文／廖佳仁（海陸豐野客）

中壢客人，楊梅富岡（伯公岡）出生、於桃園市中壢區新街國民小學任教至今已屆有36年（腔頭：海陸腔）

聽講，頭擺在桃園平鎮个大坑缺、虎頭岡山下這位有一隻硬頸（註1）嫲，因爭佢當硬殼（註2）个爺（註3）從來就看細妹人無，在佢國中畢業後就毋肯分佢過繼續讀書，還挑挑騙佢講，假使佢做得連續一隻月，逐日都企在中興路摎中庸路个路徑頭（註4）去賣100蕊玉蘭花花蕾（註5），還愛摎玉蘭花賣忒賺著个錢全部繳分厥爸，厥爸正肯分佢上高中、讀大學。

厥爸話著恁樣同佢講，從細就當好面子个硬頸嫲就會驚分隔壁鄰舍摎同學笑，就會自家甘願放棄再過升學个想法，認份去工廠食頭路，做一隻細女工，乖乖賺錢轉來分老弟做得去讀大學。

一開始，厥爸偷偷匿匿、輕手輕腳跈等硬頸嫲个後背出門，企到遠遠个所在偷看佢，想愛看硬頸嫲洩面子。無想著，該硬頸嫲還正經逐日摎厥屋面前該幾叢玉蘭花摘下100蕊花蕾，乖乖企在厥爸規定个路徑頭，摎行在該位過个司機阿哥、阿叔、阿伯、小姐、阿姨摎伯姆頷頭拜託，拜託佢兜摎佢買玉蘭花。有人冷雪雪个拒絕佢，也有人當歡喜摎佢買，毋管仰形，硬頸嫲全都笑弛弛个摎佢兜講承蒙，承蒙佢兜分佢做得摎大家結緣。

第一日打早企到暗，正分佢賣忒100蕊，第二日臨暗前賣忒100蕊，第三日過晝無幾久就賣忒100蕊，第四、第五、第六日，也係過晝後100蕊就賣淨淨，一禮拜、兩禮拜、三禮拜，全共樣，一蕊都無伸。結果，原旦算盤扚到當好，按算等等看場好戲个硬頸嫲厥爸，好點點發琢愕，嗄像戲棚頂个皇帝共樣〜威風毋久，黏邊消風忒了。

硬殼个阿爸就算心肝肚有千萬隻个毋甘願，面對自家講出去个話，也收毋轉來了，高不將同意硬頸嫲做得繼續讀書；毋過，厥爸淨應佢會負擔讀書个註冊費摎書錢、簿仔錢等雜費，其他生活所費，愛硬頸嫲自家去想辦法。硬頸嫲个阿爸確實嶄蠻壞心，恁樣个步數也想得出，還係對自家个妹仔，仰會有恁樣个爺呢？毋過，硬頸嫲還較煞手，佢淨想愛得著厥爸个允准，講出「做得分佢繼續讀書」這句話就好了，其他个，佢早就全準備好了，一銑錢（註6）都毋使摎厥爸拿。

原來，慶手慶腳（註7）个硬頸嫲早斯偷偷去報考師範專科學校（簡稱「師專」），還當慶頭（註8）打頭名，高分錄取，未來五年个註冊、讀書、食、戴全毋使用著屋下半銑錢，係公費培養國民教育未來先生个學校，師專畢業之後，硬頸嫲毋單淨做一個小學先生，間過（註9）多年以後，還變做儕儕阿腦个細妹校長，帶領一隻又一隻个學校，無分細倈人抑係細妹人，公平對待，儕儕都阿腦，好得自家跈著這恁好个校長，正經愛慶祝。硬頸嫲實在還慶！恁樣也做得！

（註1）硬頸（海陸音ngang+ giangˊ）形容人個性強硬頑固，不順從，也不願聽他人的勸告或建議。
（註2）硬殼（海陸音ngang+ hog）形容個性頑固、執著。
（註3）爺（海陸音rha）父親、爸爸。
（註4）路徑頭（海陸音lu+ gangˇ teu）通道或路中間。
（註5）花蕾︰含苞未開的花。
（註6）一銑錢︰英語one cent。
（註7）慶手慶腳（海陸音kiangˇshiuˊkiangˇ giog）可靠能幹。
（註8）當慶頭（海陸音dongˋkiangˇteu）很厲害、很強勁、很有力。
（註9）間過（海陸音gamˇgoˇ）經過。

華語

聽說，從前在桃園平鎮的大坑缺、虎頭岡山下這裡有一個不服輸的女孩，因為她那個很頑固的老爸從來就很看不起女孩子，在她國中畢業後就不肯讓她再繼續升學，還故意騙她說，如果她能夠連續一個月，每天都站在中興路與中庸路的路上去賣100朵玉蘭花花苞，還要將賣掉玉蘭花所賺到的錢全部繳給她爸爸，她爸爸才願意讓她去上高中、讀大學。

她爸爸以為這樣跟她說，從小就很愛面子且不服輸的女孩就會因怕被隔壁鄰居與同學恥笑，就會自己甘願放棄繼續升學的念頭，認命去工廠賺錢，做一個小女工，乖乖賺錢回來給弟弟可以去唸大學。

一開始，她爸爸偷偷摸摸、放輕腳步跟著不服輸的女孩的後頭出門，站在遠遠的暗處跟蹤她，想要看那個不服輸的女孩丟臉。沒料到，那個不服輸的女孩還真的每天將她家屋前的那幾棵玉蘭花樹摘下100朵花苞，乖乖站在她爸爸規定的路中間，跟行經那裏的司機大哥、叔叔、伯父、小姐、阿姨與伯母低頭拜託，拜託他們跟她買玉蘭花。有人冷冰冰地拒絕她，也有人很高興跟她買，不管怎樣，不服輸的女孩全都笑容可掬地跟他們說謝謝，謝謝他們讓她可以跟大家結緣。

第一日從早站到晚，才讓她賣掉100朵，第二日傍晚前賣掉100朵，第三日中午過後沒多久就賣掉100朵，第四、第五、第六日，也是中午過後就100朵賣光光，一禮拜、兩禮拜、三禮拜，全都是一樣，一朵都不剩。結果，原來如意算盤打得很好，計劃等著可以看場好戲的不服輸的女孩她爸，突然被嚇傻了，反倒像是戲棚上的皇帝一樣〜威風不久，馬上就洩氣掉了。

頑固的爸爸縱然心裡面有千萬個的不甘心，但面對自己說出去的話，也已收不回來了，只好勉強同意不服輸的女孩可以繼續讀書；不過，她爸爸只有承諾負擔她讀書的註冊費與書錢、簿本錢等雜費，其他生活花費，要不服輸的女孩自已去想辦法。

不服輸的女孩她爸爸確實是相當惡質，這樣的招數也想得出，更何況還是對自己的女兒，怎會有這樣的爸爸呢？不過，不服輸的女孩還更勇猛俐落的是，她只想要得到她爸爸的承諾，說出「可以讓她繼續讀書」這句話就好了，其他的，她早就都準備好了，一分錢都不用跟他爸爸拿。

原來，可靠能幹的不服輸的女孩早就偷偷去報考師範專科學校（簡稱「師專」），還很厲害地拿到榜首，高分錄取，未來五年的註冊、讀書、食、住全不用花家裡半分錢，是公費培養國民教育未來教師的學校，師專畢業之後，不服輸的女孩不只成為一位小學老師，經過多年之後，成為人人稱讚的女校長，帶領一個又一個的學校，不分男女，公平對待，人人都額手稱慶，慶幸自己能夠有這如此好的校長可追隨，真的要慶賀。不服輸的女孩實在很厲害！這樣也可以！