文／張博舜，地方文化暨社區創生工作者，桃園楊梅伯公岡四湖客家人（海陸腔）
伯公岡地區頭擺當發展，集會个所在「大井頭」人上上下下，無論係做生理還係上課讀書，這位係定著愛經過个位所，因為這片係南桃園个集散中心，又安到富岡版本个「台北西門町」，經過這片斯準備愛去富岡火車頭，2024年富岡原創第一齣客語戲劇安到「阿婆摎阿興牯」，2025年延續來做2.0客語戲劇，共樣用海陸腔為主，配合四縣腔來做戲，希望做得摎在地特色海陸腔來做傳承，戲名安到「伯公岡過年時」，背景斯在伯公岡地區過年時節發生个。
在伯公岡地區有一段順口溜係恁樣講：「阿兵哥，錢多多，買面油，分細阿姊膏；細阿姊，𠊎無愛，買面油，自家煞猛膏」，講个背景斯係老頭擺富岡國中該片係269旅兵營駐紮地，阿兵哥會在過年時節，來到街路項打獅拿紅包，主人家乜會拿紅包分阿兵哥「賺福」。
這擺戲劇結合客家獅元素，講个係客家後生人「阿興牯」從台北轉來發生个故事，做戲成員个年齡從十過歲个細孲仔到七十零歲个世大人全有，正經做得講係「青銀共融」，歸齣戲劇係三儕先生來指導，分別係導演音樂「陳虹珈」先生、客語指導「邱鴻春」先生摎舞蹈教學「徐禎霞」先生，共下合力完成。
戲劇用後生人轉來家鄉愛尋頭路來做2.0開頭，第一講著屋下个問題，阿婆分阿興牯閼到無氣無脈咧，第二尋毋著人生个方向，毋知到底愛仰般做較好，堵著當多困難正式無恁該，第三講著愛請伯公做主，擲聖筊來請示，講个係伯公信仰對在地个重要性，最尾透過打獅比賽，阿兵哥摎阿興牯兩隊拚輸贏，透過比賽過程當中，尋著自家想愛麼个，講个係愛把扼這下有个機會，毋使驚做毋好，斯驚毋開始做，「敢去一擔樵，毋敢去屋下愁」，想著斯煞猛打拚去做，另外一隻意義斯係講，上家下屋雖然成時會冤家，毋過大自家全部係隔壁鄰舍，堵著困難，還係會𢯭來𢯭去。
客語傳承大人細子搞到暢摸摸最重要，斯毋驚愁無機會傳承下去，逐隻地方有佢適合做客語社區營造个方式，毋過最重要个係自家開始先開嘴講，語言毋單淨係工具，還較多係了解一隻文化重要角度之一，歡迎來到伯公岡，這片係一隻有當多無共樣文化組成个莊頭，來行幾擺，尋著摎伯公岡對話个方式，你／妳定著會成為這片个「過冬鳥」，分富岡這隻土地黏著，長透想著佢斯會來行行仔。
華語
富岡地區從前蓬勃發展，在集會處「大井頭」人來人往，不論是做生意還是上課讀書，全都是必須經過的地方，因為這片南桃園的集散中心，又叫做富岡版本的「台北西門町」，經過這裡就準備要去富岡火車站，2024年富岡原創首齣客語戲劇叫做「阿婆摎阿興牯」，2025年延續做2.0客語戲劇，同樣是以海陸腔為主，配合四縣腔演戲，希望能將在地特色海陸腔作為傳承，劇名取作「伯公岡過年時」，背景就是說在富岡地區過年時後發生的。
在富岡地區有一段打油詩是這麼說的：「阿兵哥，錢多多，買面霜，給小姐擦；小姐說，我拒絕，買面霜，自己努力擦」，描述背景就是從前富岡國中那裡是269旅兵營駐紮地，阿兵哥會在過年的時候，來到街上舞獅拿紅包，主人家也會拿紅包給阿兵哥「賺福氣」，這次戲劇結合客家獅元素，說的是客家年輕人「阿興」從台北回來發生的故事，演戲成員年齡組成從十幾歲的小孩到七十多歲的長輩都有，真的可以說是「青銀共融」，整齣戲劇由三位老師指導完成，分別是導演音樂「陳虹珈」老師、客語指導「邱鴻春」老師和舞蹈教學「徐禎霞」老師，共同合力協助完成，
戲劇用年輕人回來家鄉要找工作來做2.0開頭，首先講到家中的問題，奶奶讓阿興氣得無精打采了，第二講到迷失人生的方向，不知到底要怎麼做比較好，遇到很多困難真是不容易，第三講到要請土地公來做主，擲筊來請示，指的是土地公信仰對在地的重要性，最後透過舞獅比賽，阿兵哥跟阿興牯兩隊 PK，透過比賽過程當中，找到自己想要什麼，指的是要把握現在有的機會，別怕做不好，就怕不開始做，「勇敢前去，就有一擔柴可用；不敢去，就只好留在家中憂愁沒柴可燒」，想到就努力打拼去做，另一個意義就是說，左鄰右舍雖然有時候會吵架，不過大家全都是鄰居，遭到困難，還是會互相幫忙。
客語傳承大人小孩玩得開心最重要，就不用擔心沒機會傳承下去，每個地方有它適合做客語社區營造的方式，但最重要的是自己開始先開口說，語言不只是工具，更多的是瞭解一個文化重要角度之一，歡迎來到富岡，這裡是一個有很多不同文化組成的村莊，來走幾次，找到與富岡對話的方式，你／妳一定會成為這裡的「候鳥」，被富岡這片土地黏住，常常想到他就想要來走走。
