文／張秀娥，桃園市中壢區人，社區關懷據點、國中小客語支援教師（四縣腔）
拗拗手指，準備有段時間个中心園遊會愛心募款義賣活動，總算愛在天光日鬧熱登場，做隊長个𠊎心肝肚盡期待，乜有兜仔愁，一想著攤仔个事頭，分𠊎歸夜難入覺，就驚無細義睡過䢍，該就漏氣淨淨哩！
壁項老時鐘叮噹叮噹響，催𠊎遽遽好䟘床，伸伸懶筋就愛出發去，無想著一通電話打來講：「頭家娘、頭家娘，還敗勢哦！今晡日禮拜日無人手好𢯭送，若个烰料無辦法摎你送去會場哦！」
麼个！仰會恁樣？一聽著無想恁多，就遽遽喊計程車，原本規劃好七點先到現場，做清點人力、東西个定位，結果人會算天會斷，按算好个時間嗄拖加半點鐘。志工伴仔看著隊長一出現，大家就當歡喜，毋過𠊎看大家緊張到七手八腳，摎恁多箱个東西揙到一團亂，想想佢兜乜係當熱心，就無摎佢兜計較，除了感謝，還係感謝。
這擺活動隊內設有四隻攤仔，有香噴噴仔个烰料，就像薯條、雞肉塊、洋葱圈這兜，愛買个人客排到像人龍；冬瓜茶愛渟茶、愛加冰矻無閒洎杈乜異銷；再過來个二手物品攤仔，全係志工佢兜捐出來个，有衫褲、生活用品、還有細人搞个，從頭到脚項項有，有心來尋一定會揀著寶，人講：惜福、惜物，愛護地球大家都有責任，因為逐個志工好嘴碼、好人緣，歸攤个東西，正過晝定定，都全部賣淨淨，講起來實在有慶。
還有一攤較新色个快炒泡麵，係現下夜市仔，後生人最好乜最有人氣个新炒路，因為現炒菜料多、麵又彈牙，加上志工个好手藝，炒出陣陣餳人个味緒，人客不時行前交關，大家阿腦好食，實在有沙鼻。 因為天時盡舒爽，場所又在老街溪步道脣个大公園，加上園肚遊尞設備異好勢，閒時節來搞尞个大人細子本旦就不少，莫講今晡日有一百攤个大型園遊會，舞台不時放送輕快个音樂聲，喊賣聲、加上人个歡笑聲，歸隻會場鬧熱煎煎。
一陣秋風吹來，一日个活動毋多知就煞棚哩！這群六、七十歲有活力又有熱心个志工伴仔，一直以來係團隊个最大支持力量，為著照顧弱勢家庭兒童，拿出擎鑊鏟个廚藝本事，全力來配合園遊會活動，正會恁圓滿順序，感恩大家个付出，乜祝褔大家永遠有恁康健个身體，繼續來支持下去，承蒙 恁仔細。
華語
屈指一算，準備有段時間的中心園遊會愛心募款義賣活動，總算要在明天熱鬧登場，對隊長我，心裡非常期待，但也有些擔憂，一想到攤位的瑣事，讓我整晚難以入睡，就怕無經意睡過頭，那就糟糕透啦！
牆上老時鐘叮噹叮噹響，催促我快快起床，伸伸懶腰就要出發去，沒想到一通電話打來說：「老闆娘、老闆娘，很不好意思哦！今天禮拜天沒有人手好幫忙送，妳的炸料沒辦法幫妳送去會場哦！」
什麼！怎麼會這樣？一聽到沒想太多，就趕快呼叫計程車，原本規劃好七點先到現場，做清點人力、物件的定位，結果人算不如天算，計畫好的時間卻拖延了半小時。志工夥伴看到隊長一出現，大家就非常高興，不過我看大家緊張到七手八腳，將那麼多箱的東西翻到一團亂，想想她們也是很熱心，就沒有跟她們計較，除了感謝，還是感謝。
這次活動隊內設有四個攤位，有香噴噴的炸料，就像薯條、雞塊、洋葱圈等等，要買的客人排到像人龍；冬瓜茶要倒茶、要加冰塊忙得不可開交也很暢銷；再過來的二手物品攤位，全是志工她們捐出來的，有衣褲、生活用品、還有小朋友玩的，從頭到脚樣樣有，有心來找一定能揀到寶，人講：惜福、惜物，愛護地球大家都有責任，因為各個志工嘴巴甜、人緣好，整個攤位的東西，才過中午，就全部賣光光，說起來實在有厲害。
還有一攤較出色的快炒泡麵，是當今夜市，年輕人最愛也最有人氣的新炒法，因為現炒菜料多、麵又有嚼勁，加上志工的好手藝，炒出陣陣迷人的滋味，客人不時走前關照，大家誇說好吃，實在了不起。 因為天候非常舒爽，場所又在老街溪步道邊的大公園，加上園內遊樂設施良好，平常時來遊玩的大人小孩原本就不少，更何況今天有一百攤的大型園遊會，舞台不時放送輕快的音樂聲，叫賣聲、加上人們的歡笑聲，整個會場熱鬧滾滾。
一陣秋風吹來，一天的活動不知不覺就到尾聲了！這群六、七十歲有活力又有熱心的志工夥伴，一直以來是團隊的最大支持力量，為了照顧弱勢家庭兒童，拿出炒鍋鏟的廚藝本事，全力來配合園遊會活動，才會這樣圓满順利，感恩大家的付出，也祝褔大家永遠有如此健康的身體，繼續來支持下去，謝謝，萬分感謝。
