文／邱秀坊，高中、國中、幼兒園客語先生摎客語薪傳師，屏東客家人，這下歇板橋（南四縣腔）
細朋友在攤位前問頭家娘：「今晡日有賣麼个菜？」頭家娘回講：「今晡日有菜瓜、番瓜、芹菜、蕃薯葉，吊菜仔、角菜、還有高麗菜…等等。」細朋友又再問頭家娘：「一斤菜瓜幾多錢？」頭家娘回：「一斤菜瓜十個銀。」
上面个對話毋係在菜市場，係在私立忠山幼兒園客語沉浸式个情境教室。
由𠊎在上課前準備這兜材料，先將教室布置做忠山市場攤位，裡背肚有以上个菜，還有玩具店个塑膠幣，分細朋友學習買菜用，毋單淨認識菜名，乜在付款時節，有銀角仔个錢好體驗學習，從日常生活用語，透過輕鬆生趣个互動對話，融入情境肚學客家話。
客語沉浸教學，係一種用客語做溝通教學工具个教學模式。這種教學方法个目的，係幫助細朋友，在一隻真實世界个情境中學習客語，分學習者做得遽遽、自然來學。在課堂上教細朋友念數字，會念數字以後當好用，順續教佢兜看日誌，像今晡日係九月二十六號拜五，昨晡日係九月二十五號拜四，天光日就係九月二十七號拜六，接等九月二十八號教師節，禮拜一，補假尞三日。
上市場買菜，除忒認識青菜个詞彙，銀角仔乜愛教，一個銀、五個銀、十個銀、五十個銀，看等佢兜認真學習客語，在輕鬆無負擔个情況下來聽、講，在趣味中認識客家語言摎文化个靚。透過活動無形中提升講客語个興趣摎自信心，帶動了客家文化个傳承，同時乜學習著基本个數學。
深耕客家樹秧，向下釘根。客委會鼓勵，報名參加幼幼客語闖通關个細朋友，有一份獎勵品同頒發參加證書，透過闖五關、搞遊戲个方式學習客家話，認識客家文化。各項闖關活動，對細朋友个認真表現，先生相賽就講「蓋慶哦！」。拿著成長階段第一張證書，多一種語言就係多一種能力，自家乜當有成就感，分細人仔自然又主動學會客家話。
母語个傳承，愛靠學校、家庭、社區共下來做，營造出一隻完全沉浸式个客語學習環境，正做得落實客語生活化，傳承客家語言文化。新北市私立忠山幼兒園園長練素琴先生，係苗栗出身个客語薪傳師，長期努力推動「客語沉浸教學」，輒輒自家出錢買獎勵品分細人仔，實實在在就係客家文化深耕个最湛代表。
華語
小朋友在攤位前問老闆娘：「今天有賣什麼菜？」老闆娘回說：「今天有絲瓜、南瓜、芹菜、蕃薯葉、茄子，菠菜、還有高麗菜…等等。」小朋友又再問老闆娘：「一斤絲瓜多少錢？」老闆娘回：「一斤絲瓜十元。」
上面的對話不是在菜市場，是在私立忠山幼兒園客語沉浸式的情境教室。
由我在上課前準備這些材料，先將教室布置成忠山市場攤位，裡面有以上的菜，還有玩具店的塑膠幣，給小朋友學習買菜用，不但認識菜名，也在付款的時候，有硬幣可以體驗學習，從日常生活用語，透過輕鬆有趣的互動對話，融入情境裡學客家話。
客語沉浸教學，是一種用客語為溝通教學媒介的教學模式。這種教學方法的目的，是幫助小朋友，在一個真實世界的情境中學習客語，給學習者很快、自然來學。在課堂上教小朋友念數字，會念數字以後很好用，順便教他們看日曆，如今天是九月二十六日星期五，昨天是九月二十五日星期四，明天就是九月二十七日星期六，接著九月二十八日教師節，星期一，補假連放三天假。
上市場買菜，除了認識青菜的字彙，錢幣面值也要教，一元、五元、十元、五十元，看到他們認真學習客語，在輕鬆沒有負擔的情況下來聽、說，在趣味中認識客家語言與文化的美。透過活動無形中提升說客語的興趣與自信心，帶動了客家文化的傳承，同時也學習到基本的數學。
深耕客家幼苗，向下扎根。客委會鼓勵，報名參加幼幼客語闖通關的小朋友，有一份獎勵品和頒發參加證書，透過闖五關、玩遊戲的方式學習客家話，認識客家文化。各項闖關活動，對小朋友的認真表現，老師大家都讚揚說「很棒哦！」。拿到成長階段第一張證書，多一種語言就是多一種能力，自己也很有成就感，給小朋友自然又主動學會客家話。
母語的傳承，要靠學校、家庭、社區一起來做，營造出一個完全沉浸式的客語學習環境，才可以落實客語生活化，傳承客家語言文化。新北市私立忠山幼兒園園長練素琴老師，是苗栗出身的客語薪傳師，長期努力推動「客語沉浸式教學」，常常自己掏腰包買獎勵品給小朋友，實實在在就是客家文化深耕的最佳代表。
