佛光山星雲法師圓寂 願下生人再過做和尚
【羅盛滿／新竹竹東海陸腔】佛光山常務副住持慧傳法師今晡日上晝表示，星雲法師在昨晡日圓寂，享耆壽97歲，出家85隻年頭，昨晡日下晝在眾弟子念佛聲當中安詳離開，走个時節面色安詳，還講下生人還愛再過做和尚，在生死輪迴當中，係自由自在个、無任何掛吊。
慧傳法師上晝接受媒體聯訪該時表示，先前係講有弟子前來探望，星雲法師都做得認得出來，但係人老咧，就係會器官衰竭，星雲法師最尾在睡夢當中安詳圓寂，看起來當像摎逐儕人講，愛放下、愛自在。
依照星雲法師囑咐，佛光山會繼續朝教育、文化、資訊這兜方向推展，分社會大眾認識人間佛教。
星雲大師歸生人提倡「人間佛教」，創辦國際佛光會，為文化、教育、還過慈善這兜煞猛推動，相信大師个慈悲友愛摎「弘揚佛法、利益眾生」个精神會永遠存在世間。
佛光山發布公告表示，對今晡日起勢，暫停對外任何活動，在逐日上晝9點到下晝5時開放大自家來拈香，做得到佛光山雲居樓追思緬懷。
台灣燈會可能造成交通烏暗期？蔣萬安講：會做滾動式檢討
2023年台灣燈會在台北，在昨晡日正式開幕，超過50萬儕人前往觀賞。台北市市長蔣萬安今晡日表示，昨晡日開幕有非常多个人潮，續下來个拜六、禮拜人潮會還較多，事前已經規劃好交通，包含遊覽車停靠个位所，還過停車場費率調整這兜，都有完整个安排，在燈會開放个兩隻禮拜期間之內，會繼續做滾動式檢討車潮摎人流。
阻擋俄羅斯選手參加奧運 澤倫斯基呼籲贊助商莫淪落變成戰爭文字宣傳
烏克蘭總統澤倫斯基今晡日表示，烏克蘭已經寫信仔分國際奧林匹克委員會（IOC）个各大贊助商，呼籲佢兜摎俄羅斯个運動員阻擋在巴黎奧林匹克運動會（Olympic Games）之外，莫分佢兜參加。
澤倫斯基（Volodymyr Zelenskyy）一直以來都在該盡命牯阻擋俄羅斯摎白俄羅斯个選手以中立旗幟參加奧運。澤倫斯基識表示，分俄羅斯摎白俄羅斯个選手參加比賽，會分俄羅斯侵略烏克蘭這件事情變正常化，乜會分大自家話著「恐怖行為」係做得接受个。
國際奧會1月下旬表示，亞洲奧林匹克理事會已經提供俄羅斯摎白俄羅斯个運動員參加亞運个機會。這種行為引發烏克蘭強烈抗議，基輔當局呼籲禁止俄羅斯个選手參加比賽。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
