、尋支援。有人提議成立「本土語文教師職業工會」，希望做得用集體个力量出聲。雖然講落尾因為人數毋罅暫時結束，毋過這段經歷分𠊎深深體會著：盡難个，輒常毋係自家平常做个事，顛倒係該兜需要靠別儕齊心正做得完成个事。異多人淨會出張嘴嗄毋肯行動，驚驚險險，驚分人貼標頭又愁無法度續聘个風險，甚至連細額个會費乜係阻力。恁樣个人情，斷真像華語講个：「寒天飲水，冷暖自知。」請想看啊！係講無為自家身分尊嚴爭取个勇氣、無團結个力量來支持，任何語言个復振理念都會變做空談，自助人助啊！

語言个價值係對社會投入个資源同信任來个。在教育現場个訊號係「母語課毋係考科，有也好無也好」、「先生有換無換都做得」，學生仔自然感受著本土語个地位毋當其他个科目。長久下來，語言失忒个毋單淨係使用者个認同，還有尊嚴。教育單位若係有心愛推動母語教育，毋係淨在政策文件肚加添「重視」兩隻字定定，還愛有完善个制度設計，同本土語先生个頭路看做係正式教育个一部分——同其他學科个先生共樣，享有同工同酬、學年聘任制同勞動保障。

語言个生命力，毋係在口號肚，係在生活同人个心肝肚。若係大家真心希望細人仔講得出、聽得識、感受得著本土語言个靚，就需要先分本土語先生得著同其他先生同等个尊重同保障。本土語先生係語言復振个推手，語言同先生个運命，本旦就係一體个鏡像：重視本土語教育，制度愛先行在頭前；社會仰般對待教學先生，就決定了本土語言个希望在哪、做得行幾遠。

華語

語言的地位，從來不只是文化問題，反而是權力問題。社會上普遍認為英語是通往機會的鑰匙，本土語只是文化的點綴，這樣的價值排序，也在教育體系中留下難扭轉的觀念。近年來，政府高喊說「重視母語教育」，但在現實層面，教本土語的老師仍被視為臨時人力、短期支援，教學現場需要他們，其他方面又放任他們、不去關心他們的處境。語言的邊緣化，最後透過制度反射到人的身上，自然就形塑出一種鏡像關係——語言被視為不重要的情況下，連教學老師也被大家忽視了。

本土語教師的待遇和制度問題，已不是新的議題。多數人認為他們是「兼任」，卻鮮少人知道，他們也必須進修、考證照，要具備專業的語言與教學能力。即便如此，他們大部分只能以鐘點和學期聘任的方式受雇，寒暑假沒有薪資、無法累積年資，甚至勞健保中斷。教育單位在口頭上說尊重多語，實際上卻用最低的標準去保障最需要穩定與專業支持的教學者。這樣的結構不僅折損了教師的尊嚴，也削弱了語言復振的基礎。

這幾個月來，為了爭取合理的待遇、推動制度改革，努力投書、討論、尋求支援。有人提議成立「本土語文教師職業工會」，希望能以集體的力量發聲。雖然最後因人數不足暫時告終，但這段經歷讓我深刻體會：最難的，往往不是自己平常做的事，而是那些需要靠別人齊心才能完成的事。許多人只會出張嘴卻不願行動，戰戰兢兢，害怕被人貼標籤又擔心無法續聘个風險，甚至連小額的會費也是阻力。這樣的人情，真的像華語說的：「寒天飲水，冷暖自知。」請想想看！若沒有為自己身分尊嚴爭取的勇氣、沒有團結的力量來支持，任何語言的復振理念都會變成空談，自助人助啊！

語言的價值是從社會投入的資源與信任而來。當教育現場的訊號是「母語課不是考科，可有可無」、「老師可換可不換」，學生自然感受到本土語的地位不如其他的科目。久而久之，語言失去的不只是使用者的認同，還有尊嚴。教育單位若有心要推動母語教育，不是只在政策文件裡增加「重視」兩個字而已，還要有完善的制度設計，把本土語老師的工作被視為正式教育的一部分——與其他學科的教師一樣，享有同工同酬、學年聘任制與勞動保障。

語言的生命力，不是在口號裡，是在生活與人的心裡面。若大家真心希望孩子說得出、聽得懂、感受到本土語言的美，就必須先讓本土語老師得到與其他教師同等的尊重與保障。本土語老師是語言復振的推手，語言與教師的命運，本來就是一體的鏡像：重視本土語教育，制度要先走在前面；社會如何對待教學老師，就決定了本土語言的希望在哪、能走多遠。