限制中國晶片提案引起企業反彈　米國參議員放寬規定

【羅盛滿／新竹竹東海陸腔】根據路透社最近看着个草案，米國聯邦參議員提議對聯邦政府摎佢兜个貌頭，使用中國製造个晶片實施新个限制，在堵着米國全國商會這兜貿易團體反彈該下，參議員佢兜已經縮減提案規模。

米國政府提議對中國發展當遽个科技業施加限制，恁樣形做係業界為着削弱相關提案力道个最新例仔之一，表示講這一類提議案仔會造成成本提高。

聯邦參議院民主黨領袖舒默（Chuck Schumer）摎對中國企在鷹派立場个資深共和黨人柯寧（John Cornyn）9月公布一項議案，要求米國聯邦機關摎佢兜个貌頭停止使用中國中芯國際（SMIC）製造个半導體，還過中國記憶體晶片製造个龍頭長江存儲（YMTC）摎長鑫存儲（CXMT）製造个晶片。

日期標記係12月初1个新版議案文本，毋會再過禁止貌頭「使用」分人鎖定个晶片，還過摎第一版議案當中提着个實施日期，從黏皮抑係兩年挷後延長到5年。

中芯國際製造个晶片得着全球各地个公司委託製造，出現在手機摎汽車這兜各式各樣个產品當中。因為晶片通常毋會有標示製造商个標頭，所以當難分辨出來。

這項定調係「國防授權法案」（National Defense Authorization Act）修正案个議案，引起米國全國商會（U.S. Chamber of Commerce）這兜貿易團體火著、發閼，佢兜上隻月在一封信件當中寫講，公司企業當難在恁多電子設備當中、判定裡肚个晶片係毋係由中芯國際製造，還過可能造成成本當高。

強大个米國全國商會在電信摎國防產業團體共下簽名个信件當中表示，從焙吐司機器這兜輒常用个家電移除這類晶片，抑係強迫紙張供應商這兜聯邦貌頭，接下這種艱難任務，對進一步強化米國國家安全並無幫助。

中國駐華盛頓大使館表示「堅決」反對在法案當中，用負面字眼提着中國，還過有講米國全國商會个信件顯示，「儘採中斷還過損害全球產業个供應鏈，無符合任何人个利益」。(中央社)

｜講客廣播電臺－收聽頻率｜

▹宜蘭 FM102.9

▹北北基高屏 FM105.9

▹桃竹 FM105.7

▹苗中彰投 FM101.5

▹雲嘉南 FM104.3

▹花東 FM106.9

｜網路收聽｜

▹講客廣播電臺官網｜https://pse.is/R8RU8

▹講客廣播電臺APP｜