文／張美煜 電台節目主持人、屏東縣福佬庄个關西裔客人、這下戴新北市新店區
腔調：海陸腔
五月節係台灣人个三大節之一，頭擺家家屋屋愛包粽仔食；這下工商業時代，曉得包粽仔个人無幾多，包粽仔已經變專業化甚至企業化合gag有品牌了，一年透天都有賣，想食粽仔隨時做得買，毋使kankan等到五月節，乜毋使自家包到恁辛苦；毋過，農業時代該種想望過節个心情、摎過節時个歡喜樂暢，乜尋毋轉了。
市面上賣个粽仔有兩種，味粹(緒)無共樣：「北部粽」係糯米炒到八九分熟，正摎料頭(餡料)共下包起來放籠床(蒸籠)肚炊(蒸)分佢定型，食起來有息像「油飯」樣个；「南部粽」係將生米摎料頭用麻竹葉抑係月桃葉包好勢，放入大鑊嫲肚用水慢慢煠煮到熟酪个。兩樣粽仔都各有好食合死忠个支持者。
前幾年一到五月節，台灣各地个網友總係會發起「南北粽爭」，為著哪種做法正係「正統」个粽仔來相詏，詏毋會煞，乜詏毋出結論；其實，老古時代个粽仔到底係隔水炊个抑係用水來煠个問題，對兩則流傳百年个客家令仔(謎語)，就做得了解清楚了。
1.生在山中青揚揚，死在家中討米糧，牽牽連連跳水死，去到衙門脫衣裳。
2.四面四角無四方，綾羅腰帶繫中央，黏黏拖拖去跳水，去到衙門脫衣裳。
第一則令仔个前兩句係講用青竹葉包糯米，第三句「牽牽連連跳水死」最關鍵，係講將包好个粽擐(粽串)落鑊用水去煠，第四句用「偎音」(「牙、衙」二字同音)、擬人法修辭，說明嘴(牙門)食粽仔時要先摎葉仔剝下來(脫衣裳)。第二則个三、四兩句摎第一則共樣，一、二兩句說明粽仔个包法摎外形，有四面四隻角毋過毋係正四方形，包粽仔係用線索綯在中央來固定。
對這兩則客家粽仔令，看得出古時代个粽仔係用水煠个，毋係隔水炊个。南部粽保留傳統做法，北部粽用炊个係後來改過个新法。
無論水煮抑係炊个，台灣粽个外形過包法自有特色，摎中國粽已無共樣：中國粽係長長像枕頭形，用綿線纏多多圈來定形；台灣粽係四角形个，單淨需要在中央纏一圈(綾羅腰帶繫中央)就做得，內行熟手包出來个一定係均衡个四角形，但毋係平整个正方形(四面四角無四方)，外行新手包毋出正四角，會變成三角形，還合有一角特別長；台灣粽料頭豐富，乜係中國粽跈毋着个。筆者公元60年代讀屏東女中時，有一個原籍蒙古在北平(北京)生長讀書个細妹先生，講佢在中國時節，一旦毋好食粽仔，認為該係所有節慶中最難食个食物…..毋過，來到南台灣，食過台灣粽以後「驚為天人」，一食定情。原來佢兜食麵為主个北方人包粽仔，單淨將米包在竹葉肚，直接落鑊煠熟變糯飯，無加麼个料頭，乜無鹹無甜，恁樣个粽仔仰會食得呢?難怪該先生莫愛食。就算當有名个「湖州粽」个鹹粽，底肚乜斯包一垤豬肉定定，無其他料頭，也無加香料，該愛講有幾好食，厓正毋信了。
筆者在南部出世長大，從細食个係「水煮粽」，60年代後期讀大學時來到台北，第一擺過五月節，食着同學送个北部粽，又油又「粒」，摎厓屋下个「水煮粽」當無共樣！毋知係厓胃忒弱毋消化抑係食毋慣，該擺竟然食到胃痛；這下，在台北戴了五十零年，「年深異境猶吾境，日久他鄉即故鄉」，厓乜入庄隨俗，慢慢學會食該「像油飯」个北部粽了，但係毋敢多食，一擺最多食一隻定定。
華語：
「南北粽爭」何時了?「客家令仔」解紛爭 張美煜
端午節事台灣人的三大節慶之一，昔日家家戶戶都會自包粽子；現在工商業時代，懂得包粽子的人寥寥無幾，包粽子已經專業化甚至企業化且有品牌了，一年到頭都有販售，想食粽子隨時可以買到，不必非得等到端五節不可，也不用辛苦地自己包，方便極了；不過，農業時代那種渴望過節以及過節時的歡欣鼓舞的情懷，一去不復返了。
市面上賣的粽子有兩種，風味不同：「北部粽」係將糯米炒到八九分熟，再跟餡料一起包起來，放進蒸籠蒸約半小時讓它定型即可，吃起來有點像「油飯」的感覺；「南部粽」則是將生米與餡料一起用麻竹葉或月桃葉包好，放入大鍋內用水慢慢熬煮到熟爛(水要漫過粽串)。兩樣粽子都各有死忠愛好的粉絲。
前幾年每到端午節，台灣各地的網友總會掀起一場「南北粽爭」，為了哪種做法才是「正統」粽子爭執不休，始終爭不出結論；其實，古早時代的粽子到底是隔水蒸的還是用水煮的問題，從兩則流傳百年的客家粽謎，就可以了解清楚了。
1.生在山中青揚揚，死在家中討米糧，牽牽連連跳水死，去到衙門脫衣裳。
2.四面四角無四方，綾羅腰帶繫中央，黏黏拖拖去跳水，去到衙門脫衣裳。
第一則謎面的前兩句講的是用青竹葉包糯米，第三句「牽牽連連跳水死」最關鍵，是說將包好的粽串入鍋用水去煮，第四句用「諧音」(「牙、衙」二字同音)、擬人法修辭，說明食粽子時(入牙門)要先將粽葉剝下來(脫衣裳)。第二則的三、四兩句與第一則相同，一、二兩句係說明粽子的包法與外觀，粽子外形有四面四角卻不是正四方體，而包粽仔係用繩線綁在中央來固定。
從這兩則客家粽謎，看得出古代的粽子原來是水煮的，不是蒸的。南部粽保留傳統做法，北部蒸粽係後來改過的新方法。
無論水煮或蒸的，台灣粽的外形及包法自成一家，明顯跟中國粽有所不同：中國粽係長枕形，用綿線纏繞多圈來固定；台灣粽係四角形，只需要在中央纏一圈(綾羅腰帶繫中央)就行，內行熟手包出來的一定是均衡的四角形，但不是平整个方正體(四面四角無四方)，外行新手包不出四個角，往往變成三角形，而且還會有一角特別長；台灣粽餡料豐富，也是中國粽所不及。筆者在公元60年代就讀屏東女中時，有一個原籍蒙古、在北平(北京)生長就學的女老師，說她還在中國時，一向不喜吃粽子，認為那是所有節慶中最難食的食物…..不過，當她來到南台灣，吃到台灣粽之後「驚為天人」，一吃定情。原來以麵食為主的北方人不懂米食，他們包粽子，只是把糯米包在竹葉裡，直接下鍋煮熟變糯米飯，未加任何餡料，乜沒有調味，這樣的粽子怎麼能吃呢?難怪那位老師不愛吃。中國粽裡最知名的南方「湖州粽」的鹹粽，只包一塊豬肉，並無其他佐料，也沒有調味香料，筆者曾經吃過，好吃嗎？只能說不敢恭維。
筆者在南部出生長大，從小吃的是「水煮粽」，60年代後期來到台北上大學，第一次過端午節，吃到同學送的北部粽，又油又「硬」，跟家裡的「水煮粽」極為不同！不知是胃弱難消化還是吃不慣，當時竟然吃到胃痛。現在，定居台北五十多年，「年深異境猶吾境，日久他鄉即故鄉」，早已入境隨俗，慢慢適應吃「像油飯」的北部粽了，但仍然不敢多吃，一次最多吃一顆罷了。
