文／吳佩瑩，屏東市田寮庄客家人，客委會與屏東客家中心說故事老師（四縣腔）
舊年（2025年）七月，本來強強會毋曉得講客个𠊎，在屏東西勢客家文化中心尋著講客个環境。為著趕燒趕熱，𠊎做了一個決定：報名客語中高級認證，保持講客个動力。這毋單淨係一場考試，較係血脈裡肚流等客家人个責任。對七月報名到十月十八考試，淨三隻月，從講話毋正到成功拿著中高級證書，證明人係有心，麼个都毋係問題。
𠊎想分享自家係仰仔準備考試个。讀書策略就像「葵花寶典」，愛一步一步確實來做。首先，對口語、聽力、閱讀、作文个考試內容愛詳細閱讀，最重要係每一項目个最低標準都愛拿著來。比將講書个寫部分較弱，假使無拿著10 分低標，係講總分超過 215 分乜無算通過。其中口語愛注意，毋係蓋會講就好，尤其係華語轉客語、唐詩、昔時賢文同山歌个發音，聲調句句字字都愛唸著、唸順來，做毋得講到迪迪凸凸。
聽同講个部分，客委會寄來該兩本書就像聖經樣仔寶貝。𠊎个核心技巧係「沉浸」。這三個月，手機同耳機係𠊎最好个朋友，無論係行路、做事、洗碗、上便所都在該聽例句、聽廣播同講古，正式係行到哪仔，講客就著吔，聽力就係分耳公習慣各種腔調同連音，熟絡了，對語句个反應乜會變遽。
過來講著拼音書寫，係最多人想愛放棄个。客委會教材裡背个例句愛背熟，還過收集人、事、物个形容詞同老古人言，寫作文時自然像食粥樣仔，還過，愛保持「逐日寫客語生活日記」个習慣，利用手機客語輸入法同哈客字典來驗證拼法有毋著無？因為手感會加深拼音个記憶。雖然現下實體同線上認證課程盡方便，毋過「先生領入門，勤練功夫還係靠自家」，親手寫過个字正係真功夫。
最尾一招係考前做考古題，目的係同頭腦調整到「考試模式」，熟事講話个速度同語法。考試前若無練習，試場項會頭那一片空白，時間就恁仔打爽忒吔。雖然讀書過程盡辛苦，毋過看著母語變做專業能力，全全攏有價值吔。三個月煞猛讀，換來傳承母語个門票。𠊎做得，相信大家乜一定做得。老古人講「人勤地獻寶，人懶地獻草」，就看你仰般做選擇。
華語
去年（2025年）七月，原本幾乎快忘了說客家話的我，在屏東西勢客家文化中心找到了講客語的環境。為了打鐵趁熱，我做了一個決定：報名客語中高級認證，保持說客語的動力。這不單單是一場考試，更是血脈中流動的客家責任。從七月報名到十月十八號考試，僅三個月，從說話不標準到成功拿到中高級證書，證明人若有心，什麼都不是問題。
我想分享自己是如何準備考試的。讀書策略就像「葵花寶典」，要一步步確實執行。首先，對於口語、聽力、閱讀、作文的考試內容要先詳細閱讀，最重要的是每一項目的最低標準都要達到。比方說書寫部分較弱，若沒拿到 10 分低標，就算總分超過 215 分也不算通過。其中口語要注意不是說得很流利就好，尤其是華語轉客語、唐詩、昔時賢文與山歌的發音，聲調句句字字都要唸正確、唸順暢，不能講得斷斷續續。
聽和說的部分，客委會寄來的那兩本書就像聖經般珍貴。我的核心技巧是「沉浸」。這三個月，手機與耳機是我最好的朋友，無論走路、做事、洗碗、上廁所都在聽例句、聽廣播與講古，真正做到走到哪、客語就聽說到哪，聽力就是讓耳朵習慣各種腔調與連音，聽說多了，對語句的反應也會變快。
接著提到拼音書寫，是最多人想放棄的。客委會教材裡的例句要背熟，並收集人、事、物的形容詞與古人名言，寫作文時自然信手拈來。此外，要保持「每天寫客語生活日記」的習慣，利用手機客語輸入法與哈客字典驗證拼法是否有誤，因為手感會加深拼音記憶。雖然現在實體與線上認證課程很方便，但「師父領進門，修行在個人」，親手寫過的字才是真功夫。
最後一招是考前做考古題，目的是將大腦調整到「考試模式」，適應說話的速度與語法。考試以前若沒有練習，試場上會頭腦一片空白，時間就這樣白白浪費了。雖然讀書過程很辛苦，但看著母語變成專業能力，一切都有價值了。三個月努力讀書，換來傳承母語的門票。我可以做到，相信大家也一定能做到。古人說「人勤地獻寶，人懶地獻草」，就看妳如何做選擇。
