文／邱鴻春，客語文薪傳師，桃園楊梅伯公岡客家人（海陸腔）
長庚裡肚復健樓
醫師想出好計謀
實習商店天堂鳥
精神病友會出頭
渡阿姆來林口長庚醫院分先生看，已經有好多擺咧，希望佢个腰骨痛問題，做得遽遽來改善。
復健大樓入門大廳，雖然之前來，就有看著兩台細商店攤車，毋過全毋識摎佢買過東西，今晡日想著，做生理人乜已辛苦，就摎佢交關買咖啡來啉，一罐二十五個銀，發現無較貴，就買了兩罐五十個銀，一罐做得分老弟食，就行轉摎阿姆共下等門診。
堵好這位離攤車無幾遠，看啊過，看當清楚攤車个名仔，寫等「天堂鳥實習商店」，感覺這名仔盡特別，想講反正還吂得時會看著，老弟也在脣頭共下陪等阿姆，𠊎就行過去攤車，問佢攤車个名仔有麼个特別个意義無？還過你兜係哪位來這做生理个？
無想著佢个回答，係分𠊎完全無胚著个，佢講佢三儕係病友，𠊎話𠊎聽毋著，再問佢一遍，三儕嗄當大方共下講出來，正確定無聽毋著，原來係「思覺神經失調」个病友在這位做復健。講著做復健，該𠊎還較疑狐咧，看你兜儕全當好無問題呀，摎𠊎講話對應乜當清楚呀，仰會安到在這做復健？佢兜正講，𠊎兜病友有二、三十儕，年齡在18歲到70歲之間，逐日朝晨摎下晝，全會有三儕輪流出來學做生理，逐擺還係無共樣个三儕，其他無輪著儕，就歸下上課復健，經過恁樣个治療、實際生活訓練、融入社會，最尾經過先生个評估，慢慢仔有人改善當好，就毋使逐日來，就做得正常上班過自家个生活。
敗勢！𠊎做得問一隻較無禮貌个問題無？思覺神經失調發作起來會仰般？佢兜乜當勇敢講，會「幻聽」、「幻覺」、「幻想」，會罵人、會打人、會咬人，有控制好就較毋會發作。𠊎又問，目前生活中最大个問題係麼个？佢兜講：最需要屋下人个諒解，毋係𠊎兜番綻講毋聽，麼个事情就做毋好，實在係自家控制毋著，還有一隻最大个問題係，逐日全試著當悿無想愛䟘床，當需要屋下人个叮嚀𢯭手。
這三儕裡肚有一位客人，𠊎做得摎佢客語對話，感覺盡親切乜當難得，希望鄉親好朋友，萬不一有來到這位，請多多分佢兜支持，分佢兜早一日，做得過自家全新个人生，不管佢係客人、學老人，抑係其他族群全共樣哦。
華語
長庚裡面復健樓
醫師想出好計謀
實習商店天堂鳥
精神病友會出頭
帶媽媽來林口長庚醫院給醫師看，已經有來過好幾次了，希望他的腰痛問題，可以很快得到改善。
復健大樓入門大廳，雖然之前來，就有看到兩台小商店攤車，不過都不曾向他買過東西，今天突然想到，做生意人也很辛苦，就向他光顧買咖啡來喝，一罐二十五元，發現沒有比較貴，就買了兩罐五十元，一罐可以給弟弟喝，就走回去和媽媽一起等門診。
剛好這裡離攤車沒多遠，看過去，看很清楚攤車的名字，寫著「天堂鳥實習商店」，感覺這名字很特別，想說反正還不知道幾時會輪到，弟弟也在旁邊一起陪著媽媽，我就走過去攤車，問他攤車的名字有什麼特別的意義嗎？還有你們是從哪裡來這做生意的？
沒想到他的回答，是完全出乎我意料之外，他說他三人是病友，我以為我聽錯，再問他一遍，三人卻很大方一起講出來，才確定沒聽錯，原來是「思覺神經失調」的病友在這裡做復健。講到做復健，那我更有疑問了，看你們都很好沒問題呀，和我講話對應也都很清楚呀，怎麼會是在這做復健？他們才說，我們病友有二、三十人，年齡在18歲到70歲之間，每天上午和下午，都會有三人輪流出來學做生意，每次還是不一樣的三人，其他沒輪到的人，就一起上課復健，經過這樣的治療、實際生活訓練、融入社會，最後經過醫師的評估，慢慢的有人改善很好，就不用每天來，就可以正常上班過自己的生活。
不好意思！我可以問一個比較沒禮貌的問題嗎？思覺神經失調發作起來會怎樣？他們也很勇敢說，會「幻聽」、「幻覺」、「幻想」，會罵人、會打人、會咬人，有控制好就較不會發作。我又問，目前生活中最大个問題是什麼？他們說：最需要家人的諒解，不是我們頑皮講不聽，什麼事情都做不好，實在是自家控制不了，還有一個最大的問題是，每天都覺得很累不想起床，很需要家人的叮嚀幫忙。
這三人裡面有一位客家人，我可以和他客語交談，感覺很親切乜很難得，希望鄉親好朋友，萬一有來到這裡，請多多給他們支持，讓他們早一天，可以過自己全新的人生，不管他是客家人、閩南人，或是其他族群都一樣喔。
