文／吳美成
台北客家文化基金會客家書院講師， 新北市多所國小、國中、高中客語教師（四縣腔）
2025年年尾，大家正在該暢摸摸仔（註1）準備迎接聖誕夜同過新年个時節，一場得人驚、濫糝㓾人（註2）个捷運罪行，嚇著欸全台灣个人，乜害人開始愁慮在公共場所定著愛隨時提防，細義兜仔正做得。續下來，報出越來越多个微毛末節，社會也對這隻事件開始細思量。雖然這毋係頭一擺捷運㓾人事件，毋過這擺犯人謀當久哩，假使分佢繼續作亂，後果實在毋敢想像。
其中，有關佢分空軍淘汰後犯法，又分法院通緝个歷史，怕乜係佢歸肚屎委屈、無法度控制自家个地雷。毋過，後來大家正知，原來佢從細家庭環境複雜，故所佢正會緊來緊沉淪。為著預防悲劇過來一擺，𫣆俚愛刨根查底，轉到討論人性个源頭，從人文角度來關心：本旦乖巧个細人仔，到底發生了麼个事？仰會變做今下个絕代子？初下碼，佢性體慢慢變樣个時節，敢有人注意著，還過𢯭手佢無？
在犯人个成長故事裡背，𠊎特別關心佢尋頭路个經歷。佢從細就夢想做大廚師，偏偏做工程師个阿爸偏心成績好个阿哥，阿哥為著討厥爸歡喜，也做了工程師，故所，佢做廚師个夢想就破滅忒，顛倒去讀資工系。可能因爭跈毋著（註3）課業，正會選擇去做兵。大家都知，軍事管理較嚴條，性格孤老个佢無法度習慣，嗄來食酒犯法。其實，佢頭下碼淨係因為軍隊生活同想像無共樣，無慣勢定定， 分部隊淘汰後，又因爭違反徵兵法，嗄分政府通緝。表面看來，這種結局斯像當多後生人，從細分家長縱壞後會發生个現象，實際上背後有還較深个家庭問題。
值得同情个係：聽講佢摎爺哀、阿哥完全無溝通，多年來都無來去，可見，佢缺少个堵堵就係天倫之樂同家庭溫暖。今這下嗄變做反社會性人格，無成家庭完全無責任？客家諺語講：「子愛幼時教，竹愛嫩時拗。」（註4）青少年時期个思想受著各種衝擊，對前途當然會疑狐， 世大人愛尊重後生條个性向，適當引導。盡無奈何个係厥爺哀該央時既經離婚，怕也對細人仔無結煞了。
《道德經》講：「清靜為天下正。」現代解釋係強調情緒干擾會使人失去正道，心肝頭愛定疊、平靜無為正合得著「道」个本質，係天下太平个根本。𠊎認為，家庭最大个功能係安慰細人仔著傷个心靈，做佢停陀个港灣，幫助佢避免分情緒左右判斷。恁樣，細人仔正會漸漸習慣這多變个社會，個人同社會乜正做得安寧穩定。
（註1）暢摸摸仔：tiong miaˊ miaˊ eˋ；興高采烈地。
（註2）濫糝㓾人：lamˋ samˋ ciiˇ nginˇ；隨機、無差別地殺人
（註3）跈毋著：tenˇ mˇ doˋ ；跟不上
（註4）子愛幼時教，竹愛嫩時拗：ziiˋoi iu siiˇgauˊ， zugˋoi nun siiˇauˋ。孩子要幼時教育， 正如竹子要嫩時折斷， 否則就來不及了。
華語
2025年年尾，大家正在歡天喜地準備迎接聖誕夜和過新年的時候，一場恐怖、隨機殺人的捷運惡行，嚇到了全台灣人，也令人開始擔憂在公共場所絕對要隨時提防，小心翼翼才行。接下來，報出越來越多細節，社會也對這個事件開始深思。雖然這不是第一次捷運殺人事件，但這次兇嫌預謀很久，假使讓他繼續作亂，後果實在不敢想像。
其中，有關他被空軍淘汰後犯法，又讓法院通緝的暗黑歷史，恐怕也是他滿腹委屈、無法自控的地雷。不過，後來大家才知，原來他從小家庭環境複雜，所以他才會越來越沉淪。為了預防悲劇重演，我們要追根究底，回歸討論人性的根源，從人文角度來關心：原來乖巧的小孩，到底發生了什麼事？他是如何轉變成了一個惡魔的？剛開始，當他個性慢慢變樣的時候，豈有人注意到，或者幫助他嗎？
在兇嫌成長故事裡，我特別關心他找工作的經歷。他從小就夢想做大廚師，偏偏做工程師个爸爸偏心成績好的哥哥，為著討他爸開心，他哥也做了工程師，所以，他當廚師的夢想就破滅了，反而去讀資工系。可能因為跟不上課業，才會選擇去當兵。大家都知道，軍事管理較嚴格，性格孤僻的他無法適應，竟然喝酒犯紀。其實，他剛開始只因為軍隊生活同想像不一樣，不習慣而已， 讓部隊淘汰後，又因違反徵兵法，卻被政府通緝。表面看來，這種結局正如很多後輩，從小被家長寵壞後會發生的現象，實際上背後還有更深的家庭問題。
值得同情的是：聽說他和父母、兄長完全無溝通，多年來都無來往，可見，他缺少的正好就是天倫之樂及家庭溫暖。如今竟變做反社會性人格，難道家庭完全無責任？客家諺語說：「子女要在幼時教導，正如竹子要趁嫩時折斷。」青少年時期的思想受到各種衝擊，對前途當然會迷惘，長輩對年輕晚輩要尊重其性向，適當引導。無奈的是當時他的父母已離異，恐怕也對孩子無可奈何了。
《道德經》說：「清靜為天下正。」現代的解釋是說——情緒干擾會使人失去正道，要內心清淨、平靜無為才符合「道」的本質，乃天下太平之根本。我認為，家庭最大的功能是安慰孩子 受傷的心靈，提供他休息的港灣，幫助他避免被情緒而影響判斷。這樣，小孩才會漸漸適應這多變的社會，個人同社會也才能安寧穩定。
