新聞學客語－高雄右堆四縣腔
【客文版】
歡迎收聽這節講客三分鐘新聞，𠊎係六堆个謝國玄
首先來關心演習个消息
【謝國玄／高雄右堆四縣腔】為著提升全民防空意識、國防部全民防衛動員署照防空演習實施辦法，採取「有預警、分區分時」个方式，結合漢光演習實兵操演，在7月15到18，在中部、南部、北部、東部還有外島、離島地區實施防空演習，演習時間30分鐘。
警報開始過後，路項會有交通管制，人同車仔愛疏散避難，還過在防空演習警報解除過後，會實施60分鐘个後續演練，包括「救濟站」災民轉移收容、「急救站」傷患現場醫療處理同災害救援這兜實作演練；演習地區个團體、公司、店頭、工廠、屋下抑係有人活動个場所，應該愛切忒電火、關緪門窗，避免出入，係毋照相關規定配合管制抑係演練，會罰新臺幣3萬銀以上~15萬銀以下。
各地演習期間，台鐵同高鐵正常行駛，各站聯外个公車同計程車暫停行駛。高速公路个車仔下交流道過後愛聽相關人員指揮疏散避難。
警報發布過後，捷運管制入得出毋得，下車个旅客暫時無辦法離開車站，請配合站務人員、捷運警察同保全人員个引導，在站肚實施防空疏散避難，一直到警報解除為止。
下背係各地个演習時間：
7月15 拜二下晝一點半到兩點：苗栗、臺中、南投、彰化實施防空演習
7月16 拜三下晝一點半到兩點：高雄、屏東實施防空演習
7月17 拜四下晝一點半到兩點：宜蘭、基隆、臺北、新北、桃園、新竹縣市實施防空演習
7月18 拜五朝晨十點到十點半：花蓮、臺東、金門、馬祖、澎湖實施防空演習
以上講客三分鐘新聞係謝國玄編輯、報導，承蒙若收聽
講客廣播電臺
官網網路收聽：https://www.hakkaradio.org.tw/
Android版 APP下載：https://reurl.cc/8GWlXd
IOS版 APP下載：https://reurl.cc/O1pb59
