文／呂秋蓉，桃園市平鎮區人，客語薪傳師，感謝邱鴻春先生指導客語寫作（四縣腔）
這擺避暑對𠊎來講當特別，因為身體个問題，停忒一間國小摎一間國中个工作，專心摎身體顧好，等著恢復後，細人仔安排歸家人去日本沖繩尞，這係𠊎兜第一擺歸家人共下出國，有兩個妹仔一個倈仔，心臼摎兩個孫女，一想著做得摎屋下人共下遊尞，心情係期待又感動。
後生人準備盡周到，早早就買好優待个「早鳥票」，對出發到飛行機場，妹仔摎孫女就叨叨叨叨講無停，一下飛行機來到飯店，外背看起來當派頭，辦理好歇店該下，還送𠊎兜一儕一隻靚靚又得人惜个袋仔，當然兩個細孫女就無，因為該愛打卡正有，變做特別个紀念品。更加分人歡喜个係，飯店逐日朝晨十點到暗哺頭十點，有毋使錢个飲料、麥酒、清酒、冰淇淋摎燒个拉麵，隨在人食，一片食零嗒一片閒尞來打嘴鼓。間房光線好，眠床一儕一頂，毋會忒硬也毋會忒軟，在這間飯店連戴三暗哺，開始輕鬆自在个行程。
打早就坐捷運地鐵，開始探訪異餳人个沖繩，看這恁多人相賽愛來逛个鬧熱商圈，摎恬靜个山頂風景，去海脣踏浪吹風，去半山排咖啡廳，還特別造訪當有名个大嘴鳥咖啡，看啊去淰念个人，全部係當好翕相个所在，在輕快舒適个腳步下，食著香香甜甜又有多少仔酸甘个飲料，黏時會尋尾。這位街路淨利，交通標誌利便，還做得自家撳，分細巷仔過路人安心行，最分人阿腦个係，無論麥當勞抑係燒肉店，便所全都係免治馬桶，分人感受著衛生、淨俐又貼心。
逛街使錢買東西摎食好料，嗄做得輸人？兩個孫女暢到放勢牯尋運動鞋，異好福氣，兩儕都擇著合意个尺寸摎款式，𠊎乜𢯭眾買了一雙，價數比臺灣便宜，𠊎兜賺著了。講著食乜愛煞手，人講：食飯皇帝大，後生仔早就上網尋哪間居酒屋較特別，哪間燒肉較好食，拉麵醹又香个湯頭分人食到啐啐滾，麥酒透心涼，逐路菜都恁餳人食，正經讀萬卷書毋當行萬里路。
回想出發前，大妹仔特別換了二十萬日本錢，還像過年分紅包樣仔，逐儕先分一萬，儕儕暢到耐毋得，心肝肚淰淰幸福个滋味。
這輪沖繩旅行，分𠊎深深感受著家个溫暖，看著細人仔成家立業，還會想著來陪伴𠊎照顧𠊎，實在當感動又安慰，歸路仔有講有笑當歡樂，親像一粒粒珍珠，桊起來變一條金晶積亮个䯋鍊，這毋單止係一段旅行，更加係有錢買毋著个最珍貴回憶。你有試著無？
華語
這次暑假對我來說很特別，因為身體的問題，停掉一所國小一所國中的工作，專心把身體顧好，等到恢復後，小孩安排全家到日本沖繩玩，這是我們第一次全家一起出國，有兩個女兒一個兒子，媳婦和兩個孫女，一想到可以大家一起旅遊，心情既期待又感動。
年輕人準備周詳，提早就買好有優惠的早鳥票，從出發到機場，女兒和孫女就吱吱喳喳講不停，一下飛機來到飯店，外觀看起來非常氣派，辦理好住宿時，還送我們一人一個漂亮又可愛的袋仔，當然兩個小孫女是沒有的，因為那要打卡上傳才有的，變成特別的紀念品。更讓人高興的是，飯店每天早上十點到晚上十點，都有免費的飲料、啤酒、清酒、冰淇淋和熱的拉麵，無限量供應，一邊吃零食一邊悠閒地聊天。房間光線很好，床是一人一頂，不會太硬也不會太軟，在這間飯店連住三晚，展開輕鬆自在的行程。
一大早就搭地鐵，開始探訪耐人尋味的沖繩，看看這這麼多人來朝聖的熱鬧商圈，和恬靜的山頂風景，去海邊踏浪吹風，去半山腰的咖啡廳，還特別造訪當地有名的大嘴鳥咖啡，看過去滿滿的人，全都是最佳拍照打卡景點，在輕快舒適腳步中，嚐到香香甜甜又有些許酸甘的飲料，馬上渾然忘我。這裡街道乾淨，交通標誌便利，還可自己按，給小巷子用路人安心走，最值得誇讚的是，不論麥當勞或是燒肉店，廁所全都是免治馬桶，給人感受到衛生、整潔又貼心。
逛街花錢買東西和吃美食，哪能墊後？兩個孫女樂得飛奔似的尋找運動鞋，運氣真好，兩位都挑選到合適的尺寸和款式，我也不免俗買了一雙，價位比臺灣便宜，我們賺到了。說到吃也要動作快，人說：吃飯皇帝大，年輕人老早就上網谷歌哪家居酒屋較特別，哪家燒肉好吃，拉麵的濃郁湯底讓人吃到滋滋作響，啤酒冰涼舒心，每道菜都很誘惑，真是讀萬卷書不如行萬里路。
回想出發前，大女兒特別換了二十萬日幣，很像過年發紅包的樣子，每人先發一萬，個個樂得不可開交，心裡頭滿滿的幸福滋味。
這趟沖繩之旅，讓我深深感受到家的溫暖，看到孩子成家立業，還會想到陪伴我照顧我，是既感動又安慰，一路上有說有笑很歡樂，就像一顆顆珍珠，串起來變一條閃耀的項鍊，這不僅是一段旅行，更是無價的最最珍貴回憶。你是否有同感呢？
