英國國會西敏廳開放瞻仰女王 機場規格做安全檢查
【羅盛滿／新竹竹東海陸腔】英國女王伊莉莎白二世在9月初8過身，在倫敦時間9月14下晝5點起勢開放民眾到國會大廈西敏廳瞻仰女王。西敏廳會歸日仔開放24點鐘，一直到9月19朝晨6點30分。
9月19上晝11點（斯係台北時間下晝6點）在附近个西敏寺（Westminster Abbey）舉行國葬。根據英國政府今晡日發布个規定，民眾愛接受機場規格做安全檢查，還過做毋得著具有政治抑係犯著其他人字眼个服裝。
另外，花摎蠟燭、人公仔、相片這兜其他致意物品，還過布條、看板、旗幟這兜可能引發公眾惹事个東西，都做毋得帶入西敏廳。民眾也做毋得在西敏廳摎安檢區攝影、翕相、使用手機仔還過其他手做得擎个設備。
澤倫斯基：俄羅斯挑事破壞民生設施 應當為烏東停電負責
烏克蘭總統澤倫斯基（Volodymyr Zelenskyy）今晡日講，俄羅斯愛為烏克蘭東部各地大停電負起責任，還過指責俄羅斯挑事破壞民生基礎設施。
澤倫斯基在社群媒體發布聲明表示，這其中並無包含軍事設施，俄羅斯个「目的係挑事毋分民眾使用照明摎暖氣」。
推算受著停電影響个地區一共差毋多有900萬人口，包括俄羅斯控制个領土。還過共隻時節，烏克蘭軍隊宣布已經搶轉烏東幾下十隻城鎮摎村莊。
宣布停電過後無幾久，有兜地區个官員講，電力已經恢復。俄羅斯个攻擊也造成鐵支路斷忒，國家鐵路服務部門宣布歸隻東部地區个火車都慢分，包括境內第二大城市哈爾科夫。
風搓梅花接觸陸地機會推算最遽在韶暗晡9/13加速離開 新北市防範大豪雨
氣象局今晡日表示，中度風搓梅花持續向北片定定仔徙動，推算會維持中度風搓強度，韶暗晡正會漸漸仔加速離開台灣附近海脣；今晡日在新北市山區可能有大豪雨發生，新竹縣摎桃園市、宜蘭縣愛防範豪雨，苗栗以北、台中這兜地區愛防範落大水。
根據目前路徑預報，今晡日到韶早梅花還係維持偏北北西个方向徙動，以暴風半徑來看，接觸陸地个機會偏低；加上環境不利發展，今晡日摎韶早兩日可能維持中度風搓，未來上北可能就漸漸仔減弱，氣象局會持續觀察。
｜講客廣播電臺－收聽頻率｜
▹宜蘭 FM102.9
▹北北基高屏 FM105.9
▹桃竹 FM105.7
▹苗中彰投 FM101.5
▹雲嘉南 FM104.3
▹花東 FM106.9
｜網路收聽｜
▹講客廣播電臺官網｜https://pse.is/R8RU8
▹講客廣播電臺APP｜
(Android連結：https://reurl.cc/8GWlXd)
(IOS連結：https://reurl.cc/O1pb59 )
歡迎討論或留言給我們: