文／陳畇棋，國小教師，美濃客家人，戴美濃（四縣腔）
青菜，大家都有看過、食過，青菜个營養、好處，大家乜知知，毋過，對這下个細人仔來講，佢等敢有正式種過青菜、採收過無？可能就無一定哩喲！
為了配合學校个食農教育，展現對「產地到食飯桌仔」个精神，𠊎等學校設計了種青菜个課程，分學生仔了解𠊎等食个青菜種類有麼个？愛仰仔種？愛仰仔照顧這兜知識，這微毛末節寡寡都係「學問」，毋過有一句話講：「肯問就有路，肯想就有步」，學習个路項本旦就係愛恁仔个態度。
這擺个課程愛帶學生仔種蕒仔，一開始同學生仔紹介蕒仔種類个時節，學生仔就一粒頭那兩粒大，原來蕒仔家族有恁多品種，像平常食生菜沙拉會攞个包心蕒、還係一般屋下會炒來食个苦蕒仔，該種類都無相同。先生用圖片搭並重點紹介，學生仔也了解著台灣个蕒仔豐富多樣，營養淰淰，食法也蓋有變化。
續下來，就愛準備來種了！
大自然就係最好个先生，大自然教分𠊎等个比𠊎等想个還過多。學生仔單淨在挖泥到花盆這步驟，就發生了一個笑科！有一個學生仔挖著䘆公，驚啊大嫲聲噦噦滾緊喊，若似分人打著蓋衰過樣仔，大家通棚㖸啊哈哈滾！𠊎黏時就機會教育一下：「細細胡椒辣過薑，䘆公係土地个好伴，細罔細，毋過在泥裡背逩啊逩仔，對植物生長蓋有幫助喔！」在這過程裡背，雖然挖啊頭烏面烏，但係下把仔看著花蛄仔、一下仔又挖著石頭，本旦在課本裡背看著个畫面，一抹煞都活跳展現在大家面前。
花盆个泥準備好勢，學生仔定定仔將蕒仔秧仔種落去，像爺哀保護自家个子子肉肉，最尾細心細義淋一息水，頭路差毋多就完成了，續下來，安排學生仔跳輪淋水，隔一段時間再過掖肥料，種蕒仔活動就圓滿結束了！
學生仔這下每日去看，看等佢高、看等佢大，歸日望等採收个日仔共快到！雖然實際種菜个過程逐儕都泥糊湢沷，也有息把辛苦，毋過對這擺經驗，學生仔也學著種菜个技巧，培養愛護生命、了解生命个成長過程，這正係食農課程裡背最分人感動个。
華語
青菜，大家都有看過、吃過，青菜的營養、好處，大家也都知道，不過，對現在的小孩來說，他們真的有種過青菜、採收過嗎？可能就不一定囉！
為了配合學校的食農教育，展現從「土地到餐桌」的精神，我們學校設計了種菜的課程，讓學生了解我們吃得青菜種類有哪些?要怎麼種?要怎麼照顧等這些知識，枝微末節都是「學問」，不過有一句話說：「肯問就有路，肯想就有方法」，學習的路上本來就應該這種態度。
這次的課程要帶學生種萵苣，一開始向學生介紹萵苣品種的時候，學生早已一個頭兩個大，原來萵苣家族有這麼多品種，像平常吃生菜沙拉會加的美生菜，還是一般家庭炒來吃的A菜萵苣，種類都不相同。老師用圖片加上重點介紹，學生也了解台灣萵苣的豐富多樣，有滿滿的營養，吃法也很多變。
接下來，就要準備種菜了！
大自然就是最好的老師，大自然教給我們遠比我們想的還要多。學生光在挖土到盆栽這步驟，就發生了一個笑話！有一個學生挖到蚯蚓，嚇得大聲尖叫，好似被人打到般的可憐模樣，大家都哈哈大笑！我立刻機會教育一下：「胡椒雖小，但比薑辣，蚯蚓是土地的好朋友，小雖小，不過在土裡面鑽啊鑽的，對植物的生長很有幫助喔！」在這過程裡，雖然挖得灰頭土臉，但是一下看到瓢蟲，一下子又挖到石頭，本來在課本才看的到的畫面，全部都活靈活現的展現在大家眼前。
花盆的泥土準備就緒，學生慢慢的將萵苣秧苗種下去，就像父母愛護自子的心肝寶貝一樣，最後小心翼翼的澆水，工作就差不多完成了，接下來，安排學生輪流澆水，隔一段時間再施肥，種萵苣的活動就大功告成了！
學生現在每天去看，看著它們日漸高大，整天盼望著採收的日子趕快到來！雖然實際種菜的過程每個人都渾身泥土，也有一些辛苦，不過從這次經驗，學生也學到了種菜技巧，培養愛護生命，了解生命的成長過程，這才是食農課程裡最令人感動的。
