文／劉林義妹，客語薪傳師，新竹縣竹東客家人，感謝邱鴻春先生指導客語寫作（海陸腔）
亻厓從來毋識想過會做會長，因為前會長个大力支持摎推薦，就恁樣大膽接下新竹客語演講會會長个職務，這係一份責任嶄蠻重个任務，乜係一隻當好个學習機會，心情係緊張又期待。
上任後正體會著，逐隻月个第一隻、第三隻禮拜日暗晡，演講例會愛做議程表、邀請表摎後生之星報名表、設計海報。還愛邀請演講者、尋學生仔朗讀、總主持人、語言講評、總講評等等，都愛一手包辦。頭一擺無熟絡，就會修修改改，盡多微毛末節个事！既然頭洗落去咧，就愛有擔當、愛有肩頭，盡力做到最好來。
就恁樣無閒直掣，不但愛主動邀請人，還愛有盡好个溝通，有成時對方一句亻厓無閒，又愛遽遽尋下一儕，做毋得停砣，這時正體會著，原來口才摎人際關係，係兩大關鍵能力。
演講會每一場例會成員，最少愛有三個學生仔，大人部分愛有五儕，每一場演講者，都愛安排無共儕人，還愛控制時間，確定逐段會議順利進行。係堵著實體例會，還愛確定人數，定飯篼仔、點心、佈置場所、安排節目，活動現場總愛有人𢯭手控製時間摎流程，樣樣愛做好來，毋係自家熱心就做得撐起來个。愛打幫協會團體，大家心連心、大手牽細手、同心協力，正會行得遠行得久，演講會圓滿成功。
亻厓識想過，逐個人都有無共樣个考量摎狀況，有一擺，有人摎亻厓講：你係喊亻厓主持，就愛退出演講會群組，亻厓遽遽摎佢講毋好緊張，阿姆哀~險險嚇死亻厓！其實這係一種學習成長个過程。諺語講：「敢去就一擔樵，毋敢去就屋下愁」，這件事提醒亻厓，會長毋單淨愛會做事，更加愛有耐心摎包容。亻厓大膽來邀請平常參與个博士先生，雖然毋係當熟事，有講就有機會。
雖然頭一擺做會長，分亻厓學習著盡多東西，除了以上講个，還愛處理臨時个狀況，考驗會長應變个能力，也學會電腦多媒體个使用，會用還較成熟个態度，面對人摎人之間个互動，這係一段無簡單个過程，係亻厓人生裡肚一段寶貴个經驗。
未來還有當多挑戰，感謝演講會所有个鄉親好朋友，分亻厓學習个機會、肯定支持摎鼓勵，期待有還較多个好朋友，共下來幫襯，分演講會更加團結更加溫暖，逐儕人都做得發聲摎成長，共下來加油。
華語
我從來不曾想過當會長，因為前會長的大力支持推薦，就這樣大膽接下新竹客語演講會的會長職務，這是一份責任相當重的任務，也是一個非常好的學習機會，心情是緊張又期待。
上任後才體會到，每個月的第一個、第三個禮拜天晚上，演講例會要做議程表、邀請表和年輕之星報名表、設計海報。還要邀請演講者、找學生朗讀、總主持人、語言講評、總講評等等，都要一手包辦。第一次不熟悉，就會修修改改，還有很多小細節的事！既然頭已經洗了，就要有擔當、要有肩膀，盡力做到最好來。
就這樣忙得不可開交，不但要主動邀請人，還要有最好的溝通，有時候對方一句我沒空，又要趕快找下一位，不能停頓，這時才體會到，原來口才和人際關係，是兩大關鍵能力。
演講會每一場例會成員，最少要有三個學生，大人部分要有五位，每一場演講者，都是不同講者的安排，還要控制時間，確定確每一段會議順利進行。若碰到實體例會，還要確定人數，訂便當、點心、佈置場地、安排節目，活動現場總要有人幫忙控製時間和流程，要面面俱到，不是憑自己熱心就能撐起來的。需要協會團體幫忙，大家心連心、大手牽小手、同心協力，才會走得遠走得長久，讓演講會圓滿成功。
我曾想過，每個人都有不一樣的考量和狀況，有一次，有人和我說：你叫我主持，我就要退出演講會群組，我趕緊安慰她說不要緊張，我的天啊~差點嚇死我了！其實這是一種學習成長的過程。俗話說：「敢去就一擔柴，不敢去就家裡愁」，這件事提醒我，會長不但要會做事，更加要有耐心和包容。我大膽邀請平常參與的博士先生，雖然不是很認識，有邀請就有機會。
雖然第一次當會長，讓我學習到很多東西，除了以上說的，還要處理臨時的狀況，考驗會長應變能力，也學會電腦多媒體的使用，會用更加成熟的態度，面對人和人之間的互動，這是一段不簡單的過程，是我人生中一段寶貴經驗。
未來還有很多挑戰，感謝演講會所有的鄉親好朋友，給我學習機會、肯定支持和鼓勵，期待還有更多的好朋友，一起來幫忙，讓演講會更加團結更加溫暖，每一個人都可以發聲和成長，一起來加油。
