文／廖佳仁（海陸豐野客），中壢客人，楊梅富岡（伯公岡）出生、於桃園市中壢區新街國民小學任教36年退休，目前任桃園市新楊平社區大學地方知識學發展中心研究員兼主任（海陸腔）

今年係1895年乙未戰役个第130週年紀念，這下大家都知个胡嘉猷（1839〜1920），人全喊佢胡老錦、胡阿錦，係在清光緒21年（1895，日本明治28年，乙未年）甲午戰爭結束，清日兩國簽訂講和條約將臺灣、澎湖割讓分日本後个6月28摎7月初1，發生在桃澗堡安平鎮摎日本近衛師團个戰鬥裡肚，日本人認定个「賊頭」，係臺灣民主國義民軍在安平鎮在地个行頭人，佢个軍師摎副手係黃娘盛（黃念初）。

6月28該量時，日軍近衛師團个三木大隊由中壢兵站出發，先去攻打位在瓦窯湖个黃娘盛伙房屋。黃娘盛个伙房屋外雖然有該烏麻戰笪个竻竹風圍圍等，毋過經過日軍个攻擊之後，就連伙房屋都共下分火燒忒，日軍臨晝仔就轉到中壢兵站去歇睏。又經過兩日个情報收集、作戰計畫摎物資整補以後，日軍在七月初一打早，又過一擺順等劉銘傳鐵道出兵去安平鎮攻打胡嘉猷个伙房屋，因為胡嘉猷毋單淨係這隻地方个「賊頭」，有大量个兵力自重以外，還過有大炮，日軍毋敢大意，這擺特別摎炮兵、工兵共下出陣。

起頭，日軍炮兵摎山炮拉到這下楊梅埔心「茶葉改良場」後山个「虎頭岡」頂去炮打胡嘉猷个伙房屋，步兵、工兵摎衛生兵這兜乜偎兼包圍胡嘉猷个伙房屋，等炮打煞以後，黏時就對佢進攻。毋過胡嘉猷个防禦比黃娘盛伙房屋个還較嚴條，日軍在虎頭岡頂高个炮擊，效果毋好，等炮彈打煞後，日軍黏皮徙移陣地，摎大炮拉到胡嘉猷伙房屋附近个高梘頭祠後背，等下後个炮彈火藥對中壢兵站補給到咧過後，續下來又正過繼續去槓胡嘉猷个伙房屋。

第二擺炮擊過後，義民軍全撤轉胡嘉猷个伙房屋裡肚去固守，日軍工兵去放帶等个炸藥包炸胡嘉猷伙房屋个門樓，等門樓大門分佢兜一炸爛忒，日軍步兵、工兵登時就當勇敢想愛衝入胡嘉猷个伙房屋裡肚去，無想著，嗄分囥在屋肚个義民軍對銃眼、牆頭裡肚向外銃殺，這擺个戰鬥造成日軍戰死步兵5儕、工兵6儕，戰傷20儕，經衛生兵簡單戰地急救包傷過後，到臨暗仔正跈大隊人馬撤轉中壢兵站。

過後，胡嘉猷伙房屋裡肚个義民軍因為大門、屋舍分人炸爛忒，竻竹風圍分火燒忒，水井乜分人炸壞淨淨，已經無險好掌咧，就在日軍撤離个該暗晡，利用天烏地暗，摸烏經八張犁向龍潭撤走。第二日朝晨，日軍再過派人來查探後正發現，胡嘉猷伙房屋裡肚早就無半個人咧，故所，日軍認定安平鎮暫時安定，鐵道運輸、通信應該安全毋使愁咧。

以上，係𫣆俚一般人所知个胡嘉猷，佢係一隻因為繼承做銅匠个阿爸胡珠光正得著五品軍功名號，正會在清光緒21年（1895）在安平鎮帶領臺灣民主國義民軍迎戰日軍个頭人，算係當時一隻在地个英雄好漢，無幾久後就內渡轉唐山去了。

華語

今年是1895年乙未戰役的第130週年紀念，現今眾人熟知的胡嘉猷（1839〜1920），人都稱他為胡老錦、胡阿錦，是在清光緒21年（1895，日本明治28年，乙未年）甲午戰爭結束，清日兩國簽訂媾和條約將臺灣澎湖割讓給日本後的6月28日與7月01日，發生在桃澗堡安平鎮與日本近衛師團的戰鬥裡，日本人認定的「賊首」，臺灣民主國義民軍在安平鎮的在地領頭人，而其軍師與副手則為黃娘盛（黃念初）。

6月28日那時，日軍近衛師團的三木大隊由中壢兵站出發，先去攻打位於瓦窯湖的黃娘盛宅。黃娘盛宅外雖有濃密刺竹林圍繞，但經日軍攻擊以後，就連同房屋一起遭火焚毀，日軍隨即於中午前返回中壢兵站休息。又經兩日的情報蒐集、作戰計畫與物資整補之後，日軍於7月1日一早，再度沿劉銘傳鐵道出兵前往安平鎮攻打胡嘉猷宅，因胡嘉猷為該地「賊首」且擁兵自重外，還有火炮，日軍不敢大意，這回特地偕同炮兵、工兵一同出擊。

首先，日軍炮兵將山炮拉至現今楊梅埔心「茶葉改良場」後山的「虎頭岡」上去炮擊胡嘉猷宅，步兵、工兵及衛生兵等也迫近包圍胡嘉猷宅，待炮擊結束後馬上對其進行進攻。但胡嘉猷宅的佈防比黃娘盛宅更加嚴密，日軍在虎頭岡上的炮擊，效果不佳，待炮彈射完後，日軍隨即轉移陣地，將大炮移轉至胡嘉猷宅附近的高梘頭祠後，等後續彈藥從中壢兵站補給到位後，接著才再繼續炮轟胡宅。

第二次炮擊後，義民軍都撤回胡嘉猷宅裡固守，日軍工兵則攜帶炸藥包前去爆破胡宅大門門樓，爆炸破門後，日軍步兵、工兵欲衝入胡宅之際，不料，反而遭到躲藏在宅裡義民軍從銃眼、牆垛對外射殺，此役造成日軍戰死步兵5人、工兵6人，戰傷20人，經衛生兵戰地急救包紮後，至傍晚才隨大隊人馬撤回中壢兵站。

之後，胡嘉猷宅裡之剩餘義民軍因大門、房舍遭攻破，刺竹圍被焚，水井也被炸毀，已無險可據下，趁日軍撤離那晚，利用夜色昏暗，摸黑經八張犁往龍潭陂撤離。次日一早，日軍再派人前往偵查後才發現，胡宅早已人去樓空，因此，日軍認定安平鎮暫時底定，鐵道運輸與通信應該安全無虞了。

以上，是我們一般人所熟知的胡嘉猷，他是一個因繼承身為銅匠的父親胡珠光而獲有五品軍功的頭銜，才會在清光緒21年（1895）在安平鎮帶領臺灣民主國義民軍迎戰日軍的頭人，算是當時一位在地的英雄好漢，不久之後即內渡回大陸去了。