文／蕭宥，學生、台東客家人、現下戴台東（四縣腔）
講著客家人个重要節日，就絕對做毋得無講著，逐年11月11號會舉辦个——臺東好米收冬季。外地人輒常認為：池上同關山就係臺東好米最好个產地，毋過，在臺東縣鹿野鄉个瑞源、瑞隆、瑞和，又安到「大原三村」，同附近个福老庄頭——瑞豐村，乜係臺東種禾仔盡重要个主要地區。最近，就在收冬个這時節，瑞源社區發展協會舉辦一隻「稻大原田園體驗」个活動，計畫愛帶大家人在田肚割禾、共下食米食，分大家認識來自鹿野這垤貴寶地个好米。
這擺，佢兜還邀請了一位當特別个先生，就係彭歲玲先生，同當多客語薪傳師，還有臺東講客少年團个幾個成員，共下來到好米收冬季个現場，除忒共下唱歌，乜有成員負責翕相同錄影，用畫面記錄這盛大个場面，再透過自媒體頻道，分過較多人做得共下欣賞。這兜後生條仔，用創新个方式，對文化傳承同保存个付出，實在當分人感動。
舞台項，瑞源社區个細人仔、老人家共下用客話來表演《大地靚靚》這本繪本。這本繪本，係頭下講著个彭歲玲先生、同𫣆俚臺東个細人仔、青少年在臺東客家學堂共下製作个，毋單淨用客家話同英文兩種語言書寫，書裡背乜有音檔做得聽，提醒大家在跈等新時代學習英文个時節，乜毋好添放忒自家个母語。這本繪本還有放在先前舉辦个世界客家博覽會臺東展場，同其他有出版个客話同英文繪本共下做展出。裡肚主要有三隻故事，還安排咧一隻當特別个動物——安到娘花狸（乜就係華語講个食蟹獴）个特殊角色，佢淨做得戴在最淨利無汙染、對動物來講最鬆爽个位所，在書裡背負責串場。
這擺表演，除忒這兜有關農業田事、保護土地个故事，還結合在地人文特色，使用唱出豐源圳个平板山歌、揣令仔个方式，來做開場，表達戴在該片个大家感謝懷念老頭擺，先民開墾豐源圳帶來豐收个珍貴同感動。薪傳師、細人仔同老人家，為台下參加活動个觀眾、鄉親帶來精彩个客語繪本故事表演。
瑞源小學堂裡背个細人仔，大約超過一半都毋係客家人，毋過因為今這下國家語言發展法个推行，鼓勵大家，就算族群無共樣，乜做得共下學習臺灣个語言，建立多元个生活環境，故所這兜細人仔乜跈等客語薪傳師，一步一腳印个學習客家兒童歌曲——「hakka hakka」，為好米收冬祭帶來活跳精靈又鬧熱个氣氛，實在異湛斗。堵好，該片乜有異多个禾田、打當結个禾穀，微風吹來一大片金黃个禾浪，青天白雲个好天時，燒暖个日頭來做伴，合等大人細子个笑聲，這，就係臺東最餳人个風光。
台東鹿野鄉瑞源社區發展協會曾瑞惠理事長，乜係該日好米收冬季現場活動主持人，佢乜對這兜細人仔同老人家个青銀合作表演當阿腦。毋過，在精彩个表演後背，薪傳師乜在排練客語繪本劇个過程堵著困難，安排這場特別个展演，實在異無簡單。比論講，就有細人仔因為族群認同無共樣个關係，無想愛學習客家話，好得這兜客語薪傳師乜異有智慧，想著音樂、藝術，就係無距離个一種做得偎兼大家心靈个方式，想出分大家共下跳舞、唱hakka hakka這首簡單个客家歌曲，分這兜細人仔甘願學習客家話，提供了一隻異好个方法，分大家感受著：客話係一隻當靚个語言。體會著語言个美好。
客語薪傳師林少珍先生同戴玉霞先生都講：「在現場看等老嫩大細共下講客話、成功表演客語繪本劇場故事个時節，正經特別感動又當有成就感。」
在這段表演个幕後，𠊎特別認同少珍先生講个：「語言就係愛對家庭開始」這句話，大人帶等細子，共下學習、共下成長，乜比強逼大家人學習母語个環境還較快樂。希望大家在這大時代，都做得尋轉摎傳承這片土地个語言。
𠊎想，無麼个文化同語言，係淨屬於單一隻族群个。在這位乜鼓勵大家，多多參加無共樣个文化相關活動，體會其他文化个靚，在頭腦肚留下一隻美好个回憶。
華語
說到客家重要節慶，就絕對不能忽略每年11月11日會舉辦的——臺東好米收冬季。來自外地的人們常認為：池上與關山，就是臺東好米最好的產地，不過，臺東縣鹿野鄉的瑞源、瑞隆、瑞和，又名「大原三村」，與附近的河洛庄——瑞豐村，也是臺東種稻產業重要的主要種植地區。最近，就在秋收時節，瑞源社區發展協會，舉辦了「稻大原田園體驗」活動，計畫要帶著參與活動的人們，一齊在田中割稻、享用米食，讓大家認識來自鹿野這塊貴寶地的好米。
這次，還邀請了一位十分特別的客語推手，就是彭歲玲老師，與許多客語薪傳師，以及臺東講客少年團的幾位成員，來到好米收冬季現場，除了一起唱歌，也有成員負責拍照與錄影，用畫面記錄這盛大的場面，再透過自媒體頻道，讓更多人能夠欣賞。這些後生世代，用創新的方式，對文化傳承與保存的付出，著實令人感動。
舞台上，瑞源社區的孩子、長輩一起用客語展演《大地靚靚》這本繪本。這本繪本，是剛才講到的彭歲玲老師、與臺東的小朋友、青少年，一起在臺東客家學堂製作而成，不只使用了用客家話與英文兩種語言書寫，書中也都有音檔能夠收聽，提醒大家在追隨新時代學習英文的同時，也不要忘了自己的母語。這本繪本，還放在了先前舉辦的世界客家博覽會臺東展場，與其他已出版的客英繪本一齊展示。書中主要敘述了三個故事，還安排了一隻十分特別的動物——名為娘花狸（華語：食蟹獴）的特殊角色，牠只能棲息在最乾淨無汙染、對動物來說最舒適的棲息地，在書中負責串場。
這次的展演，除了有關農業耕作、守護土地的這些故事，更結合了在地人文特色，運用演唱豐源圳的平板山歌、猜謎語的方式作開場，表達在此地居住的人民感念從前，先民開墾豐源圳帶來豐收的珍貴與感動。薪傳師、小朋友與長輩們，為台下參與活動的觀眾、鄉親帶來精彩的客語繪本故事展演。
來自瑞源小學堂的孩子們，差不多有一半都不是客家人，不過因為現今國家語言發展法推行，鼓勵大家就算族群不同，也能一起學習臺灣的語言，建立多元的生活環境，於是這些孩子也跟著客語薪傳師，一步一腳印的學習客家兒童歌曲——hakka hakka，為好米收冬祭帶來活潑又熱鬧的氣氛，實在優秀。剛好，此地擁有許多稻田、結石累累的稻穗，微風捎來一片金黃色的稻浪，藍天白雲的好天氣，溫暖的日光相伴，男女老少此起彼落的笑聲，這，就是臺東最令人沉醉的景致。
臺東鹿野鄉瑞源社區發展協會曾瑞惠理事長，兼好米收冬祭現場活動的主持人，也對這些小孩與長輩的青銀合作展演十分讚賞。
但在精彩的表演背後，薪傳師也在排練客語繪本劇的過程中遇到困難，安排這場特別个展演，實在不簡單。比如，有孩子因為族群認同不一樣的關係，拒學客家話。幸虧這些客語薪傳師也頗具智慧，想出音樂、藝術，就是無距離的一種能夠貼近心靈的方式，讓大家一起跳舞、唱hakka hakka這首簡單的客家歌曲，促使這些孩子願意學習客家話，提供了一個好方法，讓大家感受到：客語是一種美麗的語言。體會到語言的美好。
客語薪傳師林少珍老師與戴玉霞老師都說道：「在現場看著老老少少一起講客語、成功展演客語繪本劇場故事的時候，真的特別感動又頗有成就感。」
在這段展演的幕後，我特別認同少珍老師所說：「語言就是要從家庭開始」這句話，大人帶著孩子，一起學習、一起成長，也比強制大家學習母語的環境更快樂。希望大家在這個大時代，都能夠尋回與傳承這片土地的語言。
我想，沒有特定的文化和語言，是只專屬於一個族群的。在這裡也鼓勵大家，多多參與不同的文化相關活動，發掘其他文化的美，在腦海中留下一段美好的回憶。
