文／張秀娥，桃園市中壢區人，社區關懷據點、國中小客語支援教師，感謝邱鴻春先生指導客語寫作（四縣腔）
今晡日天時異翕熱，臨晝來到基金會，交辦好隊内事務，一出門就看著𠊎个車脣，企等熟事20零年个老先生，著等掣仔鞋、雙手插腰仔、褲還長短脚，頭那臥天享受食菸个興頭，𠊎毌敢大聲喊，輕輕在厥背項講：呂大哥，還樂線還幸福哦！佢驚著轉頭大聲講：咦！大家講你出國去，毋係過身去哩？𠊎就順厥話，雙手合掌，阿彌陀佛，𠊎去做仙又倒轉來哩！兩儕笑著腰仔就伸毋直，敗勢，敗勢，還敗勢，做得看著你實在當歡喜。
講起來乜係啦，一出國就五十零日，滿女在厥爸愛離開該下，有答應佢，無論日後有麼个變化，一定會摎阿姆照顧好，想著妺仔一片孝心，正會趕避暑時節，一儕人擐等包袱仔，來到生份个米國尞。
打早在異鄉，雖然講係六月天，毋過異舒爽，故所逐日定著會去運動坪行行捩捩啊，雖然一儕人有息仔孤栖，毋過看著有來自各國个人，膚色、語言無共樣，試著異生趣。堵好有張凳仔就坐下來，當在該目眨眨仔，享受微風帶來清涼个滋味，一聲，你早呀！哦！係一個看起來八十零歲个老先生，身體還異砸，𠊎暢一下，有人好打嘴鼓哩！𠊎紹介自家來自臺灣，老先生講：臺灣係好地方，臺灣人當有錢，乜聽講係老人家个天堂。無一下仔又一群人偎過來，原來係共樣當好運動个華裔米國人，細細就跈等爺哀逃難來到這位，儕儕就有心酸艱苦个生命歷程，𠊎恬恬仔聽，心肝肚乜非常欽服，為著生存牙根咬等，在這垤土地上，結婚、降子、成長，到今逐個就做阿公阿婆哩！
人生就恁樣，艱苦乜過去哩！咦！有人講客，煞煞行前去講：𠊎乜係客家人，祖先來自廣東梅縣，佢講係福建汀州，毋過客話大體毋曉得講哩！𠊎試著這毋知麼个緣份，原旦淨來這運動，無想著分𠊎認識這兜人，就像多年無見个老朋友樣，自然融入這隻圈仔，今後个日仔毋會過再孤栖哩！
在寫這文稿，手機仔叮噹響起，打開一看，係遠在他鄉－西雅圖个朋友，發來个客語詩詞：人走千里情份在，水流千里總歸海，大樹之間根相連，朋友之間緣來牽。恁入心个手筆，這份情緣就像點起𠊎个心頭燈，在有限个人生，勇敢向前个助力，正經當感心、當感謝！
華語
今天天氣異常的悶熱，近午時分來到基金會，交辦好隊内事務，一踏出門就看到我的車旁，站著熟識20多年的老先生，穿著夾脚拖鞋、手插著腰，褲子竟還長短脚，頭仰望著天空享受著吞雲吐霧的自在，我不敢大聲喊，輕輕在他背後說：呂大哥，很瀟灑很幸福喔！他嚇得回頭大聲說：咦！大家說妳出國去，不是過世了？於是我就順他的話，雙手合掌，阿彌陀佛，我去做仙又回來了哩！兩個人笑到腰都伸不直，對不起，對不起，真的對不起，可以看到妳實在很高興。
說起來也是啦，一出國就五十多天，小女兒在她爸爸即將離開的時候，有答應他，無論日後有什麼變化，一定會把媽媽照顧好，想到小女兒一片孝心，才會趁暑假期間，一個人拖著行李箱，來到陌生的美國旅遊。
在異鄉的一大早，雖然說是六月天，不過非常舒爽，所以每天一定會去運動場走走轉轉，雖然一個人有些孤獨，不過看到有來自各國的人種，膚色、語言不一樣，感覺挺有趣。剛好有張椅子就坐下來，當在閉目養神享受著微風帶來清涼的滋味，一聲，妳早呀！哦！是一位看起來約八十多歲的老先生，身體還很硬朗，我樂了一下，有人可以聊天哩！我介紹自己來自臺灣，老先生說：臺灣是好地方，臺灣人很有錢，也聽說是老人家的天堂。沒ㄧ會兒又一群人靠過來，原來是同樣熱愛運動的華裔美國人，小小年紀就跟著爸媽逃難來到這裡，各個都有辛酸血淚的生命歷程，我靜靜的聽，心裡頭非常佩服，為了生存咬緊牙根，在這塊土地上，結婚、生子、成長，到今天每個都當爺爺奶奶了。
人生就這樣，艱苦也過去了、咦！有人說客家話，急忙上前去說：我也是客家人，祖先來自中原梅縣，他說是福建汀州，不過客家話大都不會說了，我覺得這不知什麼緣份，原是單純來這裡運動，沒想到卻讓我認識了這些人，就像多年沒見的老朋友般，自然地融入了這個圈子，今後的日子不會再孤獨了。
在寫這文稿，手機叮噹響起，打開一看，是遠在他鄉－西雅圖的朋友，發來的客語詩詞：人走千里情份在，水流千里總歸海，大樹之間根相連，朋友之間緣來牽。如此暖心的手筆，這份情緣就像點起我心頭燈，在有限的人生，勇敢向前的助力，真的很感謝、很感恩！
