文／陳良安，國小學生，由邱新春老師、鍾孝昇老師指導，潤稿（四縣腔）
𠊎係龍岡國小六年生陳良安。這一年个生活，對𠊎來講，就像坐一擺當久个雲霄飛車，有歡喜、有驚險，乜有慢慢仔學會感恩个時節。
五年生避暑時節，𠊎參加了客家電視台《奧林P客》節目个錄影。𠊎記得錄影个日，現場當鬧熱，攝影棚个燈光照等𠊎兜，大家心肝肚既緊張又歡喜。節目中，主持人郎祖筠阿姨還特別阿腦𠊎係「表情王」，講𠊎个表情當生趣、當得人惜。蓋央時，𠊎感覺自家企在鏡頭面前，用笑容同大家分享客家文化，係一件當幸福个事情。
毋過，人生个彎斡，來到當遽。無幾久，𠊎就得著一種罕得个病症——格林巴利症候群。因為這種病，𠊎个身體嗄變到當虛弱。腳無力、行路無穩，連䟘床、轉身這兜平常簡單个動作，都變到當困難。後來，𠊎住院三隻零月，其中有兩個月，係在加護病房過个。加護病房肚，電火長透照等，無聲無息，時間當像行到特別慢，𠊎心肝肚盡驚、盡無奈，乜盡毋甘願。
蹛院蓋央時，𠊎最想念个，就係學校个同學摎先生。就在這段時間，𠊎收著全校師生為𠊎製作个「集氣卡」。一張一張个卡片，有圖畫、有祝福，有人同𠊎講「加油」，有人同𠊎講「等你轉來學校」。𠊎在病房肚慢慢仔看，這兜卡片像一股溫暖个力量，在𠊎最無力个時節，鼓勵著𠊎。
在這條發病个過程，𠊎最愛感謝个，係𠊎个阿爸、阿姆。佢兜逐日陪等𠊎，照顧𠊎个生活，細心細意記錄病程，一點一滴都毋敢放過。同時，阿爸、阿姆乜緊同學校保持聯絡，分先生了解𠊎个狀況，安排課程，分𠊎在醫院，乜做得繼續學習。
五年生下學期，就係在這種情形之下，慢慢完成个。有時係復健過後做功課，有時係在病房項看書，雖然辛苦，毋過𠊎心肝肚知，這係屋下人同學校為𠊎鋪出來个路。
今晡日个學生朝會，𠊎利用「逐禮拜一句」母語日，教全校師生一句客家諺語：「食人一口，還人一斗。」這句話，𠊎頭擺識聽過，毋過經過這擺發病，𠊎正了解這句話个意義。大家分𠊎个關心、祝福同支持，毋係一口，係一斗一斗个情。這兜恩情，𠊎會記等，未來乜會用行動來回饋大家。
𠊎係客家子弟，也係一个行過長時間病痛、還在復健个學生仔。感謝學校同學个加油，感謝先生个陪伴，乜特別感謝阿爸阿姆一路里來个照顧。未來个日仔，𠊎會帶等感恩个心，繼續向前行。
華語
我是龍岡國小六年級學生陳良安。這一年的生活，對我來說，就像坐了一次很久的雲霄飛車，有歡喜、有驚險，也有慢慢學會感恩的時刻。
五年級暑假的時候，我參加了客家電視台《奧林P客》節目的錄影。我記得錄影那天，現場非常熱鬧，攝影棚的燈光照著我們，大家心裡既緊張又高興。節目中，主持人郎祖筠阿姨還特別稱讚我是「表情王」，說我的表情很有趣、很討人喜歡。那一刻，我感覺自己站在鏡頭前，用笑容和大家分享客家文化，是一件很幸福的事情。
不過，人生的轉彎來得很快。沒多久，我就罹患了一種少見的疾病——格林巴利症候群。因為這個病，我的身體突然變得非常虛弱。雙腳沒力氣、走路不穩，連起床、翻身這些平常很簡單的動作，都變得非常困難。後來，我住院三個多月，其中有兩個月是在加護病房度過的。加護病房裡，燈光長時間亮著，安靜得幾乎沒有聲音，時間彷彿走得特別慢，我的心裡充滿害怕、無奈，也很不甘心。
住院期間，我最想念的，就是學校的同學和老師。就在那段時間，我收到了全校師生為我製作的「集氣卡」。一張一張卡片，有圖畫、有祝福，有人對我說「加油」，也有人對我說「等你回來上學」。我在病房裡慢慢翻看，這些卡片就像一股溫暖的力量，在我最沒有力氣的時候，鼓勵著我。
在這段生病的過程中，我最想感謝的，是我的爸爸和媽媽。他們每天陪著我，照顧我的生活，細心記錄病情的變化，一點一滴都不敢疏忽。同時，爸爸媽媽也不斷和學校保持聯繫，讓老師了解我的狀況，安排課程，讓我即使在醫院裡，也能繼續學習。
五年級下學期，就是在這樣的情況下慢慢完成的。有時是復健後寫功課，有時是在病房裡看書，雖然辛苦，但我心裡知道，這是家人和學校一起為我鋪出來的路。
今天的學生朝會，我利用「每週一句」母語日，教全校師生一句客家諺語：「吃人一口，還人一斗。」這句話我以前就聽過，但經過這次生病，我才真正明白它的意義。
大家給我的關心、祝福與支援，不只是一口，而是一斗一斗的深情。這些恩情，我會記在心裡，未來也會用行動回饋大家。
我是客家子弟，也是一位走過長時間病痛、仍在復健中的學生。感謝同學的加油，感謝老師的陪伴，也特別感謝爸爸媽媽一路以來的照顧。未來的日子，我會帶著一顆感恩的心，繼續向前走。
