文／黃麗芬，苗栗客家人，現居台北市，國小、國中、高中客語教學支援老師與客語薪傳師（四縣腔）
做教學支援先生十過年來，教師節對大部分教學支援先生來講，總係恬恬仔過忒——無政府慰勞，乜無學校个禮金抑係禮物。𠊎兜習慣在教育現場恬恬仔付出，毋過心肝肚輒常疑狐：𠊎兜到底算係先生無？𠊎兜有分人看著無？
一直到幾年前，去到基隆市南榮國小教書。該年，係𠊎第一擺領著政府發个教師節禮金——三百個銀个便利商店禮券。該份薄薄个卡片（禮券），嗄分𠊎感受著毋識有个重，該毋係錢多少个問題，顛倒係一份「總算分人想著」个燒暖。
𠊎同禮券交分阿姊，共下帶等阿姆去便利商店食咖啡來調整心情。該央時，阿爸正過身七隻零月，屋下人還在悲傷當中行毋出來。 阿姆兜起該杯咖啡个時節，講：「承蒙基隆市政府記得教學支援先生，乜承蒙學校痛惜厥妹仔（𠊎）。」就在該下，𠊎看著阿姆眼珠裡背𥍉過个感動，阿姆甚至想，係講阿爸還在，定著會試著欣慰，因為退休先生个佢盡清楚教學支援先生在現場个艱苦。
三百個銀，無多，毋過當重要。佢毋單淨係一份禮券，更加係一份肯定，一種「分人記得」个提醒。自從該擺以後，屋下人就輒常帶等阿姆共下去食咖啡，恁樣細細个幸福感，其實係該份禮券點著个延續——感恩同想念，乜分屋下人个心緪緪連共下。
愛打動教學支援老師个心，其實當簡單：一句相借問、一張卡片、一份真誠个肯定，就做得分𠊎兜感受著分人尊重。毋過還較重要个，還係制度个保障。係講教學支援先生做得得著應該有个支持同待遇，𠊎兜就做得安心教學，繼續為本土語同和學生仔煞猛打拚。𠊎兜毋驚辛苦，就驚付出个心無人認同。
教師節會到了，政府單位，正經有想著𠊎兜教支先生無？𠊎兜無需要華麗个禮物抑係掌聲，淨希望分人理解、分人尊重，還有完善个制度來支持。三百個銀个禮券提醒𠊎兜：恬恬仔付出个日仔，還有人看著同關心。希望這份燒暖做得變做逐個教學支援先生个日常，毋係成時正會有个歡喜。
華語
成為教學支援老師十多年來，教師節對大部分教學支援老師而言，總是靜悄悄地過去——沒有政府慰勞，也沒有學校的禮金或禮物。我們習慣在教育現場默默付出，但心裡常常有個疑問：我們到底算不算老師？我們有沒有被看見？
直到幾年前，我到基隆市南榮國小任教。那一年，是我第一次領到政府給的教師節禮金——三百元的超商禮券。那份薄薄的卡片(禮券)，卻讓我感受到前所未有的重量，那不是金額多寡的問題，而是一份「終於被想到」的溫暖。
我把禮券交給姊姊，一起帶著媽媽去超商喝咖啡調適心情。當時，爸爸才剛離世七個多月，家人仍沉浸在悲傷之中走不出來。 媽媽端起那杯咖啡時，說：「謝謝基隆市政府記得教學支援老師，也謝謝學校疼惜她的女兒（我）。」就在那一刻，我看見媽媽眼神裡閃過的感動，媽媽甚至想著，如果爸爸還在，一定會感到欣慰，因為退休老師的他最清楚教學支援老師在現場的辛苦。
三百元，不多，但很重要。它不只是一份禮券，更是一份肯定，一種「被人記得」的提醒。從那次以後，家人便經常帶著媽媽一起去喝咖啡，這樣的小確幸，其實是那份禮券點燃的延續——感恩和想念，也讓家人的心緊密連在一起。
要打動教學支援老師的心，其實很簡單：一句問候、一張卡片、一份真誠的肯定，就能讓我們感受到被尊重。但更重要的，還是制度的保障。如果教學支援老師能獲得應有的支持與待遇，我們就能安心教學，繼續為本土語和學生努力。我們不怕辛苦，只怕付出的心沒有人認同。
教師節快到了，政府單位，真的有想到我們教支老師嗎？我們不需要華麗禮物或掌聲，只希望被理解、被尊重，以及有完善的制度來支持。三百元的禮券提醒我們：默默付出的日子裡，仍有人看見與關心。希望這份溫暖能成為每位教學支援老師的日常，而非偶爾才會有的開心。
