文／葉金華，國小低年級導師，新竹客家人，這下戴台北市（四縣腔）
避暑正過啊忒，全國个各級學校也陸陸續續開學咧！ 亻厓在小學教學，兩年一輪在八月初愛拈鬮仔抽學生仔，同事之間相堵頭會相借問講「今年若手氣仰仔？敢有去拜喏？班項有幾多隻特殊學生仔呢？」
當多先生會去敬神，希望堵著受教个學生、較好溝通个家長；盡多學生仔个家長也會去求神拜佛，祈求細人仔做得堵著有耐心、字墨飽又有愛心个好先生。有先生分享：「前年 亻厓點了五盞光明燈，結果班項來了五隻神奇寶貝，有動啊著就火屎燦天个、有一試著壓力忒大就會傷害自家个、有嬌尸撥撥會打潑賴个、有上課異好同人打嘴鼓講該兜不搭不膝个，還有課堂肚會儘採行來行去个……，逐日上課都無結無煞，好得有輔導室𢯭手，正做得平安度過這兩年。正經係緣分啊！閃都閃毋得過，無法度強求。」
斷真，人摎人之間个緣份當奇妙，「有緣千里來相會，無緣對面毋相識」，天公伯毋會好恬恬仔摎這隻小朋友放在若班項，所有个事情背後定著有美好个計畫，有功課愛分你去學習。
毋管堵著仰仔个學生、教著仰仔个班級，吾爺哀總係勉勵 亻厓愛做一個有愛心、有溫度、有同理心，會關懷學生个先生。頭擺吾爸還在个時節，輒輒會提醒 亻厓「食人俸祿，工夫愛做足，你愛『敬業樂群』啊！愛摎學生仔看做係自家个細人仔，用心關心每一個學生仔，毋好偏心，更加做毋得歪心哦！」
今年吾學校受少子化影響減班，一年生伸十班，細倈學生比細妹學生多加五十零儕。吾班項有28個个學生仔，17隻細倈仔、11隻細妹仔，裡背係單丁子、獨生女个就有9儕，佔三股一股。八月30拜六該日新生入學，家長、學生仔通棚都來咧，摎歸間教室尖到淰淰，鬧熱煎煎，當有人氣。
教學毋係淨係學校愛負責个，有盡多地方需要家長、社會共下合作。今年起勢教育部推廣SEL-社會情緒學習課程，輔導室規畫一個專業社群，愛請心理師帶先生共下參加一系列个相關成長課程，分 亻厓盡期待。
雖然後疫情時代教學現場出現盡多問題， 亻厓相信「有心黃金土」，只愛大家共心，所有个事情定著都做得順利過關。
華語
暑假才過完，全國各級學校也陸陸續續開學了！我在小學教學，兩年一輪在八月初要抽籤抽學生，同事之間遇到會互相問候說「今年你的手氣如何？可有去拜拜？班上有幾個特殊學生呢？」
很多老師會去拜神，希望遇到受教的學生、較好溝通的家長；非常多學生的家長也會去求神拜佛，祈求小孩可以遇到有耐心、有學問又有愛心的好老師。有老師分享：「前年我點了五盞光明燈，結果班上來了五個神奇寶貝，有動不動就暴走的、有一感到壓力太大就會自我傷害的、有驕縱慣了會耍無賴的、有上課喜好和人聊天講一些天馬行空的事情的，還有課堂裡會隨意走來走去的……，每日上課都不知該如何是好，幸好有輔導室幫忙，才得以平安度過這兩年。真正是緣分啊！閃都閃不過，無辦法強求。」
果真，人和人之間的緣份很奇妙，「有緣千里來相會，無緣對面不相識」，老天爺不會無緣無故把這個小朋友放在你的班上，所有的事情背後一定有美好的計畫，有功課要讓你去學習。
不管過到什麼樣的學生、教著什麼樣的班級，我的父母總是勉勵我要做一個有愛心、有溫度、有同理心，會關懷學生的老師。以前我的爸爸還活著的時候，常常會提醒我「拿別人的薪水，幫別人做事，就要盡心盡力做到好。你要『敬業樂群』啊！要將學生看做是自己的小孩，用心關心每一個學生，不要偏心，更不可以壞心哦！」
今年我的學校受少子化影響減班，一年級剩十班，男學生比女學生多五十多。我的班上有28個學生，17個男生、11個女生，裡面是獨生子、獨生女的就有9位，佔三分之一。八月30星期六那天新生入學，家長、學生仔全部都來了，把整間教室擠得滿滿，鬧熱非凡，很有人氣。
教學不單單是學校要負責，有非常多地方需要家長、社會一起合作。今年開始教育部推廣SEL-社會情緒學習課程，輔導室規畫一個專業社群，要請心理師帶老師一起參加一系列的相關成長課程，讓我非常期待。
雖然後疫情時代教學現場出現很多問題，我相信「精誠所至，金石為開」，只要大家同心，所有的事情一定都可以順利過關。
