文／蕭宥，台東客家人，吾婆係南投國姓客家人。現下戴台東（四縣腔）
今年八月，由客家委員會主辦个 「海內外客家後生交流營」 在臺灣舉辦，串連在臺灣南北、甚至國外个一群後生人，共下行入臺灣山林、行入社區，重新發現「客家」在佢兜生命肚个重量。來自十二隻國家个客家青年，佢兜透過「一日一主題」个行程，對認識客家源頭開始，再到社區營造、山林保育、地方創生，在行動肚了解文化个內涵。
有一日个行程，係去行「樟之細路」，乜係交流之後當多青年印象深刻个部分。大家揹等簡單个日常用品，行過彎彎斡斡个山路，在專業先生个指導之下，歸隻團隊共下修整完整个步道，腳步雖然沉重，有兜青年乜有略略仔翕著个情形，但係大家還係煞猛緊做，最尾乜成功做出咧佢兜自家个步道，對手巴掌摸著自然材料个感覺，體會在打造步道个時節，愛尊重環境同自然生態个道理，還有團隊合作完成任務个成就感。
另外，在隔日行程肚還有茶文化體驗个活動，逐儕人身體磬磬、親手摘茶，過體驗做茶个過程，參訪茶文化館，最尾體驗做擂茶。在茶香裡肚，有人想起以前食過个擂茶，有人關心北部个茶產業，乜有人係第一擺理解「一杯茶就係一段歷史」。
下後行讀羅屋書院同關西地區，認識文化修復同地方發展个時節，除忒聽羅屋老屋跡个紹介，青年乜對田項个細路，行入齊齊正正个田中央，感受生態帶來个生命力同羅屋庄个自然純樸，一聲又一聲羅屋主人个歌聲，嗄同無熟事个青年漸漸仔連結起來。後來，佢兜乜有去到李記豆油，體驗做無加添食品加添物个天然豆油，了解在這時代之下珍貴个康健觀念同食个安全。
後來，這兜客家後生人在龍潭鍾肇政園區這搭仔進行文學摎生活導覽，去尋客家語言文化同日常个連結，還有聽在地个青年人分享轉到故鄉做地方創生个例仔，乜鼓勵這兜客家青年，做得透過自家个力量，為自家生活个所在帶來無共樣个正向轉變。
到新城社區體驗農事个活動，感受客庄社會關懷該下，青年乜多多少少在同老人家互動个過程，看著了屋下世大人个影仔，雖然使用个語言（客話、華語、英文）可能無共樣，但係透過跨世代互動交流，乜分青年佢兜發現咧地方創生保留下來珍貴个語言同文化，還有做得對老人家身項學著人生大細事。除忒同老人家互動，最尾一日來到楊梅个沉浸式客話小學个時節，青年乜同當地學生仔共下參加手做活動，透過多元互動个教學方式，分語言交流摎文化傳承融合，毋單止向上學習，乜向下傳承。
這擺交流个過程，毋單淨係知識个學習，乜過較帶動咧心靈个震動。
來自西班牙个黃同學講：「從細無法度向朋友解釋『麼个係客家』，這擺盤過半隻地球轉臺灣參加營隊，𢯭手𠊎尋轉了自我認同，乜交著當多朋友。」
還有來自日本个青年分享：「初下碼對客家無熟事同疑狐，但係在營隊肚漸漸愛著客家文化，乜計畫同這份熱情帶轉日本分享。」
臺灣在地个後生仔，也因為海外青年个熱情，開始想愛㧡起文化傳承个責任、寫出自家在這垤土地个故事。有人偷偷捽目汁，也有人伸手扼等脣邊人个手，該央時，實現咧𨃰過世代同國界个心靈相通。
有人講這係「尋根之旅」、有人講這係「未來个開始」。無論仰般，目珠有共樣金金个光，係來自世界各地个後生仔，打開个新个連結。佢兜帶等笑聲、目汁同應承，過一擺分散到世界各隻位所，乜帶走了一份過較深个感覺——該係無論在哪位，因為共樣个根、生根開椏，心肚總有一垤土地，安到「客家」。
華語
今年八月，由客家委員會主辦的 「海內外客家後生交流營」 在臺灣舉辦，串連在臺灣南北、甚至國外的一群青年，共同走入臺灣山林、社區，重新發現「客家」在生命中的重量。來自十二個國家的客家青年，透過「一日一主題」的行程，從認識客家的源頭開始，再到社區營造、山林保育、地方創生，在行動中理解文化內涵。
當時有個行程，是前往「樟之細路」，也是在交流後，讓許多青年都印象深刻的部分。揹著簡單的日常用品，走過彎彎曲曲的山路，並在專業職人的指導下，由團隊共同修建完整的步道，腳步雖然沉重，有些青年也陸續出現輕微中暑的情形，但是他們還是埋首進行步道修建，最後也成功做出數與他們的步道，從手掌接觸天然材料的感覺，體會在打造步道時，尊重環境與自然生態的道理，還有團隊合作完成任務所帶來的成就感。
除此之外，在隔日行程中還有茶文化體驗的活動，每個人親自彎腰摘茶，再體驗製作茶葉的全過程，參訪茶文化館，最後體驗製做擂茶。在茶香中，有人想起從前喝過的擂茶，有人關心北部的茶產業，也有人第一次理解到「一杯茶就代表著一段歷史」。
在之後走讀羅屋書院與關西地區，認識文化修復和地方發展的同時，除了聆聽羅氏老屋的導覽，青年也藉由田間小路，踏入整齊的稻田中央，感受生態帶來的生命力與羅家庄的自然純樸，一聲又一聲羅屋主人的歌聲，也將不熟悉的青年們漸漸連結起來。後來，青年們乜有前往李氏醬油，體驗手做無添加的醬油，理解在這時代之下珍貴的食安、健康觀念。
後來，青年們在龍潭－鍾肇政園區的範圍進行文學與生活導覽，找尋客家語言文化與日常的連結，還有聆聽在地的青年分享回鄉創生的例子，也同樣鼓勵著這些青年，能夠透過自身力量，為自己生活的土地帶來不同的正向轉變。
到新城社區體驗農事活動，感受客庄社會關懷時，青年也多多少少在與長輩的互動中，看見了家中長輩的身影，雖然使用的語言（客話、華語、英文）可能不盡相同，但透過跨世代互動交流，也讓青年們發現地方創生保留下的語言、文化的珍貴，還有從長輩身上學習的生命經驗。除了與長輩互動，最後一日行程來到楊梅的沉浸式客話小學，青年也與當地學生共同參加手作活動，透過多元互動的教學方式，讓語言交流與文化傳承融合，不單單是向上學習，也實現了向下傳承。
這次交流的過程，不只涵蓋了知識的學習，也更帶動了心靈的震動。
來自西班牙的黃同學說：「從小無法向朋友解釋『什麼是客家』，這次跨越半個地球回台參加營隊，幫助我找回了自我認同，也交到許多朋友。」
還有來自日本的青年分享：「起初對客家陌生且懷疑，但在營隊中獲得陪伴與啟發，漸漸愛上客家文化，也計畫將這份熱情帶回日本分享。」
臺灣在地的後生，也因為海外青年的熱情，開始思考承擔文化傳承的責任、寫出自己在這片土地上的故事。有人偷偷拭淚，也有人伸手緊握身邊的人，這一瞬間，實現了跨越世代與國界的心靈互通。
有人說這是「尋根之旅」、有人說這是「未來的開始」。無論如何，眼裡閃爍的都是相同的光芒，是來自世界各地的後生，打開的新連結。他們帶著笑聲、眼淚與承諾，再次分散到世界各地的同時，也帶走了更深沉的感受——那是無論在何處，因為同樣的根、開枝散葉，心中總有一塊土地，名為「客家」。
