文／邱鴻春，客語文薪傳師，桃園楊梅伯公岡客家人（海陸腔）
公投打票民做主
開票結果盡清楚
可惜出席有較低
通過無落門檻肚
核三公投結束咧，毋管結果仰般，就分政府去決定仰般做，逐儕還係認真做自家个事情，正係湛斗國民，千萬毋好半夜想該千條路，天光本本磨豆腐。
這擺盡榮幸，有機會參與著選務工作，可能天時熻熱个關係，加上毋係選人、毋係選自家个支持對象，選民出席个人數盡低，相對來講，這擺个選務工作，應該係最輕可个一擺。
學校教室个投票所面頭前，有幾下叢欒心樹，開等當靚淺紅色个花，加添了盡好个氣氛，毋過當得人畏个係，當當有盎蜂在該飛上飛下，有大嫲隻个，乜有較細隻个，品種看起來有好多種，若係毋堵好分佢叼著咧，該就無結煞咧！在外背值勤个警察摎義警先生，發現係來這食欒心樹樹頭下个樹乳、樹油，毋單淨有盎蜂，還有黃狗牯、金蛄仔、烏蠅這兜，相賽飛過來食，就遽遽用交通三角錐圍起來，提醒民眾毋好行昶兼，正毋會分佢叼著。
堵好這投票所有一位係學校總務主任，有通報市府農業局，農業局派捉蜂專家過來，專家來到講，無蜂竇在這位，無去攪惹佢無相關，恁樣圍等就做得咧，遠遠有聽著，佢乜有紹介這兜蜂仔个種類名仔，算起來也嶄蠻認真。
好死毋死，偏偏屋漏又堵連夜雨，這盎蜂事件過忒無幾久，投票所个教室裡肚，兩台細細台个冷氣，其中有一台嗄在該緊跌水，就遽遽摎主任管理員講，幾儕參詳好，就煞煞先拿教室肚个垃圾桶來承水，暫時先用等來，限勢（註1）已經試著無當涼，假使關忒會熱壞！
無想著這位總務主任先生，毋知哪量時通知冷氣師傅，師傅一下仔就到來，兩、三下手就整好咧，大家想仰會有恁好𥯟拉（註2）个冷氣師傅？主任正講，講起來鬼就毋信，斯有恁堵好，佢兜儕就當在學校肚安冷氣啦。
由這舊曆七月初一發生个事情來看，雖然試著衰漦！毋過分大家學會尊重各行各業个專業，平時還愛摎大家結好緣，就算係臨時發生一兜事情，除了考驗自家个應變能力，同時乜係團隊合作个展現，最重要个係有一隻正向个心，就會有一隻善个循環，當自然會有貴人相助。
（註1）限勢：音han+ shiˇ；本來就……。
（註2）𥯟拉：音baiˋ laiˋ；指很容易答應人又勤快的人。
華語
公投投票民做主
開票結果很清楚
可惜出席比較低
通過票高也受阻
核三公投結束了，不管結果怎樣，就給政府去決定怎麼做，每個人還是認真做自己的事情，才是好國民，千萬不可以在半夜有很多的理想，天亮了還是一事無成。
這次很榮幸，有機會參與到選務工作，可能天氣悶熱的緣故，加上不是選人、不是選自己的支持對象，選民出席的人數很低，相對來說，這次的選務工作，應該是最輕鬆的一次。
學校教室的投票所前面，有幾棵台灣欒樹，開著很漂亮淡紅色的花，加添了很好的氣氛，不過令人害怕的是，一直有虎頭蜂在那飛上飛下，有很大隻的，也有較小隻的，品種看起來有好多種，若是不小心給牠叼到了，那就不得了了！在外面值勤的警察和義警先生，發現是來這裡吃台灣欒樹樹幹底下的樹汁，不僅有虎頭蜂，還有黃蜂、金龜子、倉蠅這些，爭先恐後飛過來吃，就趕快用交通三角錐圍起來，提醒民眾不要太靠近，避免給牠叼到。
剛好這投票所有一位是學校總務主任，有通報市府農業局，農業局派捉蜂專家過來，專家來到說，沒有蜂巢在這裡，沒去招惹牠無所謂，這樣圍著就可以了，遠遠有聽到，他也有介紹這些蜂的種類名字，看起來也是很認真的。
好死不死，屋漏偏逢連夜雨，這虎頭蜂事件過了沒多久，投票所的教室裡面，兩台小小台的冷氣，其中有一台卻在那滴水，就趕快和主任管理員說，幾位商量好，就馬上先拿教室裡的垃圾桶來接水，暫時先克難用著來，本來就已經覺得沒有很涼，假使關掉一台會熱死！
沒想到這位總務主任老師，不知哪時候通知冷氣師傅，師傅一下子就到了，兩、三下就修好了，大家想說怎麼會有那麼好說話又勤快的冷氣師傅？主任才說，說起來鬼都不相信，就是有那麼剛好，他們就在學校裡面安裝冷氣啦。
由這舊曆七月初一發生的事情來看，雖然感覺很倒楣！不過給大家學會尊重各行各業的專業，平時還要和大家結好緣，就算是臨時發生一些事情，除了考驗自己的應變能力，同時也是團隊合作的展現，最重要的是有一個正向的心，就會有一個善的循環，很自然會有貴人相助。
